Jeremiah 31:10 - Tedim Bible Revision 2017

¹⁰ “Aw, gamdangte aw, Topaʼ kammal ngai unla, gamlapi, tuipi gei-a omte kiangah va gen sawn un. ‘Israel mite a kithehthang sakpa in kaikhawmkik dinga, tuucingpa in a tuute a kep bangin a kem ding hi,’ va ci un.

Tedim Bible

¹⁰ “Aw, gamdangte aw, Topa’ kammal ngai un la, gamla pi, tuipi gei-a omte kiangah va gen sawn un. ‘Israel mite a kithehthangsak pa in a kaikhawm kik ding a, tuucingpa in a tuute a cin’ bangin a cing ding hi,’ va ci un.

Jeremiah 31:10 Referans Kwoze

Isaiah 40:11

Amah in tuucingpa bangin ama tuuhonte an vak dinga, ama tuuhonte kaikhawmin a ang sungah pua dinga, no ngek lai a neite dam takin a paipih ding hi.

Ezekiel 34:12

Tuucingte in a kithehthang tuute kaikhawmin a kep bangin keimah in donin ka kem ding hi. Tua bang a lauhuai siat nading hun laitakin a kithehthangna uh mun khempeuh panin ka kaikhawm ding hi.

Isaiah 66:19

amauteʼ lakah lim khat ka khai ding hi. Amauʼ sung panin, minamte tung, Tarshish mite tung, Put mi le Lud mite tung, Meshek mite tung, Tubal mi le Javan mite tung, ka min hoihna a za ngei lo, ka minthanna a mu ngei lo tuipi gei-a om gam mite tungah a suakta lai mite ka sawl ding hi. Amaute in minamte lakah ka minthanna genthang ding uh hi.

Thu-hilhkikna 30:4

A kihawl khia na mite uh van mong pekah a om leh zong, Topa na Pasian un tua lai panin note hong khawmin, tua lai panin amah in hong paipih ding hi.

Johan 11:52

Jew mite ading bek hi loin a kithehthang Pasianʼ mi khempeuh pum khat a suah nadingin a kikaihkhop nading thu zong a gen khol ahi hi.

Johan 10:27

Keima tuute in ka aw za-in thei uh ahih manin kei hong zui uh hi.

Zefaniah 3:19

En un, tua hun ciangin no a hong bawlsiate gim ka pia dinga, a khebaite hon khia-in, a kipaikhiat pih mite ka ciah pihkik ding hi. Amauʼ maizumna uh minthanna ka suaksak dinga, mi khempeuh in amaute a phat ding uh hi.

Luka 12:32

Tua ciangin Jesu in, “Tuu hon tawmnote aw, lau-in lunghimawh kei un. Na Pa un ama Ukna sungah ukna thu a nei dingin a hong seh sa ahi hi.

Zekhariah 9:16

Tuucingpa in a tuuhonte lauhuaina panin a hotkhiat bangin, tua ni ciangin Topa, amauʼ Pasian in a mite a hon khia ding hi. Kumpi lukhu tungah a om suang manphate bangin ama gam sungah a mite taang ding uh hi.

Zefaniah 2:11

Topa in amaute lausak gawp dinga, leitung pasian-te, neubawl gawp ding hi. Tua ciangin minam khempeuh in amauʼ gam ciat panun amah bia ding uh hi.

Micah 5:4

Amah in Topaʼ thahatna tawh a mite uk dinga, Topa ama Pasianʼ vangliatna tawh a uk ding hi. Leitung mi khempeuh in ama liatna phawk ding uh ahih manin ama mite lungmuang takin om thei ding uh hi.

Micah 4:6

Topa in hih bangin ci hi: Keimah in gim ka piak ahi, sal a om gimna a thuak mite, ka kaihkhopkik hun hong tung ding hi.

Micah 2:12

Ahi zongin no Israel mi a omlaite khempeuh pel het loin kong kaikhawmkik ding hi. Tuubuk sunga tuu khum bangin, gankhawk sungah tuu hon kaihkhop bangin note kong kaikhawmkik dinga, na gam sung uh, mi tampiteʼ husa tawh kidimkik ding hi, ci hi.

Ezekiel 37:24

Ka nasem pa David pen amauteʼ kumpi hi dinga, mi khatʼ ukna nuai ah amaute kigawmin, ka thukhamte hoihtakin zui ding uh hi.

Ezekiel 20:34

Gam khempeuh ah note kong thehthangna panin kong kaihkhopkik ciangin note tungah ka vangliatna le ka hehna kong lak ding hi.

Ezekiel 11:16

Tua ahih ciangin na salpihte kiangah hih bangin keima thugente va gen sawn in: A gamlapi gamah a teeng dingin pua khia-in, gam dangah a thehthang pa pen keimah ka hi hi. Ahi zongin amauteʼ omna gam dangah tawl khat sung bek kei a hong bia dingin ka omsak hi.

Ezekiel 5:10

Tua kong gimpiakna hangin nang Jerusalem khuapi sungah papite in a tapateʼ sa ne-in, tapate in a pate uhʼ sa ne ding uh hi. No a mite gim kong pia dinga, a suakta kha sunsunte nangawn mun khempeuh ah kong thehthang gawp ding hi.

