Jeremiah 22:21 - Tedim Bible Revision 2017

²¹ Na daupai laitakun kong hopih hangin na hong ngai nuam kei uh hi. Na neu tung uh a kipan nong tua cih ngitnget uh a, keima thu nong mang ngei kei uh hi.

Tedim Bible

²¹ Na daupai laitak-un kong hopih hangin na hong ngai nuam kei uh hi. Na neu tung-ua kipan nong tua cih ngitnget uh a, ka thu nong mang ngei kei uh hi.

Jeremiah 22:21 Referans Kwoze

Jeremiah 32:30

Bang hang hiam cih leh Israel mite le Judah mite in a neu lai pek uh a kipan ka muhna ah a sia bekbek a gamta uh hi. Keimah Topa in kong cih in ah, Israel mite in a khut uh tawh milim a bawlna uh hangin kei hong hehsak uh hi.

Jeremiah 3:25

Tua ahih manin maizumin lum ni. I min siatna silh ni. Bang hang hiam cih leh i neu lai a kipan tu ni ciang dong eite le i pu i pate pen Topa i Pasianʼ tungah i mawh khinzo hi. Topa i Pasianʼ thu i mang kei khinzo hi,” a ci uh hi.

Isaiah 48:8

Note pen muan theih ding na hih lohna uh, na suah tung uh a kipan mi lehdo thei na hihna uh ka hong thei hi. Tua ahih manin hih thute na za ngei kei uh a, zong na thei ngei kei uh hi.

Paunak 30:9

Hau lua leng nang hong nialin, “Topa i cih kua ahi hiam?” kong ci kha dinga, zawng lua leuleu leng miʼ na guksakin ka Pasianʼ min kong daisak khazel ding hi.

Ezekiel 20:8

Ahi zongin amaute in kei hong demin, ka thugen hong ngai lo uh hi. A muhdahhuai a milimte uh paikhia tuan lo uh a, Egypt pasian-te zong nusia lo uh hi. Tua hi a, ka heh mahmahna teng Egypt gam sungah thuaksak gawp ning, ci-in ka ngaihsun hi.

Jeremiah 35:15

Ka nasem ahi kamsangte khempeuh note kiangah hong sawl tawntungin, ‘Tu-in note khempeuh na hoih lohna uh panin kihei unla, na gamtat hoih lote uh kipuahpha un. Pasian dangte nung delh loin a na na sep kei nak uh leh note le na pu na pate uh kiangah ka piak gam sungah na teeng ding uh hi,’ ci-in note tungah hong gen uh hi. Ahih hangin note in na bil uh nong ngat kei uh a, ka thu nong ngai kei uh hi.

Jeremiah 6:16

Topa in mite tungah, “Lam ka bomah ding unla khuadak un. Lam hoih ahi lampi luite dong unla tawn un. Tua hileh na tawldam ding uh hi,” a ci hi. Ahih hangin amaute in, “Ka tawn kei ding uh hi,” a ci uh hi.

Ezekiel 20:28

Amaute tungah piak dingin ka ciamna gamah amaute ka paipih hi. Amaute in mual sang ahi a, singniim khat peuhpeuh ahi zongin a muh uh ciangin tua bang mun khempeuh ah biakna a pia uh hi. Meihal biakna a piakna uh le tui phih biakna a piaknate uh tawh kei hong hehsak uh hi.

Ezekiel 20:21

“Ahi zongin a tate nangawn un kei hong dem uh hi. A zuite in nuntakna a ngah nading ahi ka thukhamte palsatin ka thupiaknate mang lo uh a, Sabbath-te siasak uh hi. Tua ahih manin, ka hehna teng gamlak ah thuaksak gawpin, amaute a sumai dingin ka kithawi hi.

Ezekiel 20:13

Ahi zongin Israel mite in gamlak nangawn ah kei hong dem uh a, a zui peuhpeuh in nuntakna a ngah nading uh ahi keima thukhamte le ka thupiaknate a nial uh hi. Ka Sabbath-te zong nakpi takin siasak uh hi. Tua ahih manin amaute a maiman nadingin ka hehna teng gamlak ah a thuaksak gawp dingin ka kithawi hi.

