Jeremiah 12:13 - Tedim Bible Revision 2017

¹³ Amaute in mangbuh tuh uh a, ahi zongin kiak bek a ngah uh hi. Nasep a hahkat mahmah hangun bangmah a ngah kei uh hi. A kihtakhuai Topaʼ hehna hangin anlak hun ciangin a maizum ding uh hi,” a ci hi.

Tedim Bible

¹³ Amau in mangbuh a tuh uh-a ling aat uh hi. Nasep a hahkat mahmah uh hangin bangmah a ngah kei uh hi. A kihtak huai Topa’ hehna hangin an lak hun ciangin a maizum ding uh hi,” a ci hi.

Jeremiah 12:13 Referans Kwoze

Haggai 1:6

Khaici tampi na tuh uh hangin an tawm bek na la uh a, annek ding na neih tei uh hangin na kham ding uh na nei kei uh hi. Dawn ding leenggahzu na neih tei uh hangin na kham ding uh na nei kei uh hi. Puansilh ding na neih tei uh hangin a lum khop ding na nei kei uh hi. Sum thalawhte in zong a khamkhop ding uh thalawh zo lo uh hi.

Micah 6:15

Khai na tuh uh hangin an na la kei ding uh hi. Oliv gah na cil uh hangin a thau na zang kha kei ding uh a, leenggah na cil uh hangin a zu na dawn kha kei ding uh hi.

Thu-hilhkikna 28:38

“Khaici tampi lo ah na tuh ding uh a, ahi zongin tawmno bek na khawm ding uh hi; bang hang hiam cih leh kauphe in ne mang ding hi.

Isaiah 55:2

An ahi lo nate lei nadingin bang hangin na sum uh zang a, hong gilvahsak thei lo nate ngah nadingin bang hangin na sem na hi uh hiam? Keima thu limtakin ngai-in a limci an ne unla, anlimte ah nuamsa-in om un.

Siampi Laibu 26:16

keimah in note tungah hih bangin kong hih ding hi: Noteʼ tungah hong tung dingin keimah in thakhat thu a dipkuatna, zawngkhalna le mite siasakin nuntakna a kiamsak ding cisa natna kong tungsak ding hi. Noteʼ lo pawi zong a mawkna hi ding hi; bang hang hiam cih leh na galte un tuate ne ding hi.

Habakkuk 2:13

Na zawh uh minamteʼ nasepnate a mawkna suakin, amauʼ sep sa teng khempeuh a khu-in leeng mang hi. Hih thu pen Vanglian Topa in a piansak ahi hi.

Jeremiah 4:26

Ka et leh, logam leihoih teng sehnel gam suak khin a, Topaʼ mai, a hehna lianpi mai ah, khuapi khempeuh kisia khin uh hi.

ROM (Romans) 6:21

Ahi zongin, tuhunin gamtat dingin zumhuai na sakte uh, tua hun lai-in na gamtat manun bang thaman ngah na hi uh hiam? Tua na gamtatna thaman uh sihna ahi hi.

Siampi Laibu 26:20

Na leitang un an piangsak loin, na gam sung uh a kungte in amauʼ gah gah lo ding ahih manin noteʼ thatang a mawkna-in a bei hi ding hi.

Jeremiah 9:5

Mi khempeuh in a veengte uh khem ciat uh a, thuman gen kuamah om lo hi. A leii uh zuau thu gen dingin kisinsak uh a, mawhna a bawl manun tawl lua uh a, kisik zo nawn lo uh hi.

Jeremiah 17:10

Keimah Topa in mi khempeuhʼ nuntak zia le a gamtatna tawh kizui-in a pia khia dingin ngaihsutna ka en tel a, lungsim ka sittel hi,” a ci hi.

Late 78:62

Amah in ama mite namsau tawh sisak a, ama luahte tungah a hehna a nga hi.

Hosea 8:7

Paunak ah, Huih a tuhte in huih ngahkik dinga, a vui om lo ankung in annek ding piangsak lo hi, kici hi. A vui om lo ankung panin an kingah mah taleh zong gamdang mite in ne tum ding hi.

Haggai 1:9

“An hau dingin na kilamet uh hangin tawmcik bek na nei uh hi. Na neihsunte nangawn uh inn na tunpih uh hangin kong mut khiatsak mangkhin hi. Bang hangin tua cih ka hi hiam? Note khempeuh, nomauʼ inn ding ciat lamin na manlah uh a, ka biakinn a siapi-in na koih dakna hang uh ahi hi.