Johan 16:33 - Tedim Bible Revision 2017

³³ Keimah tawh na hong kipawlna uh hangin lungnopna na neih theih nadingun hih thu a hong gen ka hi hi. Leitung gimna na thuak ding uh hi. Ahi zongin keimah in leitung nate zo khinta ka hih manin lungnuamin om un,” a ci hi.

Tedim Bible

³³ Note in keima sungah nopna na neih nadingun hih thute kong genkhol hi. Note in leitungah gimna na thuak ding uh hi. Ahih hangin lunghimawh kei un, leitung ka zozo hi,” ci-in a gen hi.

Johan 16:33 Referans Kwoze

Johan 14:27

Note tungah keima neih bang lungnopna kong pia ding hi. Tua ka hong piak ding lungnopna pen leitung mite in a piak theih a kip lo lungnopnate pawl hi lo hi. Tua ahih manin lau kei unla, zong lungkham kei un.

1 JOHAN MASA 5:4

Pasianʼ ta ahite peuhmah in leitung nate zo uh a, i upna tawh leitung nate tungah a gualzo ihi hi.

2 THESALONIKA NIHNA 3:16

Eite tungah nopsakna a hong pia thei Topa in note tungah a tawntungin nopsakna hong pia henla, amah in note khempeuh hong ompih tahen.

1 JOHAN MASA 4:4

Ka it tate aw, note, Pasianʼ mite na hi uh a, tua bang kamsang kineihkhemte a zo khin na hi uh hi. Bang hang hiam cih leh leitung mite a panpih dawimangpa sangin note hong ompih Pasian vanglian zaw hi.

Filippi 4:7

Mihingte in a theih tel zawh loh Pasianʼ hong piak lungsim nopna in, Khris Jesu tawh na kipawlna uh hangin note hong lungnuamsak ding hi.

1 PETER MASA 5:9

Leitungah thu um dang khempeuh in zong noteʼ thuak mah bangin a thuak ahihna thu thei unla, na upna uh ah kipin Dawimangpa na nial un.

Johan 14:1

Tua ciangin Jesu in a nungzuite kiangah, “Note lunghimawh kei un. Pasian um unla, kei zong hong um un.

2 TIMOTI NIHNA 3:12

Khris Jesu tawh kipawlin Pasianʼ deihna bangin a nungta nuam khempeuh in bawlsiatna a thuak ding mah hi a,

Sawltak 14:22

Thu um mite a upna uh ah citakin a om nadingun hanthawnin tha pia uh a, “Pasianʼ Ukna sungah i om theih nadingin haksatna tampi thuak ding hi hang,” ci-in a hilh uh hi.

Mangmuhna 3:21

Keimah zong gualzo-in ka Paʼ tokhom ah ka tut khawm uh mah bangin a gualzote khempeuh zong kei tawh ka tokhom tungah hong tut khawm theih nadingun thu ka pia ding hi.

Hebru 11:25

Tomno sung mawhna sungah nuam takin om ding sangin Pasianʼ mite tawh gimna thuak khawm ding a ut zaw hi.

Mangmuhna 7:14

“Ka thei kei hi, topa aw. Nangmah in na thei zaw ding hi,” ka ci hi. Tua ciangin amah in keima kiangah, “Hih mite pen bawlsiatna lianpi thuakin a hong suakta mite ahi uh hi. Amaute in a puan uh sawp siangin Tuuno sisan tawh a paaksak uh ahi hi.

1 THESALONIKA MASA 3:7

Tua ahih manin sanggamte aw, noteʼ upna thu ka zak uh ciangin lungkham sinkhamna ka thuak laitakun ka tha uh hong hatsak hi.

Mangmuhna 12:11

I sanggamte in Tuuno sisan le thuman a genna uh tawh amah na zo uh a, a nuntakna nangawn uh na pia ngam uh hi.

Kolose 1:20

Pasian in a Tapa zangin na khempeuh ama kiangah a kaihkik ding a seh sa ahi hi. Tua ahih manin singlamteh tungah a Tapa a sihna hangin amah tawh kilemkik theih nading hong omsak ahih manin, leitung, vantung a om khempeuh ama kiangah a hong tunkik ahi hi.

2 KORIN NIHNA 1:3

Eiteʼ Topa Jesu Khrisʼ Pa ahi, hehpihna a nei Pa, i kisapna khempeuh ah a hong huh Pasian in thupha ngah tahen.

2 KORIN NIHNA 13:11

Sanggamte aw, tu-in mangpha na man un. Na om zia uh na kipuahpha-in ka hong thugente na zui unla, khatlekhat kithutuak kilem takin na om un. Itna le kilemna a pia thei Pasian in note hong ompih tahen.

1 THESALONIKA MASA 3:4

Bang hang hiam cih leh note tawh kong om khawm lai-un zong, na theih sa uh bangin tu-a na thuak bangte teekteek mah uh a thuak ding hi hang, ci-in ka hong gen kholh sa uh ahi hi.

