Jeremiah 36:3 - Tedim Bible Revision 2017

³ Judah mite in amauʼ tungah tunsak dingin ka ngaihsut siatna khempeuh za-in, mi khempeuh in a siatna uh panin kiheina-in nei kha thei ding uh a, keimah in zong amauʼ khialhna le amauʼ mawhnate ka maisak thei kha ding hi,” a hong ci hi.

Tedim Bible

³ Judah mite in amau tunga tun’sak dinga ka ngaihsut siatna khempeuh za-in mi khempeuh in a siatna lampi-uh panin kiheina-in a nei kha thei ding uh a, keimah in zong amau’ khialhna leh amau’ mawhnate ka maisak kha thei ding hi,” a ci hi.

Jeremiah 36:3 Referans Kwoze

Jeremiah 18:8

tua ka gen sa minam le gam a siatna panin a kiheikik leh, ama tungah siatna tunsak dingin ka seh sa pen ka kisikkik dinga, ka tungsak nawn kei ding hi.

Sawltak 3:19

Tua ahih ciangin na mawhnate uh hong sawp siangsak theih nading, Topa kiang panin a hong pai lungsim nopna hun na ngah theih nading uh le note adingin a seh sa Jesu Khris a hong sawl theih nadingin na mawhna uh kisik unla, Pasian kiang zuan un.

Ezekiel 12:3

Ezekiel aw, tu-in galtai dingteʼ gamtat bangin na van puak ding guang inla, suntangpi-in paikhia in. Na omna panin na paikhiat lam mi khempeuh musak in. A lehdo thei mi ahih tei hangun a thu theithei kha ding uh hi.

Jeremiah 26:3

Amaute in na thugen hong ngai-in, a gitlohna uh pan kihei kha thei ding uh hi. Tua hileh amauʼ gitlohna hanga amaute suksiat dingin ka ngaihsut sa ka kheelkik ding hi.

Thu-hilhkikna 30:2

Topa noteʼ Pasianʼ kiangah note le na suan na khakte uh paikikin, na lungsim khempeuh uh le na nuntakna khempeuh uh tawh tu ni-a kong gen ama thute na man uh ciangin,

Jeremiah 36:7

Topaʼ tungah amaute thumin a vekpi-un a hoih lohna uh panin a kihei thei kha ding uh hi. Bang hang hiam cih leh hih miteʼ tungah Topa in tunsak dingin a gen sa a hehna le a thangpaihna lian mahmah hi,” ka ci hi.

2 PETER NIHNA 3:9

Mi pawl khatteʼ ngaihsut bangin Topa in a kamciamna a hong tungsak hak hi zenzen lo hi. Note khat beek in siatna na thuakkhak ding uh deih loin na vekpi-un na kisik ding uh deih ahih manin hong pai nai lohna pen note hong khualna hizaw hi.

Sawltak 26:18

Pasianʼ teel miteʼ omna mun a amau om nading mun sanah hong om theih nadingun keimah hong upna uh tawh a mawhna uh a kimaisak theih nadingin Satanʼ khut sung panin Pasianʼ khut sungah a hei khia ding le khuamial panin khuavak lamah hei-in a mit uh khua a musak ding pa na hi hi,’ a hong ci hi.

Marka 4:12

Bang hang hiam cih leh, ‘Enen napi-un a muh nai loh nading, zaza napi-un a tel nai loh nading; amaute in mu-in tel le-uh Pasianʼ lamah kihei ding uh a, Pasian in amauteʼ mawhna maisak ding hi,’” ci-in a dawng hi.

Jeremiah 35:15

Ka nasem ahi kamsangte khempeuh note kiangah hong sawl tawntungin, ‘Tu-in note khempeuh na hoih lohna uh panin kihei unla, na gamtat hoih lote uh kipuahpha un. Pasian dangte nung delh loin a na na sep kei nak uh leh note le na pu na pate uh kiangah ka piak gam sungah na teeng ding uh hi,’ ci-in note tungah hong gen uh hi. Ahih hangin note in na bil uh nong ngat kei uh a, ka thu nong ngai kei uh hi.

Jeremiah 24:7

Keimah Topa ka hih lam theihtheihna lungsim ka pia ding hi. A lungsim khempeuh uh tawh kei kiangah hong kileh ding uh ahih manin amaute ka mi ahi ding uh a, kei pen amauteʼ Pasian ka hi ding hi.

