Kolose 1:5 - Tedim Bible Revision 2017

⁵ Thu dang na zak ma un, lungdamna thuman taktak na zak uh ciangin lametna na nei uh hi. Note adingin vantungah a hong kikoihsak tua lametna hangin note in muanna le itna a nei na hi uh hi.

Tedim Bible

⁵ Thu dang na zakma un, lungdamna thuman taktak na zak uh ciangin lametna na nei uh hi. Note a dingin vantungah a hong kikoihsak tua lametna hangin note in muanna le itna a nei na hi uh hi.

Kolose 1:5 Referans Kwoze

Efesa 1:13

Note in zong hotkhiatna a hong ngahsak thei Lungdamna Thu a man za-in Khris na up uh ciangin, Pasian in a hong ciam sa bangin ama mi na hihna uh a kilat nadingin note tungah Kha Siangtho hong piakna tawh a hong ciamteh hi.

2 TIMOTI NIHNA 4:8

Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi.

Kolose 1:27

Pasian in mi khempeuh adingin a koihcing hih a thupi a deihhuai a thusim pen ama mite tungah pholak ding a sawm ahi hi. Tua thusim in: Khris tawh a kipawlte in Pasian tawh minthanna ngahkhawm ding hi, cihna ahi hi.

1 PETER MASA 2:2

Naungek suakcilte na bang unla, note khang to-in hotkhiatna na ngah theih nadingun kha thu tawh kisai nawizu siangtho duh belin na nei tawntung un.

Kolose 1:23

Ahi zongin note in lungdamna thu na zak cil lai-un na neih uh lametna panin liing het loin, bulkip nei-in citakin na om paisuak ding uh ahi hi. Tua lungdamna thu mah keimah Paul in hilhin ka sepbel hi a, leitung mun khempeuh ah a kihilh lungdamna thu mah ahi hi.

1 KORIN MASA 15:19

Khris hangin i lamet thu pen hih i leitung nuntak sung thu ding bek hi takpi leh leitung midang khempeuhte sangin a hehpihhuai zaw ihi ding hi.

Hebru 7:19

Moses Thukham ahi ngeina lui in a cingtaaksak zawh bangmah om lo ahih manin eite in Pasian i naih theih nading lametna ahi ngeina thak hong kithun hi.

1 THESALONIKA MASA 2:13

Note kiangah Pasianʼ thu kong gen uh ciangin no thu um mite sungah ama thu tawh kisai-in Pasian in na hong sem ahih manin koteʼ thugente pen Pasianʼ thu taktak ahih mah bangin koteʼ thugenna na zak uh ciangin mihingʼ thu bangin ngaihsun loin Pasianʼ thu taktak mahin hong sang na hih manun, hih thu hangin zong Pasianʼ tungah ka lungdamna uh ka ko uh hi.

1 JOHAN MASA 3:3

Khris a siangtho mah bangin amah tawh kibat ding a lamen khempeuh in zong a nuntakna uh siangthosak ding hi.

Galati 5:5

Kote ahihleh Pasian in amah tawh a kipawl thei dingin hong bawl ding hi, ci-in lamenin, koteʼ upna hangin Kha Siangthoʼ vangliatna tawh hong piang ding hi, ci-in a om ka hi uh hi.

2 KORIN NIHNA 5:19

Tua ahih manin koteʼ thugen bulpi in: Pasian in miteʼ mawhnate ngaihsun nawn loin, Khris hangin leitung mi khempeuh le amah a kilemin hong bawl a, tua kilemna thu a gen dingin kote hong seh hi.

Sawltak 23:6

Paul in tua uliante lakah Saddusi mi le Farisi mi a om lam a muh ciangin amaute kiangah, “Lawmte aw, kei pen Farisi miteʼ suan ahi Farisi mi ka hi hi. Misite hingkik ding hi, ci-in lamenin upna ka neih manin hih lai ah thusitna ka thuak hi,” a ci hi.

