Jeremiah 14:7 - Tedim Bible Revision 2017

⁷ Ka mite in kei tungah, ‘Topa aw, ka mawhna uh koteʼ lang khat ah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi.

Tedim Bible

⁷ Ka mite in kei tungah, “Topa aw, ka mawhna-un in kote’ lang khatah hong pang ahi ta zongin, nangma’ min hangin hong hehpih in. Kote in tam veipi kong nungngat uh a, nang tungah kong khial zo uh hi.

Jeremiah 14:7 Referans Kwoze

Hosea 5:5

Israel-teʼ kiphatsakna pen amau mahʼ siat nading ahi hi. Amauʼ mawhna in amaute puksak dinga, Judah mite in zong puk pih ding uh hi.

Late 25:11

Topa aw, ka mawhna lian ahih manin, nangma min phat nadingin keima mawhna hong maisak in.

Jeremiah 5:6

Tua ahih manin tulak panin humpinelkai in amaute that dinga, sehnel gam panin keivom in amaute a pet gawp ding hi. Kamkei in a khuapite uh limtakin vil gige a, a pusuak khia peuhpeuh balzan gawp ding hi. Bang hang hiam cih leh amauteʼ mawhna tam lua a, hong taisan mun lua uh hi.

Isaiah 59:12

Bang hang hiam cih leh nangma tungah koteʼ thupalsatna tampi tak pha a, ka mawhnate un koteʼ langah teci hong pang hi. Koteʼ thupalsatnate, ka mawhnate uh ka thei uh hi.

Jeremiah 2:19

Na gitlohna mah in nangmah hong thuhilh dinga, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam het loin kha velval hi, cih thu thei inla mu in, Vanglian Topa Pasian in ka hong ci hi.

Efesa 1:12

Tua ahih manin Khris a muang masa eite in Pasian phatin a minthanna vang kilangsak ni.

Efesa 1:6

Ama it Tapa hangin hih bangin letsong hong pia ahih manin a vanglian ama hong hehpihna hangin Pasian phat ni.

Hosea 7:10

Israel miteʼ kiphatsakna in amauʼ lang khat ah teci pang hi. Ahi zongin hih thu khempeuh ah zong, amauʼ Topa Pasian ahi keiʼ lamah hong kihei tuan lo uh a, kei hong zong lo uh hi.

Ezekiel 20:22

Ahi zongin tua bangin hih leng, Egypt gam panin Israel mite ka paikhiatpih hong mu miteʼ lakah ka mindai ding ahih manin amaute ka susia kei hi.

Ezekiel 20:14

Ahi zongin Egypt gam panin amaute ka paikhiat pihna minam dangte in hong mu khin ahih manin tua bangin gamta leng, keima mindai nading mah hi zel ahih manin amaute bangmah ka cih kei hi.

Ezekiel 20:9

Ahi zongin Egypt gam panin no Israel mite kong paikhiatpih ding hi, ci-in amauʼ ompih miteʼ zakin gen khin ka hih manin, tua bangin gim thuaksak leng keima min a daisak suak ding, cih ngaihsutna hangin gim ka pia kei hi.

Jeremiah 3:6

Kumpi Josiah in a uk laitakin Topa in kei hong hopih a, “A zulhzau Israel, mual sang tung khempeuh ah pai-in sing liim nuai khempeuh ah numei paktat bangin a om kawikawina na mu khinzo hiam?

Late 115:1

Kote tungah hi loin, Topa aw, kote tungah hi loin, na itna kip le na thumanna hangin nangma tungah minthanna om tahen.

Ezra 9:15

Israel Pasian, Topa aw, nang na thutang a, ahi zongin tu ni-a a om lai ko teng nong suaktasak veve hi. Na muhna ah kote a mawhpi mah hi ta le-ung hong hehpih in; bang hang hiam cih leh mawhna tawh nangma mai ah kuamah om thei lo hi,” ci-in thu ka ngen hi.

Joshua 7:9

Bang hang hiam cih leh Kanaan mite le hih gam a teeng mi khempeuh in hih thu za ding uh a, kote hong umcihin leitung panin kote hong phiat khia mang ding uh hi. Tua ciangin a lian mahmah nangma min bang cih ding na hi hiam?” a ci hi.

Thu-hilhkikna 32:27

Amauʼ langte in ngaihsun khialin, amaute in, “Eite i gualzo hi. Topa in hihte khempeuh bawl lo hi,” hong ci kha ding uh ahih manin galteʼ hong phin ding ka lau hi,’ a ci hi.

Jeremiah 8:14

“Tua ciangin mite in, ‘Bang hangin tutu lai ihi hiam? Kikaikhawm unla khuapi muanhuaite va beel ni; tua lai ah va si ni. Bang hang hiam cih leh Topaʼ tungah i mawh manin Topa i Pasian in eite a si dingin hong seh khinzo a, i dawn dingin gu tui hong pia khinzo hi.

Late 79:9

Kote a hong hon khia Pasian aw, nangma min a than nadingin kote hong huhin, nangma min hangin kote hong khah khia-in, ka mawhnate uh hong maisak ta in.

Isaiah 48:11

Keimah ka kikhualna, keimah ka kingaihsutna-in hih bangin kong hih hi. Bang hang hiam cih leh ka min a siat ding kilawm ahi hiam? Midang khat tungah keima minthanna ka pia kei ding hi.

Jeremiah 3:25

Tua ahih manin maizumin lum ni. I min siatna silh ni. Bang hang hiam cih leh i neu lai a kipan tu ni ciang dong eite le i pu i pate pen Topa i Pasianʼ tungah i mawh khinzo hi. Topa i Pasianʼ thu i mang kei khinzo hi,” a ci uh hi.

Jeremiah 8:5

Tua ahihleh bang hangin hih mite lam khialin hong kilehkik nawn lo ahi uh hiam? Zuau pasian milimte lenkip uh a, hong kilehkik nuam lo uh hi.

Amos 7:2

Kauphe in gam sung lopate a gaih khit ciangin, keimah in Topa tungah ka thum a, “Topa Pasian aw, na mihingteʼ mawhna maisak in. Amaute minam tawm hi a, zawngkhal uh ahih manin bangci-in thuak zo ding ahi uh hiam?” ka ci hi.

Jeremiah 5:25

Na khialhnate un hih na hoihte khaktan a, na mawhnate uh hangin tuate na taanlawh uh hi.

Jeremiah 10:19

Ka thuakna hangin ka gim a, ka liamna nasia mahmah hi. Ahih hangin, “Hih gimna ka thuak ding mah hi,” ka ci hi.

Micah 7:9

Topa tungah khial khin ka hih manin ama hehna tawl khat ka thuak ding hi. Ahi zongin a tawpna ah kei hong huh dinga, a man lopi-in a hong kibawlna teng hong bawl phatsakin, amah in hong hon khia ding hi.