Johan 10:28 - Tedim Bible Revision 2017

²⁸ Tua ahih manin amaute tungah nuntak tawntungna pia ka hih manin si ngei nawn lo ding uh a, keima khut sung panin kuamah in amaute hong sut zo lo ding uh hi.

Tedim Bible

²⁸ Keimah in amaute nuntak tawntungna ka pia a, cikmah ciangin a kisia kei ding uh hi. Kuamah in ka tuute ka khut sung pan hong sut zo kei ding hi.

Johan 10:28 Referans Kwoze

Johan 6:37

Ka Pa in kei tungah a hong piak mi peuhmah ka kiangah hong pai dinga, ka kiangah a hong pai mi peuhmah ka hawl khia kei ding hi.

Hebru 7:25

Tua hi a, mite adingin a thumsak thei dingin amah nungta tawntung ahih manin ama tungtawnin Pasian kiang a zuante khempeuh, tu a kipanin a tawntungin a hon khia thei ahi hi.

ROM (Romans) 8:29

Pasianʼ Tapa mi khempeuh lakah a upa pen a suah theih nadingin Pasian in a teel kholh sa mite, a Tapa tawh a kibang dingin a seh sa ahi hi.

Johan 18:9

Hih bang a cihna pen, “Kei na hong piak sate khat zong ka kisamsak kei hi,” ci-in a thugenna a tun nading ahi hi.

Filippi 1:6

Note sungah hih nasep hoih a hong pan khia Pasian in Jesu Khris hong paikik hun ciang dong, mi cingtaak na hih nadingun hong huh ding hi, ci-in teltakin ka thei hi.

Isaiah 54:17

Nangmah do nadingin a kibawl hiam peuhmah maavang lo dinga, thukhenna sungah na langah a pang mi khempeuh na nial gawp zo ding hi. Hih thu pen Topa’ nasemteʼ gamhluah le keima kiang panin amauteʼ dikna a kilahna ahi hi, Topa in ci hi,” a ci hi.

1 JOHAN MASA 2:25

Khris in eite tungah piak dingin a hong ciam sa thu pen hih nuntak tawntungna ahi hi.

Johan 4:14

ahi zongin keima piak ding tui a dawn khempeuh dangtakkik nawn lo ding uh hi. Tua ka piak tui a dawnte sungah nuntakna tuinak piang dinga, a nungtasak paisuak ding hi,” a ci hi.

ROM (Romans) 8:1

Ahi zongin tu-in ahihleh Khris Jesu tawh kipawlin a nungta mite pen mawhna thukhenna tawh kipelh hi.

Juda 1:24

Ama minthanna mai ah paubaanna om het loin lungdam takin a hong paipih theih nadingin note na puk khak nading panun a hong kem,

Johan 17:2

Bang hang hiam cih leh Tapa tungah na piak mi khempeuh tungah Tapa in nuntak tawntungna a piak theih nadingin mi khempeuh tungah ukna aana a neih nadingin Tapa tungah na hong piak sa ahi hi.

Johan 5:24

“A mantakin kong genin ah: Ka thugennate za-in kei hong sawl pa a um khempeuh a nungta paisuak ding hi ta hi. Mawhsak thukhenna ngah nawn loin, sihna panin a hingkik ta ahi hi.

1 JOHAN MASA 2:19

Khrisʼ gal ahi hih mite pen eiʼ pawl hi ngei napi-in hong taisan uh hi. Eiʼ pawl taktak hileh eite tawh om khawm paisuak ding uh ahih manin, tu-in amaute paikhia uh ahih ciangin eiʼ pawl taktak ahih lohna uh hong kilang hi.

1 JOHAN MASA 5:11

Tu-in Pasianʼ teci panna in: Pasian in ama Tapa tungtawnin eite tungah nuntak tawntungna a hong pia hi.

Juda 1:21

I Topa Jesu Khris in a hong hehpihna tawh nuntak tawntungna hong piak ding na ngakkawmun Pasianʼ itna sungah na kip un.

1 PETER MASA 1:5

Noteʼ upna hangin nitawp ni ciangin na ngah ding uh hotkhiatna nomau-aʼ ahihna a kilatsak nadingin Pasian in ama vangliatna tawh a hong kepsak ahi hi.