Jeremiah 18:11

Tua ahih manin tu-in, Judah mite le Jerusalem khua miteʼ kiangah Topa in a cih in ah, ‘En un, noteʼ siat nading ka geel a, noteʼ lang khat ah ngimna khat ka nei hi. Na vekpi-un na siatna uh pan kilehkik unla, na om dan uh le na nasepnate uh bawl pha un,’ va ci in.

1 SAMUEL MASA 7:3

Tua ciangin Samuel in Israel mite khempeuh kiangah, “Na lungsim khempeuh uh tawh Topaʼ lamah a kiheikik na hih uh leh noteʼ lak panin gamdang pasian-te le Ashtaroth nusian milim koih khia-in Topaʼ lamah na lungsim uh ngat unla, amah bek bia un. Tua hileh amah in Filistia-teʼ khut sung panin note hong hon khia ding hi,” a ci hi.

Thu-hilhkikna 30:8

Note in Topaʼ thu mangkikin, tu ni-a kong gen ama thupiaknate khempeuh na zui ding uh hi.

Sawltak 26:20

Mite a mawhna uh panin kisikin Pasian kiang a zuat nading uh le a kisikna uh a kilatsak nadingun a gamtat ding uh a masa-in Damaskas khua ah thu hilhin, a zomin Jerusalem khua ah, tua ciangin Jew mite omna gam khempeuh le Gentail mite lakah thu ka hilh hi.

Luka 20:13

Tua ciangin leenggah lo nei pa in, ‘Bang cih ding ka hi hiam? Ka it mahmah ka tapa ka sawl ding hi. Amaute in amah na zahtak bawl kha ding uh hi,’ a ci hi.

Mattiu 13:15

Hih miteʼ lungsim mawl mahmah hi; a bil uh bingsak uh a, a mit uh a si uh hi. Tua bang hi kei le-uh, a mit uh tawh mu-in, a bil uh tawh za-in, a lungsim un tel dinga, kei lamah amaute hong kihei-in, amaute ka damsak ding hi, ci-in Pasian in gen hi,’ ci-in kigelh hi.

Zefaniah 2:3

Kiniamkhiatin, Topaʼ thupiakna a mang Judah gam mi khempeuh aw, Topaʼ kiang zuan un. A manin gamta unla, kiniamkhiat un. Tua hileh Topaʼ hehna hong kilat ciangin, tua hehna hangin gimna panin na peng kha thei ding uh hi.

Ezekiel 18:23

Migilo khat a si ka muh ciangin a lungdam dingin hong ngaihsun na hi uh hiam? Ka lung dam het lo hi. Amah hong kisikin a nuntak ding pen keima deih ahi zaw hi.

Jeremiah 23:14

Ahih hangin Jerusalem khua sunga om kamsangteʼ sungah a mulkimhuai zaw na khat keʼn ka mu hi. Angkawmin zuau thu gen uh a, mite a gitlohna uh pan a kikhel loh nadingin mihoih lote a hanthawn zaw lai uh hi. A vekpi-un keiʼ muhna ah Sodom khua mite tawh kibang khin ka sa a, Gomorrah khua mite tawh zong kilamdang lo uh hi.

Isaiah 6:10

Amaute in a mit uh tawh a muh loh nading, a bil uh tawh a zak loh nading, a lungsim uh tawh thu a theih tel loh nading, amaute kihei-in damna a ngah loh nadingun hih miteʼ lungsim mawlsak inla, amauʼ bil uh ngongsak inla, a mit uh va sisak in,” hong ci hi.

Nehemiah 1:9

Ahi zongin kei kiangah hong ciahkikin ka thupiaknate zui-in na sep uh leh leimong dongah a kithehthang sa na mite uh kaikhawmin keima min om nadingin ka teelna sa munah amaute ka ciahpih ding hi,’ ci-a na thugen hong phawkkik in.

Thu-hilhkikna 5:29

Amaute le a suan a khakte uh a nopsak tawntung theih nadingun keimah zahtak ding le ka thupiak khempeuh zuih ding hih bang ngaihsutna nei tawntung le-uh ka deih ahi hi.

Late 139:24

Kei sungah siat theihna a om kha hiam hong en inla, tawntung lampi ah kei hong kha in.