Joshua 11:15 - Tedim Bible Revision 2017

¹⁵ Topa in ama nasem Moses a thupiak bangin Moses in zong Joshua thu pia a, Joshua zong tua bangmahin gamta a, Topa in Moses a thupiaknate khempeuh a hih loh om lo hi.

Tedim Bible

¹⁵ Topa in ama nasem Moses a thu piak bangin Moses in zong Joshua thu pia a, Joshua zong tua mah bangin gamta hi; Topa in Moses a thu piaksate khempeuh a hih loh om lo hi.

Joshua 11:15 Referans Kwoze

Joshua 1:7

Thahat-in hang inla, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na paina peuh ah hoihtakin na lamzan theih nadingin tuate khat zong pelh kei in.

Sawltak 20:20

Mihon lak ahi a, noteʼ inn sungah ahi zongin ka hong thuhilhna khempeuh ah noteʼ phattuam nading a om khempeuh siit nei loin kong gen khin hi.

Thu-hilhkikna 7:2

Topa na Pasian un note tungah amaute hong pia-in, note in amaute na zawh uh ciangin, note in amaute na susia mang ding uh hi. Amaute tawh thuciamna na bawl kei ding uh a, amaute tungah hehpihna na lak kei ding uh hi.

2 KHANG TANGTHU NIHNATE 30:12

Topaʼ thupiakna tawh kumpipa le ulianteʼ sawlna a sem dingin Judah mite tungah Pasian in lungsim kikhatna a guan hi.

Thu-hilhkikna 31:7

Tua ciangin Moses in Joshua samin, Israel-te khempeuh muhin ama kiangah, “Thahat inla hang in. Bang hang hiam cih leh amaute tungah piak dingin Topa in amauʼ pute pate tungah a ciam sa leitang ah hih mite tawh na pai dinga, nangmah in tua leitang amaute na ngahsak ding hi.

Thu-hilhkikna 12:32

“Note kong thupiak khempeuh na hih ding uh na lim ngaihsut ding uh hi. Na behlap kei ding uh a, zong na khiam kei ding uh hi.

Thu-hilhkikna 4:5

“En un, note in a luah dingin na lutna uh gam sungah na zuih dingun Topa ka Pasian in kei hong thupiak bangin thukhamte le ngeina kipte kong hilh khinzo hi.

Sawltak 20:27

Bang hang hiam cih leh note tungah Pasianʼ thu kong gen loh khat zong om nawn lo hi.

Thu-hilhkikna 4:2

Topa na Pasian un hong piak ahi keima hong thugente na zuih theih nadingun no kong thupiakte behlap loin, zong na khiam kei ding uh hi.

1 SAMUEL MASA 15:11

“Kumpi-in Saul ka koih ka kisik hi. Bang hang hiam cih leh amah pen keimah zuihna panin kiheikik a, ka thupiaknate sem lo hi,” a ci hi. Tua ciangin Samuel heh hi; zan tawntung Topaʼ tungah kiko hi.

Joshua 11:12

Topaʼ nasem Moses in a thupiak sa bangin Joshua in tua kumpiteʼ khuapite le a kumpi khempeuh la-in namsau tawh amaute vatin that mangkhin hi.

Luka 11:42

“No Farisi mite in gimna na thuak ding uh hi. Note in Pasian tungah lengmasel, thuambuak a kipan anteh theipuam dongin sawm-ah-khat pia napi-in, mite tungah thuman ding le Pasian it ding na don kha kei uh hi. Hihte khempeuh na hih kim ding uh hi a, paih khiatna neih ding uh hi lo hi.

Mattiu 23:23

“Mihoih a kineihkhem, no Thukham hilh siate le Farisi mite in gimna na thuak ding uh hi. Note in Pasian tungah lengmasel, masala le kummin sing namtui a kipanin meh namtui nam khempeuh, sawm-ah-khat pia napi-in, thukham sungah a thupi zaw ahi thutang, hehpihna le thumante na don kei uh hi. A dangte nusia tuan loin hih thute na zuih ding uh ahi hi.

Joshua 11:14

Israel mite in tua khuapite sunga van kinusiate le ganhingte amauʼ gal zawh van dingin a la uh hi. Ahih hangin amaute a thah khit matengun namsau tawh vat gawp uh a, khat beek hingkhawi lo uh hi.

Joshua 11:16

Tua ahih ciangin Joshua in gam khempeuh, mual tung gam le Negeb gam le Goshen gam khempeuh le lei niamna gam le Arabah le Israel-teʼ mual tung gam le a lei niamna gamte,

Gamlak-vakna 33:50

Jerikho nai Jordan kiang Moab zanglei ah Topa in Moses kiangah,

Gamlak-vakna 33:52

noteʼ mai panin tua gam a mi khempeuh na hawl khia ding uh a, amauʼ suang milimte khempeuh susia-in, a kisung amauʼ milimte khempeuh na susia ding uh a, mual tunga a biaknate khempeuh uh na su mang ding uh hi.

Thu-hilhkikna 31:3

Topa na Pasian mahmah uh noteʼ mai ah hong gal kah ding hi. Noteʼ mai ah hih minamte amah in susia dinga, note in amaute na suan khia ding uh hi. Topaʼ gen sa bangin noteʼ mai ah Joshua hong gal kah ding hi.

Thu-hilhkikna 31:5

Topa in note tungah amaute hong pia dinga, note kong piak thupiaknate khempeuh tawh kizui-in amaute tungah na bawl ding uh hi.