Jeremiah 5:12 - Tedim Bible Revision 2017

¹² “Amaute in Topa hong nial uh a, ‘Amah in bangmah hih lo ding hi. Eite tungah siatna hong tung lo dinga, gal ahi zongin kial ahi zongin i thuak kei ding hi.

Tedim Bible

¹² Amaute in Topa hong nial uh a, ‘Amah in bangmah hih lo ding hi; i tungah siatna hong tung lo ding a, gal ahi zongin kial ahi zongin i thuak kei ding hi.

Jeremiah 5:12 Referans Kwoze

2 KHANG TANGTHU NIHNATE 36:16

Ahih hangin a mite tungah Topa a heh ciang dong, a hehna a kidamsak zawh nawn loh ciang dongin amaute in Pasianʼ kamtaite zahpihin, a thute simmawhin, a kamsangte thusim lo niloh uh hi.

1 SAMUEL MASA 6:9

A bawngte in Beth-shemesh khua zuanin a pai toh leh siatna lianpi hong bawl pa pen amah hi ding hi. Ahih hangin a pai toh kei leh eite hong susia pa amah hi lo a, eite tungah a piang mawkmawk hi, ci-in i thei ding hi,” a ci uh hi.

1 JOHAN MASA 5:10

Tua ahih manin Pasianʼ Tapa a um mi peuhmah in Pasianʼ teci panna a sang ahi hi. Ahi zongin Pasianʼ thugen a um lo mi peuhmah in ama Tapa thu teci pangin a gennate a um lo uh ahih manin Pasian pen zuaugen a suaksak ahi uh hi.

Micah 3:11

Khuapi ukte in sumgolh ngah theih nading ngaihsutna bek tawh thu khen a, siampite in sum ngah theih nading ngaihsutna bek tawh thu gen a, kamsangte in zong sum ngah theih nading ngaihsutna bek mah tawh mailam thu gen khol uh hi. Tua bang hi napi-in amaute in Topa, muanin nei uh a, “Topa in eite hong ompih a, eite tungah siatna hong tung lo ding hi,” a ci uh hi.

Micah 2:11

Zuau genin khemna tawh thu gen kawikawi a, “Note adingin leenggahzu le khamtheih zu tampi tak hong om ding hi,” a hong ci kamsangte pawl, noteʼ deih kamsangte ahi hi.

Ezekiel 13:6

Amauteʼ maangmuhnate zuaupi hi a, a thugen kholhnate uh zong zuau thu ahi hi. Keimah in amaute sawl lo napi-in amaute in, ‘Topa in hih bangin ci hi,’ ci khem uh hi. Tua bang hi napi-in amauteʼ thugente ka tunsak ding a lamen lai uh hi.

Jeremiah 28:4

Jehoiakimʼ tapa Judah kumpi Jehoiakhin le Judah gam panin Babylon ah salin a paite khempeuh zong hih munah ka lakik ding hi, Topa in hong ci hi. Bang hang hiam cih leh Babylon kumpipaʼ vangliatna ka susia ding hi, ci hi,” a hong ci hi.

Jeremiah 5:31

Kamsangte in thuman gen lo uh a, siampite in zong amauʼ ut bangun a uk uh hi. Ka mite in phamawh sa lo sawnsawn uh hi. A tawpna hun hong tun ciangin bang cih ding uh ahi hiam, Topa in ci hi, ci-in gen in,” hong ci hi.

Jeremiah 4:10

Tua ciangin keimah in, “Ah, Topa Pasian aw, nangmah in hih mite le Jerusalem khua mite khem cihtakin na khem khinzo hi. Bang hang hiam cih leh amau kiangah, ‘Nopna hong om ding hi,’ ci napi-in, amau a sunlum dingin namsau khat a om gige hi,” ka ci hi.

Late 10:6

A lungsim sungah, “Kiliing ngei kei ning; khang tawntungin kamsiatna tuak kei ning,” ci-in a ngaihsun hi.

Paunak 30:9

Hau lua leng nang hong nialin, “Topa i cih kua ahi hiam?” kong ci kha dinga, zawng lua leuleu leng miʼ na guksakin ka Pasianʼ min kong daisak khazel ding hi.

Jeremiah 14:22

Gamdang pasian zuauteʼ lakah guah a zusak thei om ahi hiam? Tua ahih kei leh zong vantungmi in ama thu-in guah zu tawmsak thei ahi hiam? Tua bang a hih thei nang bek hi lo na hi hiam? Topa koteʼ Pasian aw, nangmah in tuate khempeuh hih na hih manin nangma sungah lametna kong nei uh hi.

Jeremiah 43:1

Topa Pasian in mi khempeuh kiangah a hong sawl hih thu teng ka gen khit ciangin

Late 14:1

Mihaite in a lungsim sung uh ah, “Pasian om lo hi,” ci-in ngaihsun uh hi. Amaute sia uh a, kihhuai gamtat uh a, a hoihin a gamta kuamah om lo hi.

Jeremiah 2:6

Amaute in, ‘Egypt gam panin eite hong paikhiat pihin sehnel lak le dum lak, lei keu lak le a lauhuai khuamial bekbak lak, kuama pai ngei lohna mun, kuama ten lohna gamlak ah a hong makaih Topa koi ah om ahi hiam?’ ci beek lo uh hi.

Jeremiah 6:14

Amaute in ka miteʼ thuaknate thupi simsak lo uh a, hoihna om keei lopi, ‘Hoih hi, hoih hi,’ ci mawkmawk uh hi.