1 PETER MASA 3:15

Na lungsim sung uh ah Khris zahtak bawl unla, amah Topa-in nei un. Noteʼ lametna thu a hong dong a om khak leh hoihtakin a gen thei dingin kiging tawntung unla, ahi zongin lungnemna le zahtakna lim tawh gen un.

1 KORIN MASA 13:13

Tu laitakin a om lai thu thumte pen upna, lametna le itna hi a, tua thumte sung panin itna mah a thu lian pen ahi hi.

Sawltak 24:15

Amauteʼ up le lamet mah bangin, Pasian in miphate le misiate a kibangin sihna panin hingkiksak khawm ding hi, ci-in umin ka lamen hi.

Late 31:19

Nang hong zahtakte adingin na koih sa na hoihte, nang hong belte adingin miteʼ muhna ah na bawl, nangma hoihna kicing a, mi khempeuh in thei uh hi.

1 TIMOTI MASA 1:15

Khris Jesu, mawhneite a hon khia dingin leitungah hong pai hi, cihna thu a man hi a, a uphuai a sanhuai thu ahi hi. Keimah zong tua mawhnei mite lakah a mawhpha bel ka hi hi.

2 THESALONIKA NIHNA 2:16

I Topa Jesu Khris mahmah leh, eite hong itin, a hong hehpihna tawh thakhauhna le lametna a hong pia tawntung eiteʼ Pa Pasian in

Kolose 3:16

Khris thu a cing takin note lungsimah hong om henla, pilna tawh khatlekhat thu kihilhin na kitai un. Pasian tungah lungdam kohna-in Thuciam Lui sunga late, la thakte le biakna late na sa un.

ROM (Romans) 10:8

Tua bang a cih ciangin, “Pasianʼ thu pen nai mahmah in note kam sung le na lungsim sung uh ah om hi,” a cihnopna ahi hi. Tua Pasianʼ thu pen koteʼ hilhhilh, “Pasian um un,” cihna thu ahi hi.

Sawltak 10:36

Mi khempeuhʼ Topa ahi Jesu Khris hangin a kingah Lungdamna Thu, Israel mite tungah Pasian in a puakna thu na thei uh hi.

Luka 12:33

Na neihsa uh zuak unla, mizawngte tungah tua sumte na pia un. Note adingin a sia thei lo sumkholna na bawl unla, gutate in a luh zawh lohna, leikha in zong a nek zawh lohna, cikmahin a kiam ngei het loh nading mun vantungah na sumte uh na khol un.

Sawltak 13:26

“Abrahamʼ suan ka behte le Pasian a bia Gentail mi khempeuh aw, hih hotkhiatna thu pen eite adingin Pasian in a hong puak ahi hi.

2 KORIN NIHNA 6:7

thuman genna le Pasianʼ nasemte ka hihna uh, Pasianʼ vang tawh ka kilangsak uh hi. Kote in kihut nading le galsim nadingin hiamin thuman ka zang uh hi.

Galati 2:5

Lungdamna thuman taktak pelhem het loin note adingin a kipsuak theih nadingin amauteʼ deihna them khat zong ka zui het kei uh hi.

Galati 2:14

Lungdamna thu tawh kizui-in a mantakin gamta lo uh hi, ci-in ka muh ciangin amaute khempeuhʼ zakin Peter kiangah, “Nang pen Jew mi hi napi-in Jew mi bangin gamta loin Gentail mite bangin a gamta khin sa na hi hi. Tua bangin a gamta khin sa hi napi-in bang hangin tu-in Gentail mite, Jew mite bangin a gamtat nadingun na gamtatna tawh lakkik na hi hiam?” ka ci hi.

Efesa 4:21

Note in Khris thu na zak sa uh hi a, ama nungzui na hih manun Jesuʼ thutakna na theih sa uh ahi hi.

2 PETER NIHNA 1:12

Tua ahih manin note in hih thute thei khinin, na theih sa uh thuman ah kip takin na om khin uh ahi zongin a hong phawksak kikkik ka hi hi.