Jeremiah 8:14 - Tedim Bible Revision 2017

¹⁴ “Tua ciangin mite in, ‘Bang hangin tutu lai ihi hiam? Kikaikhawm unla khuapi muanhuaite va beel ni; tua lai ah va si ni. Bang hang hiam cih leh Topaʼ tungah i mawh manin Topa i Pasian in eite a si dingin hong seh khinzo a, i dawn dingin gu tui hong pia khinzo hi.

Tedim Bible

¹⁴ “Tua ciangin mite in, ‘Bang hangin tutu lai i hi hiam? Kikai khawm un la, khuapi muanhuaite va beel ni, tua laiah va si ni; bang hang hiam cih leh Topa tungah i mawh manin Topa i Pasian in eite a si dingin hong koih khin zo hi, i dawn dingin gutui hong piakhin zo hi.

Jeremiah 8:14 Referans Kwoze

Jeremiah 23:15

“Tua ahih manin tua kamsangte tawh kisai-in Vanglian Topa in kong genin ah: En un, keimah in gamsaai teh tawh amaute ka vak dinga, gu kisawh tui amaute ka dawnsak ding hi. Bang hang hiam cih leh Jerusalem khua-a om kamsangteʼ kiang panin gam sung mun khempeuh ah Pasian zahtak lohna hong kizel hi,” a ci hi.

Jeremiah 9:15

Tua ahih manin Vanglian Topa, Israel miteʼ Pasian in kong cih in ah: En in, hih mite gamsaai-in ka vak dinga, gu tui ka dawnsak ding hi.

Kah la 3:19

Gimna ka thuaknate le inn le lo nei loin ka omna pen gu-kha bang hi a,

Jeremiah 35:11

Ahih hangin Babylon kumpipa Nebukhadnezzar in hih gam hong sim ciangin kote in, ‘Hong pai un. Khaldea galkapte le Syria galkapte kihta ihih manin Jerusalem khua ah pai ni,’ ka kici uh a, tua mah bangin tu-in Jerusalem khua ah ka teng uh hi,” a hong ci uh hi.

Mattiu 27:34

zatui kha tawh a kihel leenggahzu a dawn dingin a pia uh hi. Ahi zongin Jesu in a ciap khit ciangin a dawn nuam kei hi.

Late 69:21

Amaute in an dingin gu hong pia uh a, ka dangtakna ah dawn dingin tui thuk hong pia uh hi.

2 SAMUEL NIHNA 20:6

Tua ciangin David in Abishai kiangah, “Tu-in Bikhriʼ tapa Sheba in Absalom sangin eite tungah siatna tam zaw hong bawl ding hi. Na topaʼ nasemte la inla, amah delh in. Tua hikeileh amah in ama adingin khuapi muanhuaite ngahin eite tungah buaina hong piangsak ding hi,” a ci hi.

Thu-hilhkikna 29:18

Note lakah numei ahi a, pasal ahi a, innkuan ahi a, minam khat ahi zongin, tua minamteʼ pasian a bia dingin Topa i Pasian kiang panin tu ni-in a lungsim a hei khia a om khak ding kidawm un. Tua hikeileh note lakah gu a nei gah kha a gah singkung hong bang dinga, hih kiciamna kammalte za napi-in a lungsim ah amah thupha kipia tawmin, ‘Ka lungsim khauhna tawh ka gamta zongin ka suakta veve ding hi,’ a ci hong om kha ding hi. Hih in mihoih le misia, a kibangin phiat khiatna hong suaksak ding hi.

Zekhariah 2:13

Mi khempeuh aw, Topaʼ mai ah gamdai-in om un. Bang hang hiam cih leh a siangtho ama omna mun panin amah hong paikhia ta hi.

Habakkuk 2:20

Topa, a biakinn siangtho sungah om hi; leitung mi khempeuh ama mai ah dai dide-in om ta uh hen.

Amos 6:10

Mi khatpeuh a sihna inn panin a vui dingin a si pua khia-in, a behte khatpeuh hong pai ciangin, inn sung tawng ah a bu mi khatpeuh kiangah, “Hih lai ah a si dang a om hiam?” ci-in a dot ciangin, “Om lo hi; pau kei in. Topaʼ min na lawh khak ding kidawm in,” ci-in kidawngkik ding hi.

Jeremiah 14:20

Topa aw, ka gitlohna uh le ka pute ka pate uh gitlohnate ka hong pulak uh hi. Bang hang hiam cih leh nangma tungah ka hong mawh khin uh hi.

Late 39:2

Pau loin ka dai om a, ka dai omna a mawkna suak a, ka thuakna khang semsem hi.

Thu-hilhkikna 32:32

Amaute, Sodom le Gomorrah bangin siahuai uh a, gu nei-in a kha leenggah a gah leenggui tawh kibang uh hi.

Siampi Laibu 10:3

Tua ciangin Moses in Aaronʼ kiangah, “Topa in, ‘Ka kiang nai-a a omte kiangah keimah a siangtho-in ka kilak dinga, mi khempeuhʼ mai ah keimah hong kiminthangsak ding hi,’ ci hi,” ci-in a gen hi. Aaron pau loin a om hi.

Isaiah 47:5

Babylon aw, gamdai takin tu inla, khua mialna sungah pai in; bang hang hiam cih leh nang pen kumpi gamteʼ tonu, hong kici nawn lo ding hi.

Jeremiah 3:25

Tua ahih manin maizumin lum ni. I min siatna silh ni. Bang hang hiam cih leh i neu lai a kipan tu ni ciang dong eite le i pu i pate pen Topa i Pasianʼ tungah i mawh khinzo hi. Topa i Pasianʼ thu i mang kei khinzo hi,” a ci uh hi.

Jeremiah 14:7

Ka mite in kei tungah, ‘Topa aw, ka mawhna uh koteʼ lang khat ah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi.

Jeremiah 9:14

amauʼ lungsim deihna zui tentanin a pu a pate uh hilhna bangin Baal nung a zuih man uh ahi hi.