Luka 12:42 - Tedim Bible Revision 2017

⁴² Topa in, “A pil a citak nasem pa i cih a bangcite ahi hiam? A nasep pih dangte ukin a hun manmanin amauteʼ nekzah ding ciat a pia dingin a topa in a seh nasem pa ahi hi.

Tedim Bible

⁴² Topa in, “A topa in a hun a tun’ ciangin, a innkuanpihte’ annek tuidawn a hawmsak dinga a koih, a diktat a lungpil nasempa kua ahi hiam?

Luka 12:42 Referans Kwoze

Hebru 13:17

Na makaite uh thu na mang unla, a genna uh bangin na gamta un. Pasian kiangah amaute in a nasepnate uh a pulak ding uh ahih manin tawlnga loin note hong lunghimawh tawntung uh hi. Amauteʼ thu mang le-uhcin a nasepna uh ah lungdam mahmah ding uh a, mang kei le-uhcin dah pipi-in na sem ding uh hi. Dah pipi-in a nasepna uh note adingin zong phattuamna a om tuan hi lo hi.

Hebru 13:7

Note tungah Pasianʼ thu a hong gen, nidang a na makai masate uh phawk un. Amauteʼ nuntakna le a sihna ziate uh ngaihsun unla, amauteʼ upna bang na neih nadingun hanciam un.

2 TIMOTI NIHNA 4:2

hunhoih hunsia cih khen tuan loin Pasianʼ thu hilh ding na kin ngaihsut nading, lungduaina tawh miteʼ lungsim zo-in, mite taii-in, hanthawnin na hilh nadingin thu a hong pia ka hi hi.

1 TIMOTI MASA 5:17

Pawlpi sungah ukna le makaihna siamin, thuhilh le thugen hahkat tawh a thuah upate pen thaman a zah nih piak dingin kilawm hi.

1 PETER MASA 4:10

Pasianʼ piak na a zatsiamte bangin Pasianʼ kiang panin na ngah uh nate, midangteʼ phattuam nadingin na zang un.

Titu 1:7

Pawlpi siate pen Pasianʼ nasem ahih manin paubaanna a om lo, a kiphasak lo, zukham thei mi ahi lo, a ngongtat lo, a huaiham lo,

Sawltak 20:28

Kha Siangtho in noteʼ khut sungah a hong koih pawlpi mite le nomau pumpi mahmah limtakin na kem un. Pasian in a Tapa a sihna tawh a ngah a pawlpi hoihtakin a kemte na hi ta un.

Mattiu 20:8

“Nitak ciangin lo nei pa in a nuai-a nasem ukpa kiangah, ‘Lokhote sam inla, a kicial nunung pen a kipanin a kicial masa pente dongin a ni tha uh pia in,’ a ci hi.

Ezekiel 34:3

Tuunawi ne-in, tuumul silhin, tuu thaute go-in a sa na ne uh hi. Ahi zongin tuute na vak kei uh hi.

Isaiah 50:4

A lunggim mite ka thahatsak theih nadingin Topa Pasian in ka gen ding thu hong hilh khin hi. Ama hong hilhnate a ngai dingin zingsang simin lawpna hong guan hi.

Paunak 15:23

A hun mahin dawn pah theihna lungkimhuai a, a kilawm kammal tawh dawn pah theihna hoih zaw kan hi.

Hebru 3:5

Moses pen nasem khat hihna tawh Pasianʼ inn sungah thu khempeuh ah citak a, mailam hunah Pasian in a gen ding thute a gen hi.

1 TIMOTI MASA 3:15

Ahi zongin ka hong zekai khak zenzen leh thuman thutak khuampi le bulpi, a nungta Pasianʼ pawlpi ahi Pasianʼ innkuan sungah bangci gamtat ding cih na theih nadingin hih ka hong laikhak in lam hong lak ding hi.

Luka 7:13

Topa in tua meigongnu a muh ciangin a khasiat suak a, “Kap kei in,” ci-in a khem hi.

Mattiu 13:52

Tua ciangin Jesu in amaute kiangah, “Vantung ki-ukna sungah a hong lut Thukham hilh siate khempeuh pen, a sumkholna panin a thak le a lui, a ututin a la khia thei ziauziau sum nei pa tawh kibang uh hi,” a ci hi.

Jeremiah 23:4

Amaute a don ding makaite ka koih dinga, lau nawn lo, lungkham nawn loin khat beek a mangthang nawn kei ding uh hi, Topa in kong ci hi.

Paunak 27:18

Theikung a cing pa in a theigah ne a, a tapa a kem pa in pahtakna ngah hi.

Paunak 31:15

Phalvak tungin zingtho a, annek ding teng limtakin bawlin a nasem numeiteʼ sep ding teng a vaihawmsak hi.

Luka 7:19

Johan in zong ama nungzuite nih sam a, Topa kiangah amaute paisakin, “Johan in hong pai ding a cih pa mah na hi hiam, tua ahih kei leh a dang na lamen lai ding ka hi uh hiam?” ci-in a dong dingin a sawl hi.

Luka 12:43

A topa hong ciah ciangin hih ama sawl bangin a sem a muh nasem pa pen mi hampha mahmah ahi hi.

Paikhiatna 36:4

biakbuk nasep a namkim a sem mi khempeuh amauʼ nasepna ciat panin hong pai uh a,

Paunak 12:8

Mipilte kiphatin kipahtawi a, mihaite kineu-et hi.