Isaiah 9:6 - Tedim Bible Revision 2017

⁶ Bang hang hiam cih leh eite adingin naungek khat hong suak a, eiteʼ tungah tapa khat hong kipia hi. Amah pen eite hong ukpa hi dinga, ama min pen “Lamdang Thulak pa, Vanglian Pasian, Tawntung Pa, Nopsakna Kumpi,” kici ding hi.

Tedim Bible

⁶ Bang hang hiam cih leh eite adingin naungek khat hong suak a, eite tungah tapa khat hong kipia hi; ama liangko tungah ukna om ding a, ama min pen, “Lamdang, Thulakpa, Vanglian Pasian, Tawntung Pa, Nopsakna Kumpi,” kici ding hi.

Isaiah 9:6 Referans Kwoze

Luka 2:11

Tu ni-in David khuapi sungah, note a hong hon khia ding Khris Topa a suak hi.

Mattiu 28:18

Tua ciangin amaute mai ah Jesu hong pai a, “Leitungah ahi a, vantungah ahi zongin vangliatna khempeuh kei tungah hong kipia khinta hi.

Isaiah 7:14

Tua ahih ciangin Topa mahmah in note tungah lim khat hong pia ding hi. En un, nungak khat gai-in tapa khat nei dinga, ama min Immanuel kici ding hi.

Mattiu 1:23

“Nungak khat gai-in tapa khat nei dinga, ama min dingin Emmanuel kiphuak ding hi,” ci hi. Emmanuel a khiatna in, eite tawh Pasian hong om khawm hi, a cihna ahi hi.

Mangmuhna 19:16

A puan tung le a phei tungah, “Kumpiteʼ Kumpi, topateʼ Topa,” ci-in a min kigelh hi.

1 JOHAN MASA 5:20

Pasianʼ Tapa hong pai-in eite thu hong theisak ahih manin Pasian taktak a thei ihihna thu i thei hi. A Tapa Jesu Khris tawh i kipawlna hangin Pasian taktak mah tawh a kipawl thei ihi hi. Tua Jesu pen Pasian taktak mah hi a, nuntak tawntungna a pia thei ahi hi.

1 TIMOTI MASA 3:16

I biakna pen a thuthuk a thu lian taktak ahihna thu hih bangin i thei hi: Mihing lim pua-in amah hong kilang a, a man taktak ahihna thu Kha Siangtho in kilangsak a, vantung mite in a mu uh hi. Mi khempeuh tungah ama thu kihilh a, mun khempeuh ah ama thu ki-umin, vantungah amah kila to hi.

Isaiah 53:5

Ahih hangin eiteʼ khialhna hangin amah kiliamsak a, eiteʼ mawhna hangin amah kisatnim hi. Ama gim thuakna hangin nopna i ngah a, ama liamna hangin damna i ngah hi.

Isaiah 28:29

Hih zong Vanglian Topa’ kiang pan a hong pai thu ahi hi. Amah pen thu lamlahna ah lamdang mahmah a, pilna ah lian mahmah hi.

ROM (Romans) 8:32

Ama Tapa nangawn siit loin eite khempeuh adingin hong pia khia ahih manin, na dang khempeuh zong hong pia zaw kan ding hi lo ahi hiam?

1 KORIN MASA 15:25

Bang hang hiam cih leh Pasian in a galte khempeuh zo-in a khe nuai ah a koih khit hun dong mateng Khris in uk ding hi.

Late 45:6

Na kumpi tokhom siangtho kip tawntung hi. Na kumpi ciangkhut thumanna ciangkhut hi a,

Isaiah 10:21

Jakob innkuan a omlaite a vanglian Pasian kiangah ciahkik ding hi.

Thukhente 13:18

Topaʼ vantungmi in ama kiangah, “Hih thu a lamdang hi, ci-in thei napi-in bang hangin ka min hong dong na hi hiam?” a ci hi.

Johan 14:27

Note tungah keima neih bang lungnopna kong pia ding hi. Tua ka hong piak ding lungnopna pen leitung mite in a piak theih a kip lo lungnopnate pawl hi lo hi. Tua ahih manin lau kei unla, zong lungkham kei un.

