Jeremiah 7:30 - Tedim Bible Revision 2017

³⁰ “Bang hang hiam cih leh, Topa in kong cih in ah, Judah mite in hoih ka sak loh nate a hih khinzo uh hi. Ka min tawh a kilo ka biakinn a nitsak nadingun a kihhuai milimte a koih uh hi.

Tedim Bible

³⁰ “Bang hang hiam cih leh, Topa in kong cih-inah, Judah mite in hoih ka sak loh nate a hih khin zo uh hi. Ka min tawh a kilo ka biakinn a nit sak nadingun kihhuai milimte a koih uh hi.

Jeremiah 7:30 Referans Kwoze

Ezekiel 7:20

Amaute in a kiphatsakpih uh kizepna a manphate, a muhdahhuai milim dingin a bawl uh hi. Tua ahih manin amauteʼ hauhna pen amau mah in a kih dingin ka bawl hi.

Jeremiah 32:34

Amaute in ka min tawh a kilo biakinn sung nangawn ah a kihhuai milimte a koih uh a, a ninsak uh hi.

Daniel 9:27

Tua makai pa in mi tampite tawh kum sagih sung thuciamna kip bawl ding uh hi. Gan gawh biakna le biakpiakna, hih hun lang sung a khawlsak ding hi. Biakinn dawn sang pen munah a Lipkhaphuai na kikoih ding hi; ahi zongin Pasian in tua a koihpaʼ thuak dingin a geel sa thu a koihpa in a thuak hun ciang dong, a Lipkhaphuai na pen a koihna mun mahah om lai phot ding hi,” hong ci hi.

2 KHANG TANGTHU NIHNATE 33:7

Tua ciangin Pasian in David le a tapa Solomon tungah, “Amaute ka thupiak khempeuh, thukham khempeuh, ngeinate le Moses tungtawnin a kipia biakna ngeina kipte zuih ding a kidop nak uh leh, Israel minam khempeuh sung panin ka teelkhiat hih biakinn sung le Jerusalem sungah ka min ka koih tawntung ding hi. Tua ciangin na pu na pate uh adingin ka seh sa gam panin Israel-te ka khiin khia nawn kei ding hi,” a cih Pasianʼ biakinn sungah amah in ama bawl sa milim koih hi.

2 KUMPI NIHNATE 21:7

Tua ciangin Topa in David le a tapa Solomon tungah, “Israel minam khempeuh sung panin ka teelkhiat hih biakinn sung le Jerusalem ah ka min ka koih tawntung ding hi. Amaute ka thupiak sa khempeuh tawh kizui le ka nasem pa Moses in amaute a piak thukham khempeuh tawh kizui-in gamtat ding a kingaihsut nak uh leh, a pu a pate uh tungah ka piak gam sungah Israel mite mi vakvai ka hisak nawn kei ding hi,” a cihna biakinn sungah amah in ama bawl sa a kiseek Asherah milim a koih hi.

2 KUMPI NIHNATE 21:4

Tua ciangin Topa in, “Jerusalem ah ka min ka koih ding hi,” a cihna Topaʼ biakinn sungah amah in biakna taute lam hi.

Jeremiah 23:11

Topa in a cih in ah, “Kamsangte le siampite in Pasian a zahtak kei uh hi. Ka biakinn sung nangawn ah amauʼ gitlohna ka mu hi.

2 KHANG TANGTHU NIHNATE 33:15

Tua ciangin amah in Topaʼ biakinn panin gamdang pasian-te le a milim la khia a, Topaʼ biakinn mual tung le Jerusalem-a ama lam sa biakna tau khempeuh la khia-in, khuapi pua lamah tuate paai hi.

2 KUMPI NIHNATE 23:12

Tua ciangin Judah kumpite in a bawl sa, Ahazʼ inn dei tungnung khum zanga a om biakna taute le Topaʼ biakinn tual nihte sungah Manasseh in a bawl sa biakna taute, amah in phelin satnen a, tua a vuite Kidron lui ah a paai hi.

2 KUMPI NIHNATE 21:3

Bang hang hiam cih leh amah in a pa Hezekiahʼ suksiat sa mual tunga biaknate lamkik hi. Tua ciangin amah in Baal adingin biakna taute phut a, Israel kumpi Ahabʼ bawl bangin Asherah milim khat bawl a, vantung a om nate khempeuh bia-in tuateʼ na a sem hi.

2 KHANG TANGTHU NIHNATE 33:3

Bang hang hiam cih leh a pa Hezekiah in a suksiat sa mual dawna biakpiaknate amah in lamkikin, Baal-te adingin biakna taute phut a, Asherah milimte bawlin vantung nate khempeuh bia a, tuateʼ na sem hi.

Isaiah 66:4

Tua ahih ciangin amaute tungah gimna ka tungsak dinga, amauʼ kihtak thute mah amauʼ tungah ka tungsak ding hi. Bang hang hiam cih leh ka sap ciangin kuamah in hong dawng lo uh a, thu ka gen ciangin kuamah in hong ngai lo uh hi. Keima thu man loh ding mah ut zaw uh a, a sia-in gamta uh hi, a ci hi.

Jeremiah 16:18

Amauteʼ khialhna le a mawhnate uh a zah nihin ka thuk ding hi. Bang hang hiam cih leh amaute in a muhthadah huai siluang hawmte tawh a kibang milimte tawh ka gam a ninsak uh a, kihhuaina tawh ka gamh a dimsak uh hi,” hong ci hi.

Jeremiah 32:35

Hinnom Kuam ah a tapate le a tanute uh tawh Molek pasian a biak nadingun Baal ading biakna tausangte a bawl uh hi. Hih a kihhuai na semin, Judah mite mawhna a bawlsak nadingun amaute ka sawl kei a, zong ka ngaihsun kha ngei beek kei hi.

Daniel 11:31

A galkapte pawl khat in biakinnpi le biakinnpi huang a ninsak ding uh hi. Amaute in nisim biakpiaknate khawlsak ding uh a, a Lipkhaphuai na a suang ding uh hi.

Ezekiel 8:3

A khut ding tawh a kibang pian khat in hong sawkin ka samin hong man hi. Tua ciangin hih ka maang sungin Pasianʼ kha in vanah hong len pih to-in Jerusalem khuapi hong tunpih hi. Tua lai panin, Pasian a hehsuahna ahi milim a omna mun, biakinn tual sung nung lutna, leilu lam kongpi ah hong paipih hi.