Ezekiel 5:2

Umcihna lim na man ciangin khuapi lim sungah seh khat hal tum in. Tua ciangin seh khat la leuleu inla, khuapi kiimah na pai kawmin na namsau tawh satnen in. A om lai seh khat pen huih lakah lawn in. Keimah in ka namsau tawh tuate ka sat ding hi.

Jeremiah 50:19

Israel mite a omnasa mun mahah ka omsakkik dinga, Karmel le Bashan mual, Efraim mual le Gilead mualah a piang ante lungkim takin a ne ding uh hi.

Jeremiah 50:17

“Israel mite, humpinelkai in a delh mang tuu tawh a kibang uh hi. A masa-in Assiria kumpipa in ne a, tu-in a tawpna ah Babylon kumpipa Nebukhadnezzar in a guh dongin a teeptum hi.

Jeremiah 25:22

Taia kumpite khempeuh, Sidon kumpite khempeuh; tuipi gei-a kumpite khempeuh;

Isaiah 60:9

Hih teembawte pen tuipi gei le tuikulh ah a om teembawte hi a, Tarshish teembaw lianpite in hong makaih hi. Topa in nangmah a minthang mahmah in hong bawl khin ahih manin gamlapi panin tua teembawte in nangma mite hong puak uh a, a ngun a khamte uh tawh hong puakkhawm uh hi. Topa, na Pasian, Israel-teʼ Siangtho Pa a pahtawina-in a hong puak uh ahi hi.

Isaiah 54:7

Tomno sung nang kong nusia pak a, ahih hangin hehpihna lianpi tawh nang kong lakik ding hi.

Isaiah 42:10

Topa’ tungah la thak sa unla, leimong panin amah phatna sa un! Tuipi le a sunga omte, tuipi gei-a om gamte le a tunga teeng mite aw, la sa un.

Isaiah 42:4

Amah in leitungah thutang thu a phuh khit matengin lungsi lo, lungkia lo ding hi. Tuipi gei-a om gamte in ama thu ngak uh hi.

Isaiah 41:1

Tuipi gei-a om gamte aw, gamdai takin ka thu ngai un. Na mite uh a tha uh dimsak unla, amaute a nai ah hong paisak un. Amaute in thugen theih nading hun ngah ding uh hi. Thukhen zumah kei tawh kisi nuʼng.

Isaiah 27:12

Israel mite aw, tua ni ciangin Eufratis gunpi panin Egypt luipi dongin Topa in thu hong khen dinga, note khatkhatin hong kikaikhawm ding hi.

Isaiah 24:14

A suakta sun mite in lungdamin la sa ding uh hi. Nitumna lam a om mite in Topa a liat mahmahna thu gen ding uh hi.

Late 72:10

Tarshish kumpite le tuikulh neu-a kumpite in ama tungah siah pia uh henla, Sheba le Seba kumpite in letsong puak ta uh hen.

Thu-hilhkikna 32:26

Keimah in, “Amaute gamlapi ah ka thehthang dinga, mite lakah amaute a kiphawkna ka beisak ding hi,” ka ci thei ding hi.

Piancilna 10:5

Hihte pen tuipi gei-a teeng miteʼ pulepa ahi uh hi. Amauteʼ leitang ah amauʼ kampau ciat zangin, a beh, a minamin a om uh hi.

Siampi Laibu 26:33

Keimah in minam dangte lakah note kong thehthang dinga, keimah in namsau a paai panin dokin note kong delh ding hi. Na leitang uh gamkhing suak dinga, na khuapite uh a sia hi ding hi.

Late 23:1

Topa pen tuucin bangin hong cing hi a, kisapna teng kicing ta hi.

Paunak 27:23

Na tuuhonte hoihtakin thei inla, na bawnghonte hoihtakin kem in.

Isaiah 40:1

Ka mite hehnem un, hehnem un, na Pasian un ci hi.

Isaiah 48:20

Babylon panin pai khia-in Khaldea gam panin tai inla, lungdamna tawh hih thu genin taangko inla, leimong dongin puak in. “Topa in ama nasem Jakob hon khia khinzo!” ci-in gen kawikawi in.

Jeremiah 3:15

“‘Ka thu a hong mang makaite kong pia dinga, amaute in pilna le siamna tawh note hong uk ding uh hi.

Jeremiah 23:4

Amaute a don ding makaite ka koih dinga, lau nawn lo, lungkham nawn loin khat beek a mangthang nawn kei ding uh hi, Topa in kong ci hi.

Daniel 11:18

Tua khit ciangin tuipi tungtawnin minam dangte sim dinga, tampi tak mah a zo ding hi. Ahih hangin gamdang makai khat in amah zo gawp dinga, a minthanna teng a beisak ding hi.

Zekhariah 2:6

Topa in ama mite kiangah, “Mun khempeuh ah note kong thehthang khin hi. Ahi zongin tu-in Babylon panin tai khia-in Jerusalem ah ciahkik un.

Late 147:2

Topa in Jerusalem khuapi lam a, amah in a kinil khia Israel-te a kaikhawm hi.

Zekhariah 10:8

Amaute samin ka kaikhawm dinga, amaute hon khia-in a nidang zahin mi tampi ka phasak ding hi.