Jeim 2:1 - Tedim Bible Revision 2017

¹ Sanggamte aw, minthanna vang tawh a kidim i Topa Jesu Khris umin na om laitakun a pualam a kilang pian ziate siksanin mi na deidan kei un.

Tedim Bible

¹ Ka u ka naute aw, a minthang Topa ahi i Topa Zeisu Khazih upna thu-ah mi maitang zahtak tuam nei kei un.

Jeim 2:1 Referans Kwoze

Paunak 24:23

Mipil dangte in zong hih bangin thu gen uh hi: Mi lang muhin thukhenna hoih lo hi.

Jeim 2:9

Ahi zongin mi na deidan uh leh note a khial na hi uh a, Thukham a palsat na hi veve uh hi.

Thu-hilhkikna 16:19

Thutang na hei khia kei ding uh a, angvan tuam na nei kei ding uh hi. Sumgolh in mipilteʼ mit tawsakin thumanteʼ thu hei khia ahih manin sumgolh na la kei ding uh hi.

Siampi Laibu 19:15

“Note in thukhenna-ah thu a tang loin na khen kei ding uh hi. Mizawngte lang gen loin, a lianteʼ thu zui loin, thumanna tawh na veengte uh thu na khen ding uh hi.

Thu-hilhkikna 1:17

Thukhenna ah angvan tuam na nei kei ding uh hi. A neu le a liante a kibangin a thu na ngai ding uh a, maitang zahtak tuam na nei kei ding uh hi. Bang hang hiam cih leh thukhenna pen Pasian-aʼ ahi hi. Note adingin a haksa lua thute kei kiangah nong paipih ding uh a, keimah in tua thu ka za ding hi,’ ka ci hi.

Paunak 28:21

Mi langbawlna hoih lo a, ahi zongin letsong neucik khat hangin thukhente gamta khial thei zel hi.

2 KHANG TANGTHU NIHNATE 19:7

Tu-in note in Topa zahtak unla, na hihnate uh ah kingaihsun un. Bang hang hiam cih leh Topa i Pasian in thuman hei khiatna, mi deidanna le sumgolh laknate deih lo hi,” a ci hi.

Jeim 3:17

Ahi zongin tung lam panin a kingah pilna a siangtho ahi hi. Mi tawh kilem thei-in dik a, mi tawh kikhawl thei a, hehpihna lungsim nei-in gamtat hoih a, mi lang-et lo a, kineihkhem cihte om lo hi.

Jeim 2:3

limtakin a kizem mipa zahtak bawl zaw-in, “Hih lai ah tutna nuamah hong tu in,” ci le-uhcin a, ahi zongin mizawng pa kiangah, “Tua lai ah na ding phot in,” cihna ahi a, “Sual tung hih ka khe kiang khawngah hong tu in,” cihna ahi zongin kam na zat uh leh,

Juda 1:16

Hih mite a tawntungin phunin khatlekhat mawhna kizong uh a, amau pumpi deihna bangun gamta-in kiphasak uh a, phattuamna a ngah theih nadingun midangte a phat uh hi.

1 TIMOTI MASA 5:21

Hih kong gen thute na zatna ah kuamah guptuam paihtuam nei het loin hoihtakin hong mangin na zat nadingin Pasian, Khris Jesu le a siangtho vantung miteʼ muhna ah limtakin a hong gen ka hi hi.

Mattiu 22:16

Amauʼ nungzuite le Herod mi pawl khat, Jesu kiangah a paisak uh hi. Amaute in, “Sia aw, thu ahi bang a gen tawntung na hihna thu ka thei uh hi. Mite kuamah zahtak tuam nei lo na hih manin midangteʼ pau ding bangmah phamawh sa loin Pasian in miteʼ gamtat ding a deihna bangin tangtakin thu na hilh tawntung hi.

1 KORIN MASA 2:8

Hih leitung a uk mite kuamah in hih pilna thu thei lo uh hi. Thei hi le-uh, a minthang Topa pen singlamteh tungah na that lo ding uh hi.

Mangmuhna 14:12

Pasianʼ thupiakna zui-in Jesu tungah a citak Pasianʼ mite adingin thuak zawhna kisam hi.

Sawltak 20:21

Jew mi le Gentail mite a mawhna panun Pasianʼ lamah kihei-in i Topa Jesu a up nadingun thu ka gen khinzo hi.

2 PETER NIHNA 1:1

Jesu Khris nasem le sawltak ahi keimah Simon Peter in: Eiteʼ Pasian le Honpa ahi Jesu Khris a thumanna hangin koteʼ upna zah mahin upna manpha a nei mite tungah lai ka hong khak hi.

Titu 1:1

Pasianʼ sila le Jesu Khrisʼ sawltak ahi keimah Paul in, Thuzuau a gen ngei lo Pasian in tangtawng pekin thu hong ciamin, a hunhoih a tun ciangin thuhilhna tawh a hong kilatsak nuntak tawntungna thu lametna tawh, Pasianʼ teel miteʼ upna le thuman thutak a theihna uh ah biakna thu tawh kituakin a khan semsem nading thu a hilh dingin eite hong Hon Pasianʼ thupiakna tawh nasep hong kipia ahih manin,

1 TIMOTI MASA 1:19

na upna le lungsim kisuang loin na omna thu kip takin len paisuak in. Mi pawl khatte in a lungsim kitheihna uh ah man a kisakna bangun gamta lo uh ahih manin a thu upna uh a mawkna a suah uh hi.

Hebru 1:3

Tua Tapa in Pasianʼ minthanna vang hong taang khiasak a, Pasianʼ lim taktak mah hong pua-in, ama kampauna tawh leitung vantung buppi pai-in a kip hi. Mihingte a mawhna panun a siansak khit ciangin Vanglian pipa Pasianʼ taklam, vantungah a tu hi.

ROM (Romans) 1:11

Kha thu ah note na thahat theih nadingun Pasian in a hong piak thuphate hong genpih nuam ka hih manin note tawh kimuh ding ka ut mahmah hi.

Sawltak 24:24

Tua zawh a sawt loin Feliks le Jew mi ahi a zi Drusilla, Paul a kikhumna ah hong pai-in amah sam khiasak uh a, Paul in Jesu Khris upna thu a gennate a nupa-un a ngai uh hi.

Sawltak 7:2

Stefen in, “Ute pate aw, ka thugen hong ngai un. I pupi Abraham, Haran khua ah a tenma, Mesopotamia gamah a om lai-in, ama kiangah a minthang Pasian kilang a,

Sawltak 10:34

Tua ciangin Peter a kam ka-in thu hilh ding kipan a, “Pasian in kuamah angvan tuam nei loin,

Hebru 12:2

Eite hong makai-in i upna a hong cingtaaksak Jesu mitsuanin nei ni. Mai lamah a ngah ding lungdamna hangin maizumna kihta loin singlamteh tungah sihna hong thuak a, tu-in Pasian tokhom tak lamah a tu hi.

Jeim 1:16

Sanggamte aw, miteʼ khem sa-in om kei un.

Jeim 1:19

Sanggamte aw, note in na theih ding uh ka deih thu in: Thu kigen khempeuh hoihtakin ngai pahpah un. Ahi zongin pau pahpah kei unla, heh pakpak kei un.