Johan 8:38 - Tedim Bible Revision 2017

³⁸ Tua ahih manin keimah in ahihleh ka Paʼ hong lah sa thute bek a gen ka hi a, ahi zongin note na hih uh leh na pa uh hong sawl bangin a gamta na hi uh hi,” a ci hi.

Tedim Bible

³⁸ Keimah in ka Pa kiangah ka muh bangin kong hilh hi. Note in zong na pa uh kiangah na zak bangun na gamta uh hi,” a ci hi.

Johan 8:38 Referans Kwoze

Johan 5:19

Tua ahih manin Jesu in amaute kiangah, “A mantakin gen lehang: Tapa in ama thu bek tawh bangmah sem lo a, a Pa in a sep a muh teng bek a sem ahi hi. Tua hi a, a Pa in a sep teng mah a Tapa in zong a sem ahi hi.

Johan 8:44

Note pen na pa uh Dawimangpaʼ tate na hi uh a, na pa uh deihna bangin a gamta nuam na hi uh hi. A kipat a kipanin na pa uh mi that hi a, thuman gen ngei lo ahih manin thuman tawh kipawl thei lo hi. Amah pen zuauna khempeuh a pianna a zuaugen pa ahih manin zuau a gen ciangin ama ngeina hi lel hi.

Johan 8:41

Note pen na pa uh gamtat bangin a gamta na hi uh hi,” a ci hi. Tua ciangin amaute in, “Kote pen zawlta ka hi kei uh a, ka Pa uh Pasian ahi hi,” a cih uh ciangin,

Johan 5:30

“Keima thu guak tawh ka hih theih bangmah om lo hi. Pasianʼ hong genna bang bekin thu ka khen hi. Keima ut bangin sem loin kei hong sawl paʼ deih bangin sem ka hih manin ka thukhenna thuman hi.

Johan 14:24

Kei hong it lote in ka thugente zui lo ding uh hi. Tu-a na zak uh thute pen keima thu hi lo a, kei hong sawl Pa Pasian kiang panin a hong pai thu ahi hi.

Johan 14:10

Kei pen Pa tawh pum khat ka hih lamtak um lo na hi hiam? Note tungah kong gen thute keima thu bek tawh a hong gen ka hi kei a, kei tawh a om Pa Pasian in na semin a hong gen ahi hi.

Johan 8:26

Noteʼ thu genin, noteʼ thu ka khen ding tampi tak om hi. Kei a hong sawl pa a thuman a thutak hi a, ama tung panin ka zak sa thute bek leitung mite tungah a pulak ka hi hi,” ci-in a dawng hi.

Johan 3:32

Amah in a muh sa leh a zak sa thu a gen hi napi-in kuamah in ama thugen um lo uh hi.

Johan 17:8

Bang hang hiam cih leh gen dingin na hong sawl thu khempeuh amaute kiangah ka gen ciangin um uh a, nangma kiang panin a pai ka hihna thu hong thei uh a, nangma hong sawl ka hihna thu zong hong um uh hi.

Mattiu 3:7

Ahi zongin Farisi mite le Saddusi mite tampi tak tui a kiphum dingin a hong pai a muh ciangin Johan in amaute kiangah, “Gul bangin ngian a zang note aw, a hong tung ding Pasianʼ hehna panin na suahtak theih nading uh kua in hong hilh khol ahi hiam?