Johan 7:35 - Tedim Bible Revision 2017

³⁵ Tua ciangin Jew mi uliante khatlekhat kiho uh a, “I muh zawh loh dingin hih mipa koi lai ah pai sawm hi ding ahi hiam? Jew mite omna Grik khuapi tuamtuamte ah pai-in Grik mite kiangah thu hilhsawm hi ding ahi hiam?

Tedim Bible

³⁵ Tua ahih ciangin, Judah mite in, “Ei muh zawh loh dingin amah koilam pai ding hiam? A kitheh zak a, om Grik mite lakah pai ding a, Grik mite kiangah thu a hilh ding hiam?

Johan 7:35 Referans Kwoze

Jeim 1:1

Pasian le Topa Jesu Khris sila keimah James in Leitung mun khempeuh ah kithehthangin a om minam sawm le nihte tungah hopihna lai ka hong gelh hi.

1 PETER MASA 1:1

Jesu Khris sawltak keimah Peter in Pontas gam, Galatia gam, Kappadosia gam, Asia gam le Bithynia gamah kithehthangin peemta-in a om mite kiangah lai ka hong khak hi.

Zefaniah 3:10

A gamlapi Ethiopia gam pekah a om, a kithehthang ka mite nangawn in biakna hong puak ding uh hi.

Isaiah 11:12

Amah in minamte adingin lim khat koih dinga, Israel mi a kihawl khiate kaikhawmin, leitung kiu li panin Judah mi a kikhenthangte kaikhawm ding hi.

Johan 12:20

Pawi hun sungin Pasian bia dingin Jerusalem khua ah a hong pai mite lakah Grik mi pawl khat a om uh hi.

2 TIMOTI NIHNA 1:11

Hih a thak Lungdamna Thu hilhin a taangko ding le sawltak na a sem dingin kei a hong kikoih ahi hi.

1 TIMOTI MASA 2:7

Hih ka gen thu pen zuau ahi lo, thu taktak a gen ka hi a, Gentail mite lakah upna thu le hih thuman a gen dingin sawltak na semin thu a hilh dingin kei a hong kisawl ahi hi.

Kolose 1:27

Pasian in mi khempeuh adingin a koihcing hih a thupi a deihhuai a thusim pen ama mite tungah pholak ding a sawm ahi hi. Tua thusim in: Khris tawh a kipawlte in Pasian tawh minthanna ngahkhawm ding hi, cihna ahi hi.

Efesa 3:8

Pasianʼ mi khempeuh lakah kei a neu pen hi napi-in, Khris hangin a kigen zo lo thu manpha ahi Lungdamna Thu, Gentail mite lakah a gen ding,

Sawltak 22:21

Tua ciangin Topa in kei kiangah, ‘Gentail mite omna gamlapi ah hong sawl ding ka hih manin pai peuh in,’ hong ci hi,” a ci hi.

Sawltak 21:21

Gentail mite lak a om Jew mi khempeuh tungah na thuhilhna, amaute in Moses thukham zui loin, Jew ngeina zui nawn loin, a tate uh zong vun a at loh nadingun na thugente khempeuh, hih lai-a om Jew mite tungah kigen hi.

Sawltak 11:18

Amaute in hih thu a zak uh ciangin mawhsakna thu gen nawn lo uh a, “Gentail mite zong kisikin a nuntak theih nadingun Pasian in hunhoih pia hi,” ci-in Pasian a phat uh hi.

Johan 8:22

Tua ahih manin Jew mi uliante in, “‘Ka paina ah note na hong pai thei kei ding uh hi,’ ci ahih manin a mahmah kithattawm ding a cihna hi ding hiam?” a ci uh hi.

Luka 2:32

Gentail mite in khuavak a muh nading le nangma mi Israel-te a minthan nadingin na vaihawm hi,” a ci hi.

Mattiu 12:21

Gentail mite in amah bek mah lametin nei ding uh hi,” ci hi.

Isaiah 49:6

Amah in, “Jakob minamte a laam to ding le a suakta lai Israel mite a ngei uh a bangsakkik dingin keima nasem na hihna pen a baih lua mahmah nasep ahi hi. Keima hotkhiatna in leimong dong a phak theih nadingin minam dangte tungah khuavak ahi dingin nang kong pia ding hi,” hong ci hi.

Isaiah 11:10

Tua ni ciangin Jessiʼ zung pen mihingteʼ tungah lim khat hi ding hi. Minamte in amah zong ding uh a, ama omna mun minthang mahmah ding hi.

Late 147:2

Topa in Jerusalem khuapi lam a, amah in a kinil khia Israel-te a kaikhawm hi.

Isaiah 56:8

Israel a kikhenthangte a kaikhawm Topa Pasian in, a kikaikhawm sa mite banah midangte keima kiangah ka kaikhawm lai ding hi, ci hi,” a ci hi.

Johan 7:1

Tua khit ciangin Galilee gam sungah Jesu zin kawikawi hi. Jerusalem khua-a om Jew mi uliante in amah that nuam uh ahih manin Judea gam sungah zin nuam nawn lo hi.

Sawltak 11:20

Ahi zongin Saipras gam mi le Sairin khuami thu um mi pawl khatte Antiok khua ah pai uh a, Topa Jesu hanga Lungdamna Thu, Gentail mite kiangah zong a gen uh hi.

Sawltak 14:1

Ikonium khua a tun uh ciangin Paul le Barnabas zong Jew mite kikhopna inn ah pai uh a, amauteʼ thuhilhna hangin Jew mi le Gentail mi tampi tak in Pasian thu um uh hi.

Sawltak 17:4

Mi pawl khat in a thugen uh man sa uh ahih manin Paul le Silas pawlpih uh a, tua mah bangin Pasian a bia mi tampi tak le ulianteʼ zi tampi mah in zong a pawlpih uh hi.

Sawltak 18:4

Sabbath nisimin kikhopna inn ah limtakin thu gen a, Jew mi le Grik mite in thu a up nadingun a hanciam hi.

ROM (Romans) 1:16

Lungdamna Thu ka muang mahmah hi. Tua thu pen a masa-in Jew mi, tua zomin minam dangte, thu um mi khempeuh a hon khia zo Pasianʼ vangliatna ahi hi.