Galati 6:14

Ahi zongin keimah in ahihleh, singlamteh tungah i Topa Jesu a sihna thu bek ka kisialh pih ding hi. Bang hang hiam cih leh singlamteh tungah ama sihna hangin kei adingin leitung thute misi bang a, kei zong, leitung thu ah misi mah ka bang hi.

2 KORIN NIHNA 7:4

Note hong muang mahmah in note hangin ka kisathei a, lungkhamna a tuamtuam ka tuah hangin lunghimawh loin ka lungnuam mahmah hi.

Sawltak 27:25

Tua ahih manin lawmte aw, kuamah lunghimawh kei un. Kei tungah hong gen bangin hong piangsak ding hi, ci-in Pasian ka muang hi.

Micah 5:5

Amah in lungnopna hong omsak ding hi. Assiria mite in i gam hong simin i galdalna teng hong suk ciangin, amaute a do dingin i makai hat pen teng i sawl ding hi.

Late 68:18

Topa nangmah Pasian tua munah na om theih nadingin a sangna ah kah to-in salte na paipih a, mihonte le mi lehdoteʼ tung nangawn panin piakkhong nate na ngah hi.

Galati 1:4

A siahuai tu hunsung panin eite a hong suahtaksak nadingin eiteʼ Pa Pasianʼ deihna tawh kizui-in i mawhna hangin tua Jesu Khris a mahmah a hong kipiatawm ahi hi.

Sawltak 9:31

Tua ahih manin Judea gam, Galilee gam le Samaria gam sunga om pawlpite in bawlsiatna thuak nawn loin nuam takin om uh a, Topa zahtakna tawh gamta uh ahih manin Kha Siangtho huhna tawh a mi khangin a kibehlap uh hi.

Johan 12:31

Tu-in leitung thukhen ding hun hong tung ta a, hih leitung a ukpa kilawn khia ding hi.

Luka 2:14

“Van a sang belna ah a om Pasianʼ min thang henla, ama pahtak leitung mite tungah nopna om tahen,” a ci uh hi.

Sawltak 27:22

Ahi zongin tu-in note lunghimawh kei un. Teembaw sia bek dinga, mihing a si kuamah om lo ding hi.

Luka 19:38

“Pasian in Topaʼ tangin a hong pai kumpipa, thupha pia tahen. Vantungah nopna om henla, Pasianʼ min thang tahen,” ci-in a awng uh hi.

Sawltak 23:11

Tua zanin Paul kiangah Topa hong dinga, “Hang takin om in. Hih Jerusalem khua sungah keima thu genin teci na pan mah bangin Rom khuapi ah zong keima thu genin teci na pang ding hi,” a ci hi.

Hebru 7:2

Abraham in a na ngah khempeuh sung panin Melkhizedek tungah sawm-ah-khat a pia hi. Melkhizedek min a khiatna in, “Thuman Kumpi,” a cihna hi phot a, tua banah Jerusalem khua kumpi zong hi lai ahih manin ama min pen, “Kilemna Kumpi,” cihna zong ahi hi.

Johan 16:11

hih leitung a ukpa pen thukhenna a thuak khin ahihna thu zong lak ding hi.

Mattiu 9:2

Mi pawl khat in khutlekhe zaw mi khat, a lupna pheek tawh hong pua-in Jesu kiang a hong tunpih uh hi. Jesu in amauteʼ upna a muh ciangin a cina mipa kiangah, “Ka ta aw, na lungsim kinuamsak in; na mawhna hong kimaisak khinta hi,” a ci hi.

2 KORIN NIHNA 2:14

Ahi zongin Pasian tungah lungdam mahmah nading thu a om hi. Khris tawh ka kipawlna hangun gualzawhna tawh Khris a paina khempeuh ah Pasian in kote hong zuisak hi. Mun khempeuh ah paknamtui a kizelh bangin Khris thutheihna a kizelsak dingin Pasian in kote hong zang hi.

2 KORIN NIHNA 4:7

Ahi zongin vangliatna taktak Pasian aʼ hi a, kote aʼ hi lo hi, ci-in a kilat nadingin kha tawh kisai na manpha a nei kote pen na kikoihna leibeel tawh a kibang bek ka hi uh hi.

2 KORIN NIHNA 6:4

Tua ahih manin ka sepna khempeuh uh ah Pasianʼ nasemte ka hihna uh ka kilangsak uh a, lungduai takin gimna, haksatna, lungkhamnate ka thuak uh hi.

1 JOHAN MASA 2:13

Pate aw, a kipat cil a kipanin a na om pa thei na hih manun lai a hong gelh ka hi hi. Tangvalte aw, Dawimangpa zo khin na hih manun lai a hong gelh ka hi hi. Tate aw, Pa Pasian thei taktak na hih manun lai a hong gelh ka hi hi.

Thukhente 3:2

Tua khang Israel mite in galdona a theih nading, nidangin galdona a thei ngei lo tua bang mite a hilh theih nading bek ahi hi.