Jeremiah 43:12 - Tedim Bible Revision 2017

¹² Egypt pasian-te a kibiakna biakinnte hal dinga, a pasian-te uh halin a pua khia ding hi. Tuucingte in a puan tung uh a om khahte paai-in a siansak uh bangin amah in Egypt gam siangsak dinga, tua khit ciangin ngaihmuang takin a ciahkik ding hi.

Tedim Bible

¹² Izipt pasiante a kibiakna biakinnte a hal ding a, a pasiante uh hal-in a puakhia ding hi. Tuucingte in a puan uh tung-a khahte paai khia-a a sian’sak uh bangin amah in Izipt gam a siangsak ding a, tua khit ciangin ngaihmuang tak-in a ciahkik ding hi.

Jeremiah 43:12 Referans Kwoze

Ezekiel 30:13

“Milim khempeuh ka susia dinga, Memfis khuapi ah a om pasian man lote ka beisak ding hi. Egypt gam a uk ding kuamah om nawn lo dinga, mi khempeuh lausakin ka liingsak gawp ding hi.

Isaiah 49:18

Na kimkot ah khuadak to inla mu in. Na mi khempeuh hong kikhawm uh a, nangma kiangah amaute hong ciah uh hi. Kei pen a nungta Topa ka hih mah bangin, na mite khempeuh hangin nang na kisial dinga, mothak in kizepna-in a zat bangin amaute khempeuh na zang ding hi.

Isaiah 19:1

Egypt tawh kisai thu hih bangin gen hi: A manlang mahmah meii tungah Topa tuangin Egypt gamah a pai hi. Ama mai ah Egypt gam milimte lau-in liing ding uh a, Egypt miteʼ hanna bei ta ding hi.

Jeremiah 48:7

“Na hatnate uh le na neihsate uh na suan manun note zong hong kipaikhiat pih ding hi. Na pasian uh Khemosh zong a siampi teng le a ulian teng tawh, kipaikhiat pih ding hi.

Jeremiah 46:25

Vanglian Topa, Israel miteʼ Pasian in, “En un: Keimah in Thebes khua-a Amon pasian le Faro kumpipa a kipan a pasian-te uh le a kumpite uh, Egypt kumpipa le amah a muang mi khempeuh tungah gimna ka tungsak ding hi.

Late 104:2

Puanza tawh tuam bangin khuavak tawh na kituam a, vantungte pen puanbuk bangin na zal hi.

JOB (Job) 40:10

Na ngap nakleh na minthan nading le na kihihsak theih nadingin tu-in hong kipan inla, minthanna le minliatna ngah ta in.

Esther 6:9

Tua ciangin kumpipaʼ ulian pen khat tungah tua kumpi puante le sakol apsak in. Kumpipa in a pahtawi nop mipa pen amah zemsak inla, tua ciangin khua sung kongzing lampi ah sakol tungah a tuang sa-in na ulian pen pa kaisak inla, ama mai ah kikosakin, ‘Kumpipa in a pahtawi nop mipa tungah hih bangin kibawl ding hi,’ cisak in,” a ci hi.

2 SAMUEL NIHNA 5:21

Filistia-te in tua lai ah a milimte uh nusia uh a, David le a mite in tuate a pua khia uh hi.

Paikhiatna 12:12

“Bang hang hiam cih leh keimah in tua zanin Egypt gam ka nawk dinga, Egypt leitang tungah mihing hitaleh ganhing hitaleh tacil khempeuh ka vatlum dinga, Egypt pasian-te khempeuh tungah thu ka khen ding hi. Kei pen Topa ka hi hi.

Kolose 3:14

Hihte khempeuh banah, mi khempeuh kilem takin a hong om khawmsak thei ahi ki-itna na bulphuh un.

Kolose 3:12

Pasian in note hong itin, hong teelin, ama mi siangthote hi khin na hih manun note pen hehpihna nei-in, migi-in, kiniamkhiatin, dikin, na lungduai ding uh ahi hi.

Efesa 6:11

Dawimangpaʼ hong hih nading khempeuh na dalzawh nadingun Pasianʼ galvan namkim na zang un.

Efesa 4:24

A thutang a siangtho ahihna thu, nuntakna mahmah panin a kilangsak, Pasianʼ pianzia tawh kibangin a kibawl na ngeina thak uh bangin na nungta un.

ROM (Romans) 13:12

Zan khuamial bei dektak a, sun khuavak hong tung dektak ta hi. Khuamial sunga gamtatnate khawlin khuavak sunga nazatte zam ta ni.

