Jeremiah 9:2 - Tedim Bible Revision 2017

² Sehnel gamlak ah khawl nading bukno khat nei thei-in ka mite nusia-in a taisan thei hi leng ka ut hi. A vekpi-un angkawm hat hi khin uh a, thuman lo kim uh hi.

Tedim Bible

² Sehnel gamlakah khawl nading bukno khat nei thei-in ka mite nusia-in taisan thei hi leng maw! A vekpi-un angkawm hat hi khin uh a, thuman lo kim uh hi.

Jeremiah 9:2 Referans Kwoze

Jeremiah 23:10

Bang hang hiam cih leh mun khempeuh ah angkawmte a dim hi. Topaʼ hamsiatna hangin gam sung tengah kahna dim a, gamlak lo nona munte a keu mang hi. Amaute gamtat sia uh a, a vangliatna uh a man lopi-in a zang uh hi.

Hosea 4:2

Mite in thuciamna bawl napi-in a thuciamte uh palsat uh hi. Zuau genin, mi thatin, guta-in, nulepa mawhna bawl uh hi. A sia khat khit a sia khat a banbanin gamta-in a mawhna uh beh laplap uh hi.

Hosea 7:4

Amaute zuautatin citak lo uh hi. Amaute pen, moh bawl pa in a anlom meek a pawm mateng, moh emna meikhuk sunga a tawh sa, mut loh seem lohin a koih phot mei tawh kibang uh hi.

Jeremiah 12:6

Bang hang hiam cih leh na sanggamte le na innkuanpihte nangawn in nang hong zuak uh a, nang a hong do ding mihonpi a kaikhawm uh hi. Kam khum tawh nang a hong zol uh hangin um kei in,” ci-in hong dawngkik hi.

Jeremiah 12:1

Topa aw, nang tawh thu i kiseel ciangin nang a tawntungin na man den hi. Ahih hangin thu khat ka hong dong nuam lai hi. Bang hangin migilote daupai uh a, mi khem hatte gualzo sese ahi uh hiam?

Jeim 4:4

A citak lo mite aw, leitung tawh kipawlna pen Pasian tawh kigal neihna ahih lamtak thei lo na hi uh hiam? Leitung tawh a kipawl mite pen Pasian tawh a kigal neih dingin a kibawlbawl ahi uh hi.

Malakhi 2:11

Judah mite citak loin, Pasian tungah a thuciamna uh palsat uh a, Israel miteʼ lak le Jerusalem khua sungah siatna tampi gamta uh hi. Topa in a it mahmah biakinn ninsak uh hi. Topa ahi lo, pasian dang a bia numeite, zi-in la-in a teenpih uh hi.

Zefaniah 3:4

A kamsangte kihisak uh a, kamsang citak hi lo uh hi. A siampite in a siangtho nate ninsak uh a, amau angsung ding bek a khualna-un Pasianʼ thukham leh hei uh hi.

Hosea 6:7

Ahi zongin ka ciamna gam a tun uh ciangin amaute in Adam khua ah ka thuciamna palsat uh a, kei tungah hong thuman lo uh hi.

Hosea 5:7

Topaʼ tungah amaute citak lo uh a, midangte tawh zawlta nei uh hi. Tu-in amaute le a neihsa khempeuh uh kisusia ding hi.

Jeremiah 5:11

Israel minamte le Judah minamte, Topa in ka cih in ah, keiʼ tungah hong thuman nawn het lo uh hi.

Jeremiah 13:22

Bang hangin hih thute kei tungah hong tung ahi hiam, ci-in na ngaihsut leh na mawhna a liatluatna hang ahi hi. Tua thu hangin na nik hong kihawk gawp a, a hong kibuan gawp ahi hi.

Micah 6:12

Na mihaute uh mizawngte tungah tatsia mahmah in, na khua sung mi khempeuh uh zuaugen vive ahi uh a, a kam un khemna thu bekbek gen hi.

Malakhi 2:14

Bang hangin hong sang lo hiam, na ci uh hi. Na khangno lai uh a na teenpih na zite uh tungah na cihtak lohna uh amah in hong thei a, na zite uh tungah na cihtak tawntungna ding uh Pasian tungah thu ciamin, na zite uh zong na lawmnu mah uh hi napi-in amaute tawh na thuciamna uh na pelhna hang uh ahi hi.

Thukhente 2:10

Tua ciangin tua khang mite khempeuh zong si khin uh a, amauteʼ khit ciangin Topa hitaleh, Israel-te adingin a septe hitaleh a thei lo khangthak hong piang uh hi.

Isaiah 59:3

Bang hang hiam cih leh na khutte uh mi thahna sisan tawh nin a, na khutmete uh mawhna tawh a nin hi. Na mukte un zuau thu gen a, na leiite un gitlohna thu a gen hi.

Jeremiah 4:22

Topa in, “Ka mite hai uh a, kei hong thei lo uh hi. Naupang haite bang uh a, bangmah thei lo uh hi. A sia bawl ding lamsang siam bek uh hi. A hoih bangmah bawl thei lo uh hi,” a ci hi.

Jeremiah 5:1

Jerusalem khua sungah kileh kawikawi un. Khuadak unla en dih un! A thuman gamtat leh thuman a zong mi khat beek na mu uh hiam, zong dih un. Na muh uh leh tua khuaʼ mawhna ka maisak ding hi.

Jeremiah 5:2

“Topa a nuntak bangin,” ci-in a kiciam uh hangin a zuaupi uh ahi hi.