Late 37:28

Bang hang hiam cih leh Topa in thutang deih a, ama mi siangthote nusia lo ding hi. Thuman mite kikemcing den dinga, ahi zongin migiloʼ suanlekhakte kipuaseh ding hi.

Thu-hilhkikna 33:3

Hi taktak hi; amah in a mite it a, ama tungah a ki-ap mi khempeuh a khut sungah om hi. Tua ahih ciangin amaute in na kalsuanna hong zui uh a, nang tung panin lamlahna ngah uh hi.

Isaiah 45:17

Ahih hangin Topa in Israel-te hon khia hi. A tawntungin gualzo ding uh a, cikmah hunin maizumna thuak ngei lo ding uh hi,” a ci hi.

Johan 11:25

Tua ciangin Jesu in, “Keimah in a si sa mite thosakin a hingsak thei pa ka hi hi. Kei hong um mi peuhmah a sih hangin nungta ding hi.

Jeremiah 31:3

gamlapi pek panin Topa ka kilang hi. Keimah in nang kong it tawntung a, tua ahih manin nangʼ tungah kong thuman tawntung hi.

Juda 1:1

Jesu Khrisʼ sila ka hih banah Jamesʼ nau keimah Jude in: Pasianʼ sapna hangin Jesu Khris kepna sungah Pasian itna tawh a om mite tungah lai ka hong khak hi.

Paunak 24:16

Mihoihte sagih vei dong a puk hangin tho kikkik thei a, migilote ahihleh tuahsiatna thuakin kithallot hi.

2 THESALONIKA NIHNA 2:13

Ahi zongin sanggamte aw, Topa in note hong it a, Kha Siangtho vangliatna hang le note in thuman na upna uh hangin ama mi siangthote na suah nadingun nopsakna a ngah masa dingin Pasian in note hong teel ahih manin note hangin Pasian tungah lungdamna ka ko tawntung uh hi.

Johan 3:36

Tua ahih manin Tapa a um mi peuhmah nungta tawntung dinga, Tapaʼ thu a mang lote in nuntak mu lo dinga, amaute tungah Pasian heh tawntung ding hi,” a ci hi.

2 TIMOTI NIHNA 1:12

Tua ahih manin hih bang teng a thuak ka hi hi. Ahi zongin ka up pa ka thei a, ama tungah ka apte tua Ni dong hong kepsak zo ding hi, ci-in thei ka hih manin ka maizum het kei hi.

ROM (Romans) 5:21

Tua ahih manin mawhna thahatin hong sihsak mah bangin, i Topa Jesu Khris hangin Pasianʼ hehpihna thahat zaw lai a, mihoihin hong sangin nuntak tawntungna sung a hong tunpih hi.

JOB (Job) 17:9

Miteʼ zahtak a a kinei mite in amauʼ ngaihsutna uh man mahmah sa semsem uh hi.

1 TIMOTI MASA 1:16

A mawhnei pha bel ka hihna thu hang mahin, nidang ciangin amah umin nuntak tawntungna a ngah ding miteʼ etteh theih dingin Khris Jesu in a lungduaina cing takin kei tungah hong lah theih nadingin Pasian in kei a hong hehpih ahi hi.

ROM (Romans) 6:23

Bang hang hiam cih leh mawhna in thaman hong piak pen sihna hi a, ahi zongin i Topa Jesu tawh i kipawl manin Pasianʼ hong piakkhong pen nuntak tawntungna ahi hi.

ROM (Romans) 5:17

Mi khat bekʼ mawhna hangin sihna in hong uk ahihleh mi khat mah ahi Jesu Khris hangin nakpi takin a lian Pasianʼ hehpihna le mi hoih a sanna a ngah mite nungta-in thahat zaw kan ding uh hi.

ROM (Romans) 5:2

Ama hangin upna tawh tu-a i omna Pasian hehpihna sungah a tung ihi a, Pasian tawh minthanna ngahkhawm ding, ci-in lamen ihih manin i lung a dam hi.

Sawltak 7:59

Tua bangin suang a khiat thuahthuah laitakun Stefen in thu ngen a, “Topa Jesu aw, ka kha hong la in,” a ci hi.

