Jeremiah 6:16 - Tedim Bible Revision 2017

¹⁶ Topa in mite tungah, “Lam ka bomah ding unla khuadak un. Lam hoih ahi lampi luite dong unla tawn un. Tua hileh na tawldam ding uh hi,” a ci hi. Ahih hangin amaute in, “Ka tawn kei ding uh hi,” a ci uh hi.

Tedim Bible

¹⁶ Topa in mite tungah, “Lamka bomah ding un la, khuadak un. Lam hoih ahi, lampi luite dong un la, tawn un. Na kha uh ading tawldamna na mu ding uh hi,” a ci hi. Ahih hangin amau in, “Ka tawn kei ding uh hi,” a ci uh hi.

Jeremiah 6:16 Referans Kwoze

Isaiah 30:21

Tak lamah na kihei ciang uh ahi a, veilamah na kihei ciang uh ahi zongin, “Hih pen lampi hi, hih tawn un,” cihna aw, na nung lam panun na bil un a za ding hi.

Jeremiah 18:15

Ahih hangin ka mite in kei hong mangngilh khin uh a, milim pasian-te kiangah paknamtui a hal uh hi. Amauʼ tot ding lampi ah tuk uh ahih manin a tot ngei uh lampi lui zui nawn loin, lampi lopi a tawn uh hi.

Thu-hilhkikna 32:7

“A beisa hunte phawk unla, khang tampi hunte ngaihsun un. Na pate uh dong le-uhcin, hong hilh ding uh a, na upate uh dong le-uhcin hong gen ding uh hi.

Jeremiah 7:23

Ahih hangin, ‘Ka thu hong mang un; tua hileh noteʼ Pasian ka hi dinga, note pen ka mite na hi ding uh hi. Note adingin a hoih zawk nadingin na khempeuh ah kong thupiak bang na zui un,’ ci-in thu ka pia zaw hi.

Kolose 2:6

Note hong honpa dingin Topa Khris na san sa uh ahih mah bangin amah tawh hoihtakin kipawlin nungta un.

Isaiah 2:5

Jakobʼ suanlekhakte aw, hong pai un; Topa’ khuavak sungah gamta ni.

Johan 12:35

Jesu in, “Note kiangah tawmvei sung khuavak hong om lai ding hi. Khuamial sungah a pai mi in a paina mun thei lo ahih manin khuamial in note hong phak loh nadingin khuavak na neih sungun na gamtat ngei uh zom paisuak un.

Jeremiah 18:12

Amaute in, ‘Tua bang gen kul lo hi. Koʼ ngimna bangin ka gamta ding uh a, mi khempeuh ama lungsim siaʼ deihna bangin a gamta ding uh hi,’ hong ci ding uh hi.

Jeremiah 22:21

Na daupai laitakun kong hopih hangin na hong ngai nuam kei uh hi. Na neu tung uh a kipan nong tua cih ngitnget uh a, keima thu nong mang ngei kei uh hi.

Jeremiah 44:16

“Topaʼ mina nong gen thute kong mang kei ding uh hi.

Hebru 11:2

Tanglai mite in upna a na neih manun Pasian in a na pakta hi.

Johan 13:17

Hih thu thei-in na zuih uh leh na lung uh nuam mahmah ding hi.

Malakhi 4:4

“Israel mite khempeuh in a zuih dingin Horeb Mual panin ka nasem Moses tungah ka piak ahi, Mosesʼ thukhamte, ngeinate le biakna ngeina kipte khempeuh limtakin phawk un.

Hebru 6:12

Note thadah loin upna le lungduaina a nei mite bangin, Pasianʼ hong ciam sa thu na ngah nadingun ka hong deihsak uh hi.

Isaiah 8:20

Tua ciangin note in, “Topa in note hong hilh thute ngai un. Aisanteʼ thu ngai kei un. Amauteʼ hong gen thute a kimanna om lo hi,” ci-in dawng un.

Luka 16:29

Ahi zongin Abraham in, ‘Na sanggamte a hilh dingin Moses le kamsangte om uh ahih manin tuateʼ thugen na ngai ta uh hen,’ a ci hi.

Isaiah 28:12

Topa in note tungah tawlngakna le lungnopna hong pia napi-in, note in ama thu na ngai kei uh hi.