Zefaniah 2:11

Topa in amaute lausak gawp dinga, leitung pasian-te, neubawl gawp ding hi. Tua ciangin minam khempeuh in amauʼ gam ciat panun amah bia ding uh hi.

Jeremiah 51:44

Babylon khuateʼ pasian Bel zong gim ka pia dinga, a na guk sa teng ka lak khiatsakkik ding hi. Gamdangte in amah bia nuam nawn lo ding uh hi. Babylon khua kulhpi kicim khinta hi.

Jeremiah 50:2

“Gam khempeuh ah genin taangko unla, dial khai unla im kei un. ‘Babylon khuapi kia ta hi. Bel pasian maizum ta a, Merodak pasian kitan gawp ta hi. A milimte uh maizum ta a, a pasian-te uh kisia gawp ta hi,’ ci-in taangko un.

Isaiah 61:10

Topa’ hangin nakpi takin ka lungdam dinga, ka Pasianʼ hangin kipakin ka diang ding hi. Bang hang hiam cih leh zipi pa puan hoih tawh kizemin, mothak nu a suang manphate tawh a kizep mah bangin amah in hotkhiatna puan kei hong silhsakin, thumanna puanpi tawh kei hong tuam khin hi.

Isaiah 61:5

Gamdang mite in na tuuhonte uh hong kepsak dinga, khual mite pen noteʼ lo kho le leenggui puahte hi ding uh hi.

Isaiah 59:17

Amah in thumanna pen awmdal lum bangin silh dinga, gualzawhna pen sik lukhu bangin khu ding hi. Na khempeuh a manin bawlkik nopna, gimna a piangsakte gim pia-in thukkik nopna lungsim puan bangin a silh ding hi.

Isaiah 52:1

Zion aw, khanglo in; khanglo inla na tha khauhsak in. Khuapi siangtho Jerusalem aw, na puan hoihte silh in. Bang hang hiam cih leh dawibia mite le a nin mite nang sungah hong pai nawn lo ding hi.

Isaiah 46:1

“Bel pasian puksukin, Nebo pasian kun suk a, tua milimte pen ganhing le bawngte tungah kipua hi. Noteʼ puak hih nate pen a gim mahmah ganhingte tungah a kisuan van gik bangin note tungah hong gik hi.

Isaiah 21:9

En in, sakol tung tuangte a kopkopin hong pai!” a ci hi. A dang khat in, “Babylon cim hi, cim hi. A milim pasian-te khempeuh leilak dongah amah in suksiatsak hi,” ci-in a dawng hi.

Late 132:18

Ama galte maizumna tawh ka dimsak dinga, ahih hangin ama kumpi gam khangin zai semsem ding hi,” na ci hi.

Late 132:16

Ka hotkhiatna thu, a siampite ka taangkosak dinga, a mi siangthote lungdamin la sa-in awng ding uh hi.

Isaiah 46:2

Amaute kunin, amaute puk suk khawm uh a, amaute in van gik pengsak thei lo uh a, amaute mahmah zong galteʼ matna sungah tung uh hi.

Jeremiah 43:13

Amah in Egypt gam Heliopolis khua-a mual suangte susia dinga, Egypt pasian-te a kibiakna innte mei tawh a halsak ding hi, ci hi,’ ci-in va gen in,” hong ci hi.

Jeremiah 49:27

Damaskas khua kulhpi mei tawh kihal dinga, Benhadad kumpipaʼ inn zong a kaang tum ding hi,” a ci hi.

Ezekiel 29:11

Na gam sungteng, mihing in ahi a, ganhing in ahi zongin sik nawn lo ding hi. Kum sawm li sung bangmah om lo ding hi.

Daniel 11:8

Amah in amauteʼ milim pasian-te le a na manpha ngun le khamte Egypt gamah a pua ding hi. Kum tawmvei sung bek kilemna a om ding hi.

Jeremiah 10:11

Amauteʼ tungah, “Vantungte le leitung a bawl lo pasian-te, leitung mun khempeuh panin a mangthang ding uh hi,” ci-in na gen ding hi.

Jeremiah 10:15

Kimanna a nei lo, a haihuaipi hi a, gim a kipiak ni ciangin a kisia ding uh hi.

Jeremiah 25:19

Egypt kumpipa Faro le a nasemte, a kumpi uliante;

Ezekiel 29:19

Tua ahih ciangin Topa Pasian ahi keimah in hih bangin thu kong gen hi: Tu-in Taia khuapi a simna hangin Babylon kumpipa Nebukhadnezzar tungah Egypt gam ka pia ding hi. Amah in Egypt gam luhin a nate uh sut dinga, galkapteʼ thaman dingin Egypt-teʼ neihsa khempeuh pua khia mang ding hi.