Jeremiah 8:2 - Tedim Bible Revision 2017

² Amaute in a it uh, a na a sepsak uh, a delh uh, a zon uh le a biak uh ahi ni le kha le van a om nate khempeuh mai ah a kipho khia ding hi. Tua guhte kikhawm nawn lo dinga, kiphum nawn lo ding hi. Leilak a ek kinusia bang ahi lel ding hi.

Tedim Bible

² amaute in a it uh, a na a sepsak uh, a delh uh, a zon’ uh leh a biak uh ahi ni leh kha leh van-a om nate khempeuh’ mai-ah a kipho khia ding hi. Tua guhte kikhawm nawn loin a kiphum nawn kei ding a, lei laka ek kinusia bang ahi lel ding hi.

Jeremiah 8:2 Referans Kwoze

2 KUMPI NIHNATE 23:5

Tua ciangin amah in Judah khuapite le Jerusalem kiim a om mual tunga biaknate tungah paknamtui hal dingin Judah kumpite in a kipsak sa milim biateʼ siampite a hawl khia hi. Baal tung, ni tung, kha tung, aksi honpite tung le vantung a om nate khempeuh tungah paknamtui a halte zong a hawl khia hi.

Sawltak 7:42

Tua ahih manin kamsangte laibu sungah, ‘Israel mite aw, gamlak ah kum sawm li sung, gan go-in biakna na piakte uh kei tunga nong piak uh hi lo hi. Note in na puak uh puanbuk pen Molok pasian milim puanbuk le noteʼ aksi pasian Refanʼ puanbuk ahi hi. Tuate pen na biak dingun noteʼ bawl tawm milim ahih manin Babylon khuapi khen pekah salin ka hong paisak ding hi,’ ci-in a kigelh mah bangin Pasian in amaute nungngat a, van a om aksite a bia dingin amaute a sawl khia hi.

Jeremiah 9:22

Gamlak a ki-tha ek bangin misi luang kipaithang dinga, buhlom at sa kinusia bangin kuamah in a khawm kei ding hi, ci-in a gen dingin Topa in kei hong sawl hi,” ka ci hi.

Thu-hilhkikna 4:19

Note in na mit uh tawh vantung lam en to-in, ni le kha le aksite, vantung na khempeuh na muh uh ciangin, mun khempeuh a miteʼ tungah Topa na Pasian un a piak nateʼ lamah kihei-in tuate bia-in a na na sep khak loh nading uh kidawm un.

Zefaniah 1:5

Innkhum zang ah kah to-in, ni, kha le aksi a bia mi khempeuh ka susia dinga, keimah hong bia-in, keima tungah thuman ding gen napi-in, Milkom pasianʼ min tawh a kiciam teiteite zong, ka susia ding hi.

Ezekiel 8:16

Tua ciangin biakinn tual sung nungah hong paipih hi. Tua lai ah biakinn kongkhak gei, biakna taute le innliim kikal sanah mihing sawm nih le nga khawng na om a, biakna tau nungngatin nisuahna lam nga-in nisuak tung na bia uh hi.

Jeremiah 36:30

Tua ahih ciangin Judah kumpipa Jehoiakimʼ thu tawh kisai-in Topa in kong genin ah, amah in David tokhom tunga tu ding suanlekhak a nei kei dinga, ama luanghawm pen sun laitakin nisaʼ kap ding le zan laitakin vukngoʼ tuam dingin kipaidak ding hi.

Jeremiah 22:19

La si a kiphum bang lelin amah kivui dinga, Jerusalem kongpi pua lamah kikaitalin kipaai ding hi,” a ci hi.

Jeremiah 19:13

Jerusalem khua-a innte le Judah kumpiteʼ innte a kipan, innkhum zang ah vantung a aksite khempeuh tungah paknamtui hal biakna a kipiakna innte le pasian dangte tungah dawn ding biakna a kibuakna innte khempeuh a vekin Tofeth mun bangin a nin a suak ding hi, ci hi, va ci in,” hong ci hi.

Jeremiah 16:4

Natna lian tawh si ding uh a, kuamah in kah loin kuamah in zong a vui kei ding uh hi. Leilak a ek ki-tha a bang lel ding uh hi. Namsau le kial tawh a si ding uh a, a luanghawmte uh huihlak a leeng vasate le leilak a ganhingte in a ne ding uh hi.

2 KUMPI NIHNATE 21:3

Bang hang hiam cih leh amah in a pa Hezekiahʼ suksiat sa mual tunga biaknate lamkik hi. Tua ciangin amah in Baal adingin biakna taute phut a, Israel kumpi Ahabʼ bawl bangin Asherah milim khat bawl a, vantung a om nate khempeuh bia-in tuateʼ na a sem hi.