Johan 14:19

Tawl khat khit ciangin leitung mite in kei hong mu nawn lo ding uh hi. Ahi zongin kei ka nuntak mah bangin note zong nungta ding na hih manun note in kei na hong mu ding uh hi.

Johan 6:47

A mantakin kong genin ah, kei hong umte bek in nuntak tawntungna ngah hi.

Johan 6:27

A ning thei ante ngaihsutin nei masa kei unla, nuntak tawntungna an kan masa zaw un. Pa Pasian in tua an a pia dingin kei hong seh sa ahih manin keimah in note tungah nuntak tawntungna an kong pia ding hi,” ci-in a dawng hi.

Jeremiah 32:40

Amaute tungah a tawntungin hoihna ka bawl den nadingin amaute tawh tawntung thuciamna khat ka bawl ding hi. Kei kiang panin a kiheikhiat loh nadingun amaute sungah kei hong zahtak nading uh lungsim ka guan ding hi.

1 SAMUEL MASA 2:9

“Amah in a thuman miteʼ kalsuanna limtakin cing a, ahih hangin migilote khua mialna sungah kikhia suk ding hi. Bang hang hiam cih leh thatang hatna tawh mi gualzo lo ding hi.

ROM (Romans) 5:9

Ama sihna hangin tu-in Pasian tawh kipawl thei ihih manin Pasianʼ hehna hangin gimna panin zong hong suaktasak zaw kan lai ding hi.

Johan 6:68

Simon Peter in, “Topa aw, ciah le ung kua kiang zuan mawk ding ka hi uh hiam? Nangmah in nuntak tawntung nading thu na nei hi.

Luka 23:46

Tua ciangin nakpi takin Jesu kiko a, “Pa aw, nangma khut sungah keimah kong ki-ap hi,” a cih khit ciangin a si ta hi.

Jeremiah 31:34

Kuamah in midangte le a sanggamte uh kiangah, ‘Topa thei in,’ ci-in a kihilh nawn kei ding uh hi; bang hang hiam cih leh Topa in kong cih in ah, amaute in a neu pen panin a lian pen dongin, a vekpi-un kei a hong thei ding uh hi. Bang hang hiam cih leh amauʼ khialhnate ka maisak dinga, amauteʼ mawhnate zong phawkin ka nei nawn kei ding hi,” a ci hi.

Paunak 4:18

Ahi zongin thuman miteʼ zuih lampi ahihleh sun dong a taang pha semsem zingsang khuavak tung tawh kibang hi.

Late 31:5

Nangma khut sungah keimah kong ki-ap hi. Topa, a thuman Pasian aw, keimah na hong hon ding hi.

Marka 13:22

Bang hang hiam cih leh Khris kineihkhemte le kamsang kineihkhemte hong piang dinga, ahih zawh leh a teel sa mite nangawn a khem nadingun lim le nalamdangte hong bawl ding uh hi.

Isaiah 55:3

Ka mite aw, ka thu ngai unla, kei kiangah hong pai un. Na nuntak theih nadingun a thu hong za un. David ka it mah bangin keima itna kip, tawntung thuciamna note tawh ka bawl ding hi.

Isaiah 27:3

Keimah, Topa, tua lo a hong pa ka hi a, a hunhunin tui ka buak hi. Khatpeuh in a suksiat loh nadingin sun le zanin ka hong ding hi.

Jeremiah 23:4

Amaute a don ding makaite ka koih dinga, lau nawn lo, lungkham nawn loin khat beek a mangthang nawn kei ding uh hi, Topa in kong ci hi.

Johan 10:29

Ka khut sungah a hong pia ka Pa sangin a lian zaw kuamah om lo ahih manin ka Paʼ khut sung panin kuamah in la khia zo lo ding hi.

1 JOHAN MASA 1:2

Hih nuntakna pen a kimu thei a hong suah ciangin kote mahmah in ka mu uh hi. Tua ahih manin kote tungah a hong kilak, Pa Pasian tawh a om khawm tua nuntak tawntungna pen gen belin nei-in, note tungah zong a hong gen ka hi uh hi.