Jeremiah 4:7 - Tedim Bible Revision 2017

⁷ Humpinelkai khat a bukna sawlkawm panin hong kuan khia zo a, gamte a susia ding pa hong paikhia zo hi. Na gam uh a kisiasak ding le na khuapite uh ah kuamah a ten loh nadingin a susia dingin ama omna panin hong kuan khia khinzo hi.

Tedim Bible

⁷ Humpi khat a bukna sawl kawm lak pan hong kuankhia zo a, gamte susia dingpa hong paikhia khin zo hi. Na gam uh a kisia sak ding leh na khuapite uhah kuamah a teen’ loh nadingin a susia dingin ama’ omna panin hong kuankhia khin zo hi.

Jeremiah 4:7 Referans Kwoze

Jeremiah 5:6

Tua ahih manin tulak panin humpinelkai in amaute that dinga, sehnel gam panin keivom in amaute a pet gawp ding hi. Kamkei in a khuapite uh limtakin vil gige a, a pusuak khia peuhpeuh balzan gawp ding hi. Bang hang hiam cih leh amauteʼ mawhna tam lua a, hong taisan mun lua uh hi.

Jeremiah 2:15

Humpinelkai bangin a galte in amah hawk san uh a, nakpi takin a hawk gawp uh hi. A gam uh gam simtham a suah uh a, a khuapite uh cimin kuamah teeng lo hi.

Isaiah 6:11

Tua ciangin keimah in, “Topa aw, bang tanvei sawt ding ahi hiam?” ka ci hi. Amah in, “Khuapi ah a teeng kuamah om loin hawm suakin, innte ah kuamah om loin, leitang pen gamkhing suak kiuhkeuhin,

Isaiah 1:7

Na gam uh khing a, na khuapite uh mei tawh kihal hi. Na muh tangpi mahun gamdang mite in na gam uh hong laksakin na khempeuh susia gawp hi.

Daniel 7:4

A masa pen humpinelkai tawh kibang a, ahi zongin muvanlai kha tawh a kibang kha a nei hi. Ka et laitakin a kha tegel a hong kibot khia hi. Leitung panin tua ganhing kidom kaang to-in, mihing bangin a khe nihin kidingsak a, mihing lungsim ama tungah a kipia hi.

Jeremiah 50:17

“Israel mite, humpinelkai in a delh mang tuu tawh a kibang uh hi. A masa-in Assiria kumpipa in ne a, tu-in a tawpna ah Babylon kumpipa Nebukhadnezzar in a guh dongin a teeptum hi.

Jeremiah 25:9

en un, leilu lam a om minam khempeuhte le ka nasem pa ahi Babylon kumpipa Nebukhadnezzar ka vaikhak dinga, hih gam le a sunga a teeng mi khempeuh le hih kiim a om gam khempeuh a sim dingin ka va la ding hi. Keimah in amaute ka susia mangkhin dinga, amaute a tawntungin siacipin simmawhna ka thuaksak ding hi, ci-in Topa in kong gen hi.

Jeremiah 49:19

En un, lo nona ah nuam takin a om tuute, Jordan gam tulak panin a hong pai to humpinelkai in a delh mang bangin, a gam uh nusia-in thakhat thu-in ka taisak mang dinga, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Keima to ahi ding kua om lai ahi hiam?

Jeremiah 34:22

En un, Topa in kong cih in ah, keimah in thu ka pia dinga, hih khuapi ah hong paikik ding uh hi. Amaute in hih khuapi hong simin, hong la-in mei tawh hong halsak ding uh hi. Judah gam khuapite kuamaʼ ten lohna mun awng ka suaksak ding hi,” a hong ci hi.

Jeremiah 33:10

“Topa in kong cih in ah, note in, ‘Hih munah mihing, ganhing om loin mun dai suak hi,’ ci-in na gen uh mah bangin Judah gam khuapite le Jerusalem khua kongzingte awng a, mihing ganhing kuamah a teeng kei hi.

Jeremiah 26:9

Bang hangin, ‘Hih biakinnpi pen Shiloh tawh kibang dinga, hih khuapi ah a teeng om loin gam simtham suak ding hi,’ ci-in Topaʼ minin thu hilh ngam na hi hiam?” ci-in a gen uh hi. Topaʼ biakinnpi sungah a om mi khempeuh in Jeremiah a umcih uh hi.

Jeremiah 25:38

Topaʼ namsau hang ahi a, a lauhuai ama hehna hang ahi zongin, amauʼ gam pen gam simtham suak khin ahih manin humpinelkai in a kua a nusiat bangin Topa in a mite nusia zo hi,” a ci hi.

Isaiah 5:9

Vanglian Topa in ka zakna ah hih bangin kiciam a, “A mantakin inn tampi tak hawmsuak dinga, a lian a hoih innte ah a teeng om lo ding hi.

2 KUMPI NIHNATE 24:1

Ama hun sungin Babylon kumpipa Nebukhadnezzar hong kuan to a, Jehoiakim kum thum sung ama nasem a suak hi. Tua ciangin Jehoiakim in amah lehdo hi.