Johan 5:39

Nuntak tawntung ngah theih nading lametna tawh Lai Siangtho sung na lim sim mahmah uh a, tua na sim uh Lai Siangtho in keima thu mah genin teci pang napi-in,

Sawltak 17:11

Thesalonika khua mite sangin Berea khua mite in mipi lungsim nei zaw uh hi. Amaute in lawp mahmahna tawh Paulʼ thugente ngai uh a, Paulʼ thugente man taktak hiam ci-in a theih nadingun nisimin Lai Siangtho a sim uh hi.

ROM (Romans) 4:12

A vun a ki-at ma-in i pupi Abraham a upna hangin a gamtat mah bangin a gamta, a vun a ki-at mite adingin zong Abraham pen pupi mah ahi hi. Tua pen vun ki-at lelna hang hi loin upna hang ahi hi.

Jeremiah 2:25

Na khe guakin lam pai kei inla, na dang taaksak kei in, kong cih hangin, nangmah in, ‘Bang phamawh ahi hiam? Gamdang pasian-te ka it a, amauʼ nung ka zui ding hi,’ na ci hi.

1 KUMPI MASATE 8:36

vantung panin za-in na mi Israel, na nasemteʼ khialhna maisak inla, amauteʼ zuih ding lampi hoih hilh inla, na mite tungah gamh-in na piak sa leitang tungah guah zusak in.

Late 116:7

Lungmuang takin ka om ding hi; bang hang hiam cih leh keima tungah Topa hong thunuam hi.

Jeremiah 12:16

Tua ciangin, ka miteʼ om dan hoihtakin a sin uh a, Baal min tawh a kiciam dingin ka mite a sinsak mah bangun, ‘Topa a nuntak mah bangin,’ ci-in keima min tawh kiciam ding a sin uh leh ka mite lakah kip takin a om ding uh hi.

Jeremiah 31:21

Lampi ah ciaptehnate bawl unla, lamlahnate phut un. Na pai khiatna uh lampi mah limtakin zongkik un. Nungak siangtho tawh a kibang Israel mite aw, hong kilehkik unla, na khuapite uh hong zuankik un.

Jeremiah 42:3

Topa na Pasian in ka lam pai nading uh ahi a, ka na sep nading uh ahi zongin a hong lah nadingin thu hong ngetsak in,” hong ci uh hi.

Jeremiah 50:5

Zion khua lampi a dong ding uh a, tua khua lam maingatin, ‘Hong pai un. A kimangngilh ngei nawn lo ding tawntung thuciamna khat Topaʼ tungah ciam khawm dih ni,’ a ci ding uh hi.

Thukhente 2:17

Ahi zongin amaute in a thukhente uh thu ngai lo uh hi. Bang hang hiam cih leh amaute in pasian dangte bia-in tuateʼ mai ah kun uh hi. Topaʼ thupiakna a mang amauʼ pute pateʼ tot lampi panin amaute pial pah uh a, amaute in Topaʼ thu mang lo uh hi.

2 KHANG TANGTHU NIHNATE 19:11

En un, Topaʼ thu tawh kisai thute khempeuh ah siampi lian Amariah note tungah om hi. Tua ciangin kumpipa tawh kisai khempeuh ah Judah mite a ukpa Ishmaelʼ tapa Zebadiah om hi. Tua ciangin Levi mite in note tungah ulian na hong sem ding uh hi. Hang takin gamta un; thuman mite tawh Topa hong om tahen!” a ci hi.

Isaiah 46:9

Hun lui thute phawk un; bang hang hiam cih leh kei pen Pasian ka hi a, a dang om lo hi. Kei pen Pasian ka hi a, kei tawh a kibang a dang om lo hi.

Isaiah 57:2

Thutangin a gamta mite in a sihna uh ah nopna ngahin tawlnga uh hi.

Jeremiah 7:3

Vanglian Topa, Israel miteʼ Pasian in hih bangin hong ci hi. Na nuntak zia uh le na gamtatnate uh kipuah un. Tua hileh hih munah kong tengsak bek ding hi.

Jeremiah 7:24

Ahih hangin amaute in ka thu hong mang lo uh a, a bil uh hong ngat lo uh hi. Amauʼ gitlohna lungsim uh zui-in amauʼ thuthu-in a om zaw uh a, mainawt loin a nungkin zaw uh hi.