Hebru 1:8

Ahi zongin Tapaʼ thu a gen ciangin Pasian in, “Pasian aw, na kumpi tokhom khang tawntungin kip dinga, thuman thutang tawh na gam sung na uk ding hi.

Johan 1:14

Tua Thu mihing hong suakin kote lakah hong om a, itna nei-in citak mahmah ahih manin Pasianʼ pianzia a neihna ka mu cian uh hi. Hih pianzia pen Pasianʼ Tapa khat bek hihna tawh a neih pianzia ahi hi.

Mattiu 11:27

“Ka Pa in kei tungah na khempeuh hong pia khin hi. Pa sim loh Tapa a thei kuamah om lo a, Tapa le Tapa in a theihsak nop mite sim loh, pa a thei kuamah om lo hi.

Isaiah 63:16

Bang hang hiam cih leh, Abraham in kote hong huh loin, Israel in kote hong phawk loh hangin nang pen koteʼ Pa na hi hi. Topa aw, nang pen koteʼ Pa na hi a, nangmah in tanglai pek pan kote a hong hon khia pa na hi hi.

Sawltak 10:36

Mi khempeuhʼ Topa ahi Jesu Khris hangin a kingah Lungdamna Thu, Israel mite tungah Pasian in a puakna thu na thei uh hi.

Thu-hilhkikna 10:17

Bang hang hiam cih leh Topa na Pasian uh a lian, a vanglian, a kihtakhuai Pasian, angvan nei loin, sumgolh a la lo, pasian-teʼ Pasian, topateʼ Topa ahi hi.

1 KORIN MASA 1:30

Ahi zongin Pasian in Jesu Khris hangin note tungah nuntakna hong pia a, tua Jesu Khris pen eiteʼ pilna, Pasian tawh i kipawl theihna, Pasianʼ mi siangtho suakin, hotkhiatna i ngah theihna ahi hi.

Johan 1:16

A kicing ama hong itna hangin eite khempeuh tungah thupha a banbanin hong pia hi.

Luka 1:35

Vantungmi in, “Nangma tungah Kha Siangtho hong tung dinga, nangma tungah Pasianʼ vangliatna hong om ding hi. Tua ahih manin a hong suak ding a siangtho naungek pen Pasianʼ Tapa kici ding hi.

Late 72:7

Ama hun sungin thuman pung henla, khapi a bei mateng nopna om tahen.

Kolose 2:3

Khris pen Pasianʼ pilna le a thuthuk khempeuh a kitheih theih nading ahi hi.

Sawltak 20:28

Kha Siangtho in noteʼ khut sungah a hong koih pawlpi mite le nomau pumpi mahmah limtakin na kem un. Pasian in a Tapa a sihna tawh a ngah a pawlpi hoihtakin a kemte na hi ta un.

Paunak 8:23

Tangtawng pek lai-in kei hong bawl a, leitung a om ma-in hong bawl masak pen ka hi hi.

Hebru 13:20

Ama sihna hangin Tuucing Lianpa suakin, a sisan tawh tawntung thuciamna a kipsak i Topa Jesu pen sihna panin a thokiksak, eite tungah nopsakna a hong pia Pasian in,

Luka 2:14

“Van a sang belna ah a om Pasianʼ min thang henla, ama pahtak leitung mite tungah nopna om tahen,” a ci uh hi.

Isaiah 53:10

Ahih hangin amah a kisatnim ding pen Topa’ deihna ahi hi. Amah in natna thuaksak hi. Mawhna hangin ama pumpi a kipiak ciangin amah in a suanlekhakte mu dinga, ama khan a sau ding hi. Topa’ deihna ama khut sungah pung ding hi.

Isaiah 53:2

Bang hang hiam cih leh amah pen kungno khat ahi a, lei keu sungah a om singzung khat bangin ahi zongin ama mai ah khangto lel hi. Eiteʼ et dingin amah in lim le deihhuaina mel bangmah nei lo a, eiteʼ deih dingin hoihna nei lo hi.

2 KORIN NIHNA 5:19

Tua ahih manin koteʼ thugen bulpi in: Pasian in miteʼ mawhnate ngaihsun nawn loin, Khris hangin leitung mi khempeuh le amah a kilemin hong bawl a, tua kilemna thu a gen dingin kote hong seh hi.