Daniel 5:19

Amah lian lua mahmah ahih manin gam khempeuh, nam khempeuh, pau khempeuhte in kihta-in a liing uh hi. Mi khatpeuh a thah nop leh that a, a nuntaksak nop leh a nungtasak hi. A ut leh mi khatpeuh pahtawi-in, a ut leh a daisak thei hi.

Jeremiah 50:44

“En un, lo nona ah nuam takin a om tuute, Jordan gam tulak panin a hong pai to humpinelkai in a delh mang bangin a gam uh nusia-in thakhat thu-in amaute ka taisak mang dinga, a gam uh a uk dingin ka deih peuhpeuh ka seh ding hi. Bang hang hiam cih leh kei bang mi kua om ahi hiam? Ka to ding kua om lai ahi hiam? Ka mai ah kua kumpi hong ding ngam ding ahi hiam?

Jeremiah 27:8

“‘Ahih hangin gam khat peuhpeuh ahih kei leh kumpi khat peuhpeuh in Babylon kumpipa Nebukhadnezzarʼ na sem loin, Babylon kumpipaʼ hakkol a ngawng ah a puak kei leh, amah ka uk cipsak mateng namsau tawh, kialpi tawh, pulnatna tawh tua gam gim ka pia ding hi, Topa in kong ci hi.

Jeremiah 9:11

“Jerusalem khuapi ninkholna ka bangsak dinga, se-alteʼ teenna mun ka suaksak ding hi. Judah gam khuapite gamlak ka suaksak dinga, kuamah teeng nawn lo ding hi,” a ci hi.

2 KUMPI NIHNATE 25:1

Tua ciangin Zedekiah in Babylon kumpipa lehdo hi. Tua ahih manin ama uk a kum kuana, tua kum a kha sawmna, tua kha a ni sawm ni-in Babylon kumpipa Nebukhadnezzar a galkap khempeuh tawh Jerusalem a sim dingin hong kuanin tua khua a umcih uh hi. Tua ciangin amaute in a kimkot ah umcih nading panmun a bawl uh hi.

Jeremiah 4:29

Sakol tunga tuangte le thal tawiteʼ aw a kizak ciangin mi khempeuh galtai mang uh a, gamlak ah tai-in suang lakah a kah to uh hi. Khuapi khempeuh kinusia khin a, kuamah teeng nawn lo hi.

Jeremiah 22:7

Nangʼ lang khat ah a hong susia ding mi ka kithawisak dinga, a hei uh hong keng ding uh hi. Amaute in na sidar khuam hoih pente hong phuksakin mei ah hong khulsak ding uh hi.

Jeremiah 44:2

“Vanglian Topa, Israel miteʼ Pasian in kong genin ah: Note in Jerusalem khua le Judah gam khuapi khempeuh tungah ka tunsak gimna na mu zo uh hi. En un, tu ni-in tua khuate a sia sa mahin om lai a, kuamah teeng lo hi.

Ezekiel 12:20

Mihing a dimna khuapite kisusia dinga, gam sung khempeuh gamkhing suak ding hi. Tua ciangin Topa ka hihna thu hong thei ding uh hi,” a hong ci hi.

Ezekiel 21:31

Note tungah ka hehna kong khah dinga, mei-am kuang hong bang ding hi. Mi thah a siam, migiloteʼ khut sungah note kong pia ding hi.

Ezekiel 32:2

“Mihing ahi Ezekiel aw, Egypt kumpipa Faro tamlawh inla, hih bangin ci in: “Minam dangte lakah, humpinelkai bangin na kingaihsun hi. Ahi zongin nang pen gun sung tok gawpin a ninsak, Awle tawh na kibang zaw hi.

Siampi Laibu 26:31

Keimah in na khuapite uh siasakin, na biakna munte uh gamkhing ka suaksak dinga, nomauʼ hong biakna a gim namtuite ka diik kei ding hi.

Siampi Laibu 26:33

Keimah in minam dangte lakah note kong thehthang dinga, keimah in namsau a paai panin dokin note kong delh ding hi. Na leitang uh gamkhing suak dinga, na khuapite uh a sia hi ding hi.

Jeremiah 8:16

Leilu lam Dan khua pek panin galteʼ sakol nak ging kiza hi. A sakol hatteʼ hamna awging in gam le lei liingsak hi. Amaute in i gam le a sunga om teng, hong susia khin ding uh hi,’ a ci ding uh hi.

Jeremiah 22:6

Bang hang hiam cih leh Judah kumpi inn tawh kisai-in Topa in kong cih in ah: Nang pen Gilead gam ahi a, Lebanon mual bangin ahi zongin na hoih mahmah hi. Ahih hangin nang sehnel gam kong suaksak dinga, kuamah a ten lohna khua kong suaksak ding hi.

Jeremiah 46:18

Vanglian Topa keimah Kumpipa ka hi hi. Taber mual, mual khempeuh sangin sang zaw-in, Karmel mual, tuipi tungah sangpi-in a dawk toh bangin, no hong sim paʼ thahatna a lian mahmah ding hi.