Jeremiah 2:31

No Israel mite aw, Topaʼ kammal limtakin ngai dih un. Israel-te adingin gamlak tawh kibang ngei ka hi hiam? A mial mahmah gam tawh kibang ngei ka hi hiam? Tua ahihleh bang hangin ka mite in, ‘Ko ka suakta uh hi; nang kiangah kong pai nawn kei ding uh hi,’ ci uh ahi hiam?

2 KHANG TANGTHU NIHNATE 33:10

Topa in Manasseh tung le ama mite tungah thu gen a, ahih hangin amaute in don lo uh hi.

Thu-hilhkikna 31:27

Bang hang hiam cih leh a lehdo mite le a lungkhauh thei mite na hihna uh ka thei hi. En un, note tawh kei a nungta khawm laipi mahin, tu ni-in Topa na lehdo khin uh hi. Ka sih khit ciangin bangzah takin lehdo zaw lai ding na hi uh hiam!

Thu-hilhkikna 9:24

Note kong theih ni a kipan Topa na nial uh hi.

Thu-hilhkikna 9:7

“Topa na Pasian uh sehnel gamah phinin na hehsakna uh phawk unla, mangngilh kei un. Egypt gam panin na paikhiat ni uh a kipan hih lai na tun dongun Topa langpanin na lehdo uh hi.

Late 129:1

“Ka neu lai a kipanin nakpi takin amaute in kei hong gimsak uh hi,” Israel in tu-in ci tahen.

Jeremiah 3:24

“Ahih hangin i neu lai a kipan a zumhuai Baal pasian i biakna hangin i pu i pateʼ biakna ahi tuu le bawngte, a tapate le a tanute khempeuh uh i sum khinzo hi.

Jeremiah 13:10

Ka thu hong ngai nuam loin amauʼ ngaihsutna bang bekin a pai tentan nuam, pasian dangteʼ na a sem ding le a bia dingin a nung a zui hih migilote pen zat theih ding ahi nawn lo, hih dialkaih bang ahi ding uh hi.

Jeremiah 19:15

“Vanglian Topa, Israel miteʼ Pasian in a cih in ah: En un, hih khuapi le a kiim a khuaneute tungah ka gen sa siatna khempeuh ka tungsak ding hi. Bang hang hiam cih leh amaute in a lungsim uh khauhsak uh a, ka thute a ngai nuam kei uh hi, ci hi,” ka ci hi.

Jeremiah 48:11

Moab gam a neu lai a kipanin nuam takin a om den ahi hi. Gam dangah kipaikhiat pih ngei lo a, thawl khat pan thawl khat ah a kitei kawikawi leenggahzu tawh kibang lo hi. A limna kilamdang ngei lo a, a gimnam zong kikheel ngei lo hi.

Zekhariah 7:7

Jerusalem cithei-in a khua sungah mi tampi om a, leitaw lam gam, nitumna lam gam, a kiim a pam khuapite ah mi tampi teengin a om hun laitakin, tu-a bangmahin Topa in a kamsang masateʼ tungtawnin a gen sa thu ahi hi.

Jeremiah 2:25

Na khe guakin lam pai kei inla, na dang taaksak kei in, kong cih hangin, nangmah in, ‘Bang phamawh ahi hiam? Gamdang pasian-te ka it a, amauʼ nung ka zui ding hi,’ na ci hi.

Jeremiah 25:3

“Amonʼ tapa Josiah, Judah gamah kumpi a suah zawh a kum sawm le kum thum pan tu ciang dong kum sawm nih le kum thum sung Topa in kei hong hopih a, keʼn zong note kiangah kong gen sawn tawntung hangin note in na ngai kei uh hi.

Jeremiah 25:4

Topa in ama nasem ahi kamsangte khempeuh hong sawl tawntung hi napi-in note in ngai loin na bil uh na ngat kei uh hi.

Jeremiah 25:7

Ahih hangin Topa in kong cih in ah, note in ka thu nong ngai kei uh a, noteʼ gim ngah nading mahin na khut uh tawh milim bawlin nong hehsak uh hi.

Jeremiah 25:8

“Tua ahih ciangin Vanglian Topa in kong cih in ah, note in ka thu hong mang lo na hih uh ciangin

Zefaniah 3:2

Topaʼ thu ngai nuam lo a, a thuhilhna sang nuam lo hi. Topa muang nuam lo a, a Pasian naih nuam lo hi.