Zefaniah 1:17

Topa in hih bangin thu gen a, “Mihingte tungah lungkhamna lianpi ka tungsak dinga, amaute in mittaw bangin khua a zawt ding uh hi. Keima tungah amaute hong khial uh ahih manin, a sisan uh tui bangin kithehthang dinga, a luanghawm uh leilak ah muatcip ding hi,” a ci hi.

Thuhilh-sia 6:3

Mi khat in ta za khat nei-in kum saupi zong nungta thei kha ding hi. Bangzahin sau veipi a nungta ahi zongin leitungah nopsakna ngah loin, limtak a vuina a ngah kei leh, a sisa-a suak naungek hoih zaw lai hi.

2 KUMPI NIHNATE 21:5

Tua ciangin amah in Topaʼ biakinn tual nihte tungah vantung a om nate khempeuh adingin biakna taute a lam hi.

2 KUMPI NIHNATE 17:16

Amaute in Topa a Pasian uh thupiakte khempeuh nusia-in amau adingin a kisung bawng no lim nih bawl uh hi. Amaute in Asherah milim khat bawl uh a, vantung a om nate khempeuh bia-in Baal milim na sem uh hi.

Thu-hilhkikna 17:3

pasian dangteʼ na semin tuate bia ahi zongin, keimah in ka kham ahi ni ahi a, kha ahi a, vantung na khat peuhpeuhteʼ na semin bia ahi zongin,

Late 53:5

Cikmahin tua bang launa a omngei lo, launa lianpi sungah amaute om uh hi. Bang hang hiam cih leh Pasian in migiloteʼ guhte thehthang ding hi. Pasian in amaute nial ahih manin, amaute maizumin kikoih ding hi.

Jeremiah 14:16

A hilh uh mite in zong kial le namsau thuakin amaute a kipan a zite uh, a tapate uh le a tanute uh Jerusalem khua kongzing lakah kipaithang dinga, kuamah in a vui kei ding hi. Bang hang hiam cih leh amauʼ gitlohna amauʼ tung mahah ka buak suk ding hi,” hong ci hi.

Jeremiah 16:11

Tua ciangin nangmah in amaute kiangah, ‘Topa in, “Na pu na pate un kei hong taisan khin uh a, kei hong nusia-in ka thukham a zui kei uh hi.

Jeremiah 31:40

Misi luanghawmte le vutte a kibuakna kuam buppi le Kidron lui phak ma-a loteng khempeuh tawh, tua panin nisuahna lam a Sakol Kongpi kiu ciang dong, Topa adingin mun siangtho a suak ding hi. Cikmah ciangin tua khuapi kisusia nawn lo dinga, a kisuan khia ngei nawn kei ding hi,” a ci hi.

Ezekiel 6:5

Israel misi luanghawmte ka thehthang gawp dinga, a guhte uh biakna tau kiimah ka lawnthang gawp ding hi.

Ezekiel 29:5

Nang le na ngasa khempeuh gamlak ah kong paai ding hi. Leilak ah na pumpi kiphah dinga, phum lohin hong kikoih ding hi. Ganhingte le vasateʼ an dingin nang kong pia ding hi.

Late 83:11

“Pasianʼ gam hoihte eima tan dingin la ni,” a ci Oreb le Zeeb te bangin amauʼ mi liante bawl inla, Zeba le Zalmunna te bangin amau a ukte khempeuh bawl in.

Jeremiah 9:20

Tua ciangin keimah in, “No numeite aw, Topaʼ kammal ngai dih un. A kam pan a hong ging khia thu na bil uh ah lutsak un. Na tanute uh a kah dan ding hilh unla, na inn veengte ciat uh kah la hilh un.

Jeremiah 9:21

Bang hang hiam cih leh tawlet vang panin sihna hong lut a, kumpipaʼ inn sungah zong sihna hong lut hi. Kongzing a naupangte vat mang a, sumbuk a tangvalte vatlum hi.

Jeremiah 16:6

Hih gamah mi liante le mi neute si ding uh a, kivui loin, amauʼ hangin kuamah kap loin, kuamah in a pumpi uh kui liam loin a sam uh zong a met kei ding uh hi.

Jeremiah 25:33

“Tua ni-a Topaʼ thah lup miteʼ luanghawmte leimong khat panin mong khat dongah a kithehthang ding uh hi. Amaute kuamah in a kah kei ding uh a, kikaikhawm loin, kiphum lo ding uh ahih manin leilak ah ek nusiatin a kinusia ding uh hi.

Ezekiel 39:5

Topa Pasian in hih thu gen khin ka hih manin gamlak ah na tuk zeizai ding uh hi.