Jeremiah 24:1 - Tedim Bible Revision 2017

¹ Babylon Kumpi Nebukhadnezzar in Jerusalem khua panin Jehoiakimʼ tapa Judah kumpipa Jehoiakhin le Judah kumpi uliante, khutsiamte le sikseek siamte, Babylon khua ah sal dingin a paikhiatpih khit ciangin Topa in hih maang hong musak hi. Topaʼ biakinn mai ah theigah bawm nih dim ka mu hi.

Tedim Bible

¹ Babilon kumpipa Nebukhadnezzar in Jerusalem khua panin Jehoiakim’ tapa Judah kumpipa Jekoniah leh Judah kumpi uliante, khutsiamte leh siksek siamte, Babilon khua-ah sal dingin a pai khiatpih khit ciangin Topa in hih mang hong musak hi. Topa’ biakinnpi mai-ah theigah bawm nih dim ka mu hi.

Jeremiah 24:1 Referans Kwoze

Jeremiah 29:2

Tua hunin kumpi Jehoiakhin le a nu, a kumpi innsung maangte, Judah gam le Jerusalem khua-a makai upate, khutsiamte le sikseekte, Jerusalem khua panin kipaikhiat pih khinzo hi.

2 KHANG TANGTHU NIHNATE 36:10

Tua kum khuakhal sungin Kumpi Nebukhadnezzar in mi sawlin Topaʼ biakinn-a umlebeel manphate tawh amah Babylon ah lasak a, Judah le Jerusalem tungah Jehoiakhinʼ sanggampa Zedekiah kumpi-in a koih hi.

Zekhariah 3:1

Topa in maang hong musak a, Topaʼ vantungmi mai ah siampi lianpen pa Joshuaʼ mawhna a zong dingin a kiangah Satan zong a om ka mu hi.

Zekhariah 1:20

Tua ciangin Topa in sek tawi mihing li hong lak hi.

Amos 7:7

Tua ciangin Topa in hih bangin hong musak hi: Khaukhai zangin a kiciang kulh gei khat ah, Topa a ding ka mu a, a khut sungah khaukhai khat a tawi hi.

Amos 7:4

Tua ciangin Topa Pasian in hih bangin hong musak leuleu hi: Meikuang tawh a mite gim a pia dingin amah hong kithawi a, tuipite keu tumsakin leitung zong a hal tum dingin a hong kipan hi.

Amos 7:1

Topa Pasian in hih bangin hong musak hi: Kumpipaʼ gan an ding lopa a ki-at khit phet, selkik dingin a kisak laitakin Topa in kauphe honpi a piangsak hi.

Amos 3:7

Topa Pasian in ama nasem kamsangte tungah ama geelna theisak masa lopi-in bangmah hih het lo hi.

Ezekiel 19:9

Bawm sungah khum uh a, Babylon kumpipa kiang a tunpih uh hi. Israel mual tung tengah ama hawkna a kizak nawn loh nadingin a khumcip uh hi.

2 KUMPI NIHNATE 24:10

Tua hun laitakin Jerusalem ah Babylon kumpipa Nebukhadnezzar hong kuan to a, tua khuapi a umcih hi.

Isaiah 13:1

Amozʼ tapa Isaiah in Babylon siat nading tawh kisai a thumuhnate:

Jeremiah 28:4

Jehoiakimʼ tapa Judah kumpi Jehoiakhin le Judah gam panin Babylon ah salin a paite khempeuh zong hih munah ka lakik ding hi, Topa in hong ci hi. Bang hang hiam cih leh Babylon kumpipaʼ vangliatna ka susia ding hi, ci hi,” a hong ci hi.

Jeremiah 29:1

Jerusalem khua panin Nebukhadnezzar in Babylon khua ah salin a paikhiatpih uliante, siampite, kamsangte le mi khempeuhteʼ tungah lai khat ka khak hi.

Jeremiah 37:1

Babylon kumpipa Nebukhadnezzar in Jehoiakimʼ tapa Jehoiakhinʼ tangin Judah gam a uk dingin Josiahʼ tapa Zedekiah a koih hi.

Jeremiah 13:19

Negeb gam a om khua kongpite lah kikhak a, kuamah lut thei nawn lo hi. Judah mite zong salin kikai a, a vekun sal suak khin uh hi,” hong ci hi.

Ezekiel 17:4

sum bawlteʼ omna gamah pua-in sumbuk bawlteʼ khuapi sungah va koih hi.