Kolose 1:27 - Tedim Bible Revision 2017

²⁷ Pasian in mi khempeuh adingin a koihcing hih a thupi a deihhuai a thusim pen ama mite tungah pholak ding a sawm ahi hi. Tua thusim in: Khris tawh a kipawlte in Pasian tawh minthanna ngahkhawm ding hi, cihna ahi hi.

Tedim Bible

²⁷ Gentailte lakah hih thu thukpi tawh kipawl alianpi nopsakna bang zahin lian ci-in misiangthote in a theih nadingin Pasian in a deih hi. Tua thu thukpi in: vanglian lametna thu ahi, note sungah a om Khazih ahi hi.

Kolose 1:27 Referans Kwoze

Johan 14:20

Tua hun ciangin Pa sungah kei ka omna thu le note sungah ka hong om mah bangin keima sungah na omna thu uh na thei ding uh hi.

ROM (Romans) 8:10

Ahi zongin note sungah Khris hong om leh mawhna hangin na pumpi uh a si veve ding ahi zongin, note pen Pasian tawh kipawl khin na hih manun note adingin Kha Siangtho pen nuntakna ahi hi.

1 JOHAN MASA 4:4

Ka it tate aw, note, Pasianʼ mite na hi uh a, tua bang kamsang kineihkhemte a zo khin na hi uh hi. Bang hang hiam cih leh leitung mite a panpih dawimangpa sangin note hong ompih Pasian vanglian zaw hi.

Galati 2:20

Tua ahih manin tu hun a ka nuntakna zia pen kei hang hi nawn loin ka sungah a hong om Khris hang ahi hi. Tua hi a, keimah hong itin, keima adingin a nuntakna a hong pia Pasianʼ Tapa ka muanna tawh tu laitakin a nungta ka hi hi.

1 KORIN MASA 3:16

Note pen Pasianʼ biakinn na hihna uh le note sungah Pasianʼ Kha Siangtho a teeng ahih lamtak na theih sa uh ahi hi.

Mangmuhna 3:20

Kongkhak ah dingin kong ka hong kiu hi. Ka aw za-in kong hong honte kiangah lutin an ka nekhawm ding uh hi.

Johan 14:17

Leitung mite in tua Kha Siangtho mu thei lo, theithei lo uh ahih manin sang thei lo ding uh hi. Ahi zongin note sungah tua Kha Siangtho hong om ding ahih manin note in na thei ding uh hi.

Galati 4:19

Taneute aw, note in Khrisʼ pianzia bang na neih dong uh, naupaii nupi in ta a suah ding a gimpih bangin note ka hong lunggimpih ding hi.

2 KORIN NIHNA 4:6

“Khuamial sung panin khuavak taang hen,” a ci Pasian mah in Jesuʼ maitang a taangsak Pasianʼ vangliatna thu theih nading khuavak ka ngah theih nadingun kote lungsim sungah khuavak hong taangsak hi.

1 TIMOTI MASA 1:1

Eite a hong Hon Pasian le eiteʼ lamet Khris Jesuʼ thupiakna tawh Khris Jesuʼ sawltak ahi keimah Paul in,

Kolose 2:3

Khris pen Pasianʼ pilna le a thuthuk khempeuh a kitheih theih nading ahi hi.

Johan 14:23

Jesu in, “Kei hong itte in ka thu zui ding uh hi. Ka Pa in zong it dinga, ka nihun tua mite kiangah pai-in amaute tawh ka om khawm ding uh hi.

2 KORIN NIHNA 6:16

Pasianʼ biakinn le lawkiteʼ milim bangci kilem theih ding ahi hiam? Bang hang hiam cih leh Pasian in, “Ka mite lakah teengin amaute tawh ka om khawm ding hi. Kei pen amauteʼ Pasian ka hi dinga, amaute, keima mi ahi ding uh hi.

Kolose 3:11

Tua ahih manin Gentail mi le Jew mi, vun at mi le vun at loh mi, khuapi mi le khua neu mi, sila le sila ahi lo, cih bangin a kilamdanna om lo a, Khris pen mi khempeuh ading hi thei a, thu khempeuh ading hi thei a, thu khempeuh ah amah bek ahi hi.

Johan 17:26

Kei na hong itna zah itna mah amaute sungah omin, amaute tawh kei ka om khawm theih nadingin amaute tungah nangma min ka gen khin a, mai lamah zong ka gen lailai ding hi,” ci-in thu a ngen hi.

Efesa 2:22

Note zong midangte tawh kigawmin ama tungah na kilam uh a, Kha Siangtho-in Pasian a ten nading inn na suak uh hi.

Johan 6:56

Ka sa ne-in ka si a dawnte pen kei tawh pum khat ka hi uh hi.

Efesa 1:7

Khris hong sihna hangin eite in suahtakna ngahin, i mawhnate hong kimaisak ahi hi. Tua zah dongin Pasianʼ hong hehpihna thu bangzah takin lian ahi hiam?

Filippi 4:19

A na ka sep i Topa Pasian in ama hauhna tawh kizui-in Khris Jesu hangin noteʼ kitangsapna khempeuh hong pia ding hi.

ROM (Romans) 9:23

ama minthanna a lah theih nadingin ama minthanna a ngah dingin a hong seh sa eite tungah zong ama hehpihna a hong piak theih nading thu a nei hi.

ROM (Romans) 5:2

Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.

Kolose 1:5

Thu dang na zak ma un, lungdamna thuman taktak na zak uh ciangin lametna na nei uh hi. Note adingin vantungah a hong kikoihsak tua lametna hangin note in muanna le itna a nei na hi uh hi.

2 KORIN NIHNA 4:17

Tu hun laitakin tomno sung lungkhamna ka thuakte uh in ka thuakna uh sangin nakpi takin a lian zaw tawntung minthanna sung hong tunpih ding hi.

Luka 17:21

Hih lai ah om hi, hua lai ah om hi, cih bangin kuama gen theih hi lo hi. Bang hang hiam cih leh note lakah Pasianʼ Ukna hong om khinzo hi,” ci-in a dawng hi.

Mattiu 13:11

Jesu in, “Vantung ki-ukna tawh kisai thusim note tungah hong kihilh a, ahi zongin amaute tungah kihilh lo hi.

2 KORIN NIHNA 2:14

Ahi zongin Pasian tungah lungdam mahmah nading thu a om hi. Khris tawh ka kipawlna hangun gualzawhna tawh Khris a paina khempeuh ah Pasian in kote hong zuisak hi. Mun khempeuh ah paknamtui a kizelh bangin Khris thutheihna a kizelsak dingin Pasian in kote hong zang hi.

ROM (Romans) 11:33

Tua ahih manin Pasianʼ hong hehpihna nak liat mahmah a, a pilna le a thu theihnate nak thuk mahmah hi. Ama thukhennate kuaʼ gen theih ding hi lo a, a nasepna ziate kuaʼ tel zawh ding hi lo hi.

ROM (Romans) 2:4

Pasian migi-in thu a diah hithiatna pen na kisikkik theih nading uh a deihna ahih lamtak phawk kha loin, a migitna, a lungduaina, a hong thuaknate neu ngaihsut kha na hi uh hiam?

Hebru 6:19

I lungsim a hong kipsak dingin tu-a bang lametna a nei ihi hi. Tua i lametna kician mahmah a, vantung biakinn siangtho tawngnung sung ciang dong tung khinta hi.