Johan 11:25 - Tedim Bible Revision 2017

²⁵ Tua ciangin Jesu in, “Keimah in a si sa mite thosakin a hingsak thei pa ka hi hi. Kei hong um mi peuhmah a sih hangin nungta ding hi.

Tedim Bible

²⁵ Zeisu in, “Keimah in thawhkikna leh nuntakna ka hi hi. Kei hong umte in a sih hangin a nungtakik ding hi.

Johan 11:25 Referans Kwoze

1 THESALONIKA MASA 4:14

Jesu si-in thokik hi, ci-in i up mah bangin Pasian in Jesu hong paipihkik ciangin amah umin a si mite zong hong tonpih ding hi, ci-in i um hi.

Johan 3:36

Tua ahih manin Tapa a um mi peuhmah nungta tawntung dinga, Tapaʼ thu a mang lote in nuntak mu lo dinga, amaute tungah Pasian heh tawntung ding hi,” a ci hi.

Johan 1:4

Nuntakna a nei khempeuh in tua Thu tung panin a nuntakna uh ngah a, tua nuntakna in mi khempeuh tungah khuavak hong tunpih hi.

Johan 5:21

Pa in mi si sate nangawn thosakin a nuntaksak mah bangin Tapa in zong a ut peuhpeuh nungtasak thei hi.

Johan 6:44

Kei hong sawl Pa in a kaih loh mite ka kiangah hong pai thei lo dinga, ka kiangah hong pai mite nitawp ni ciangin ka hingsak ding hi.

Isaiah 26:19

Nangma mi a si sate hingkik ding uh a, amauʼ pumpi thokik ding hi. Han sungah a lum mite aw, tho-in lungdamin la sa un! Bang hang hiam cih leh zing daitui in leitung a nosakkik bangin sawtpi a a si sa mite Topa in hingkiksak ding hi.

ROM (Romans) 8:2

Bang hang hiam cih leh Khris Jesu tawh a hong kipawlsak Kha Siangtho in mawhna le sihna a piangsak thukham panin kei hong suaktasak khinta hi.

Johan 6:35

Tua ciangin Jesu in, “Kei pen nuntakna an ka hi hi. Ka kiangah hong paite gilkial ngei nawn lo dinga, kei hong umte dangtak ngei nawn lo ding hi.

Mangmuhna 21:4

Amauteʼ mit panin khitui khempeuh nulsak ding hi. Thu lui sate maimang khinta ahih manin sihna, dahna le na sa a kahna cihte om nawn lo ding hi,” a ci hi.

Filippi 3:10

Jesu Khris thei-in, ama thawhkik bangin thokikin, kei zong sihna panin hong hingsakkik ding hi, ci-in ka lametna hangin ama thuak bangin thuakin, sihna ah zong amah tawh ka kibat ding ka utpi pen ahi hi.

Mangmuhna 20:5

Kum tul khat a cin mateng a si dangte hingkik lo uh hi. Hih pen sihna panin thawhkikna a masa ahi hi.

Sawltak 3:15

Tua ahih ciangin mite tungah nuntakna a pia pa na that uh a, ahi zongin sihna panin Pasian in amah hingkiksak hi. Ko tegel pen hih thu a thei teci ka hi uh hi.

Johan 14:6

Jesu in ama kiangah, “Keimah in Lampi ka hi a, Thuman le Nuntakna zong ka hi hi. Kei hong suang loin Pa kiangah kuamah tung thei lo ding hi.

Johan 5:26

Pa in nuntakna a piak theih mah bangin Tapa in zong a piak theih nadingin Pa in a bawl hi.

Late 36:9

Bang hang hiam cih leh nuntakna tuinak nangmah tawh om a, na khuavak sungah kote in khuavak ka mu uh hi.

Mangmuhna 22:17

Kha Siangtho le Mothak in Jesu kiangah, “Hong pai in,” a ci uh hi. Hih thu a za mi khempeuh in zong Jesu aw, “Hong pai in,” ci ta uh hen. A dangtak mi khempeuh hong pai uh henla, a deih khempeuh in nuntakna tui a khongin hong la ta uh hen.

Johan 14:19

Tawl khat khit ciangin leitung mite in kei hong mu nawn lo ding uh hi. Ahi zongin kei ka nuntak mah bangin note zong nungta ding na hih manun note in kei na hong mu ding uh hi.

Isaiah 38:16

Topa aw, nang adingin kong nungta dinga, nang ading bekbekin kong nungta ding hi. Ka ci hong damsakkik inla, hong nungtasak in!

Filippi 1:23

Hih thu nih khensat hak ka sa mahmah hi. Kei adingin hoih zaw thampek ahih manin leitung pumpi si-in Khris tawh om khawm ding ka ut hi.

Mangmuhna 22:1

Tua ciangin vantungmi in Pasian le Tuuno tokhom panin a hong luang khia, kristal suangmanpha bangin a tee selsel gun tui hong lak a,

2 KORIN NIHNA 4:14

Topa Jesu a hingkiksak pa in Jesu mah tawh kote zong hong hingkiksak khawmin note tawh ama omna ah hong paipih khawm ding hi, ci-in ka thei uh hi.

ROM (Romans) 4:17

Lai Siangtho sungah zong, “Minam tampiteʼ pupi dingin kong bawl khin hi,” ci-in a kigelh hi. Tua hi a, bangmah a om nai lopi a thupiakna tawh a omsak thei, a site a hingsak thei, Abraham in a up Pasianʼ muhna ah hih thuciamna kipin a kizang ahi hi.

Luka 23:43

Jesu in ama kiangah, “A mantakin keʼn kong cih in ah: Tu ni-in Paradais ah kei tawh na om khawm ding hi,” a ci hi.

1 KORIN MASA 15:29

Tua ciangin thu khat ah, a si sa miteʼ tang dingin tui a kiphum mite in bang a deihna uh ahi hiam? Misite kihingkiksak het lo ding ahihleh bang hangin a si sateʼ tang dingin tui kiphum ahi uh hiam?

1 KORIN MASA 15:18

Khris thu a um, a si sa mite zong a mawkna mah hi lai ding hi.

Johan 3:16

Pasian in leitung mite hong it mahmah ahih manin ama Tapa a um mi khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi.

Mangmuhna 1:18

a nungta mipa zong ka hi hi. Kei ka si ngei hi. Ahi zongin tu-in hong en in, a nungta tawntung ka hi hi. Sihna le misite omna gam keima khutnuai ahi uh hi.