Late 74:2 - Tedim Bible Revision 2017

² Tanglai-in na ngah sa na mihonte, nangma luah minam dingin na tatkhiat sate phawk in! Na teennasa Zion Mual hong phawk in.

Tedim Bible

² Tanglai-a na ngahsa nangma mihonte, nangma luah minam dinga, na tatkhiatsate phawk in! Na ten’nasa Zion Mual phawk in.

Late 74:2 Referans Kwoze

Jeremiah 10:16

Jakobʼ Pasian tua bang hi lo a, amah pen na khempeuh a piangsak pa ahi hi. Ama mi dingin Israel mite teel a, ama min, Vanglian Topa ahi hi.

Thu-hilhkikna 32:9

Ahi zongin Topaʼ tanh pen ama mite hi a, Jakobʼ suante pen a kipia ama luah ahi hi.

Paikhiatna 15:16

Launa le kihtakna amauteʼ tungah tunga, a thahat na vangliatna hangin amaute suangtum bangin taang loin om uh hi. Topa aw, nangma mite in a khen mateng, na lei sa mite in a khen mateng amaute khikcip uh hi.

Paikhiatna 15:13

Nangmah in na ciam sa zui-in na tatkhiat sa mite na paipih a, na hatna tawh a siangtho na omna ah amaute lam na lak hi.

Late 135:4

Bang hang hiam cih leh Topa in ama adingin Jakob teel a, ama neihsa dingin Israel teel khinta hi.

Thu-hilhkikna 4:20

Ahih hangin Topa in tu ni-a bangin sik meikhuk tawh a kibang Egypt panin ama neih mi dingin note hong la-in hong paikhiatpih khin hi.

Mangmuhna 5:9

Amaute in la thak khat sa uh a, “Nang Tuuno, tua laizial a la khia ding le a ciaptehnate a la khia dingin na kilawm hi. Nang hong kigo khin ahih manin mi namkim le pau namkim a pau mite sung panin na sisan tawh Pasian adingin mite na lei khin a,

Titu 2:14

I mawhna khempeuh panin hong hon khia ding le ama neihtuam i suah theih nadingin Jesu a mahmah hong kipumpiak a, eite pen gamtat hoih gamtat ding a lawp mahmah ihi hi.

Sawltak 20:28

Kha Siangtho in noteʼ khut sungah a hong koih pawlpi mite le nomau pumpi mahmah limtakin na kem un. Pasian in a Tapa a sihna tawh a ngah a pawlpi hoihtakin a kemte na hi ta un.

Jeremiah 51:19

Jakobʼ Pasian tua bang hi lo a, na khempeuh a piangsak pa ahi hi. Ama adingin Israel mite teel a, ama min pen Vanglian Topa ahi hi.

Isaiah 63:17

Topa aw, kote in nang kong kihtak loh theih nadingun bang hangin na lampi panin kote hong pialsakin ka lungsim uh khauhsak na hi hiam? Nangma nasemte, nangma luah minamte na ngaihsutna-in hong kiheikik in.

Isaiah 63:9

Vantung miteʼ hotkhiat hi loin, Topa mahmah in amaute hon khia hi. A itna le a hehpihna tawh amaute hon khia a, amah in a beisa hun khempeuh ah amaute hoihtakin a kem hi.

Isaiah 62:12

Amaute pen A Siangtho Mi, Topa’ Hotkhiatte kici dinga, nang pen A kizong khia, a kinusia lo khuapi, hong kici ding hi.

Isaiah 51:11

Topa’ mi a kithehthangte hong ciahkik dinga, lasakna tawh Zion ah hong pai ding uh hi. A tawntungin amaute lungdam ding uh a, amaute in lungdamna le kipakna ngahin, dahna le khuisatna nei nawn lo ding uh hi.

Late 106:40

Tua ciangin ama mite tungah Topaʼ hehna hong kitawhkuang a, amah in ama luah minamte a kih hi.

Late 77:15

Nangmah in na vangliatna tawh Jakob le Josefʼ suante, na mite na hon khia hi.

Late 68:16

Dawnzum tampi a nei mual aw, Pasian in ama om nadingin a deih mual Pasianʼ om tawntung nading mun bang hangin simmawh et na hi hiam?

Late 33:12

Topa, Pasian-a a nei minam, ama luah dingin teelna a ngah minamte thupha ngah ahi hi.

Late 9:11

Zion ah a om Topa phatna la sa un! Ama nasepnate miteʼ lakah gen un!

Thu-hilhkikna 9:29

Bang hang hiam cih leh amaute pen na vangliatna le na thahatna tawh na paikhiatpih na mihingte le na luahte ahi hi,’ ka ci hi.

Thu-hilhkikna 9:26

Topaʼ tungah thu ka ngen a, ‘Topa Pasian aw, nangmah in na liatna tawh na hotkhiat sa, na vangliatna tawh Egypt panin na paikhiatpih na mite le na luahte susia kei in.

Late 9:12

Bang hang hiam cih leh mi thahna a hua pa in amaute phawk a, a thuak miteʼ awging amah in mangngilh lo hi.

Late 94:14

Bang hang hiam cih leh Topa in ama mite nusia lo dinga, ama luahte paidak lo ding hi.

Isaiah 62:6

Jerusalem aw, na kulhte tungah galvilte ka koih khin a, sun tawntung le zan tawntungin amaute gamdai ngei lo ding uh hi. Amaute in a thuciamna Topa phawksak ding uh a, amah in Jerusalem kipsakin leitung miteʼ phat dingin a bawlkik matengin amaute khawl lo ding uh hi.