ROM (Romans) 9:5

le a thupi pupiteʼ suanlekhakte hi uh a, leitung si le sa tawh kisai-in Khris zong amau minam sung panin a piang ahi hi. Hih thute hangin mi khempeuh in na khempeuh a uk Pasian phat tawntung ta uh hen! Amen.

Luka 21:15

Bang hang hiam cih leh tua hun ciangin noteʼ gen ding thu le pilna kong guan dinga, na galte uh khat beek in noteʼ thugen hong nial zo loin, zong hong sel zo lo ding uh hi.

Late 72:3

Mual liante le mual neute in thumanna tawh na mite adingin nopna tampi piangsak tahen.

Late 45:3

Vanglian kumpipa aw, na minthanna le na liatna tawh na namsau kuah in.

Nehemiah 9:32

“‘Tua ahih ciangin tu-in a lian, a vanglian, a kihtakhuai, thuciamna kip takin a len koteʼ Pasian aw, Assiria kumpiteʼ hun a kipan tu ni dongin ka kumpite uh, ka uliante uh, ka siampite uh, ka sanggamte uh, ka pu ka pate uh le ko mi khempeuh tungah hong tung gimnate hong neu ngaihsutsak kei in.

Jeremiah 31:22

Bang tanvei lungka ding na hi hiam, a zulhzau ka tanu aw. Bang hang hiam cih leh Topa in leitungah na thak khat bawl a, numei in pasal a hon zo hi,” a ci hi.

Isaiah 26:12

Topa aw, kote tungah maavanna hong pia in. Koteʼ matut zawhna khempeuh nangmah in na hong sepsakna hang ahi hi.

Isaiah 26:3

Topa aw, nang hong muang a, nangma tungah a lungsim khempeuh a koih mipa lungnopna kicing pia ta in.

Late 85:10

Itna kip le thutak kigawm dinga, thuman le kilemna kihual ding uh hi.

Late 72:17

Ama min kip tawntung henla, a minthanna kip paisuak hen. Ama hangin mite in thupha ngah henla, minam khempeuh in amah pen thupha ngah pa, ci ta uh hen.

Late 50:1

Vanglian, Topa Pasian hong pau khia a, nisuahna le nitumna kikal leitung mi khempeuh a khawm hi.

Isaiah 8:18

En un, Topa in kei hong piak ka tate le keima pumpi pen Zion Mual tungah a teeng Vanglian Topa’ tung panin Israel miteʼ sungah lim le kihilna ka hi uh hi.

Isaiah 66:12

Topa in hih bangin ci hi: Tu-in gunpi bangin nopsakna le tui let khia bangin minamteʼ hauhna ama tungah ka tungsak ding hi. Note pen a nuʼ nawi teepin, a ang ah kipua a, a khuk tungah a diang naungek na bang ding uh hi.

Mattiu 1:1

Abrahamʼ suan David, Davidʼ suan Jesu Khrisʼ khang ciaptehna hih bang ahi hi.

Isaiah 16:5

itna kip tawh kumpi tokhom khat kiphut dinga, thuman sep ding a manlang, thutang zongin thu a khen mipa pen Davidʼ buk sunga om tua tokhom tungah thuman tawh tu ding hi,” a ci uh hi.

Daniel 2:44

Tua kumpite a maan laitakun vantung Pasian in a bei thei ngei lo ding kumpi gam a hong phut ding hi. Tua kumpi gam kuamah in zo zo lo dinga, tua gam in gamdang khempeuhte zo gawpin a kip tawntung ding hi.

Haggai 2:9

Biakinn thak pen a lui sangin hoih zaw-in thupi zaw ding hi. Hih biakinn ah cihtheihna le nopsakna kong pia ding hi,” cisak hi.

2 SAMUEL NIHNA 7:13

Amah in keima min dingin biakinn khat lam dinga, keimah in ama kumpi gam tokhom a tawntungin ka kipsak ding hi.

2 SAMUEL NIHNA 7:16

Na suanlekhakte le na kumpi gam keima mai ah a kip tawntungin kibawl dinga, na kumpi tokhom kip tawntung ding hi,’ ci-in gen in,” a ci hi.

1 KUMPI MASATE 2:33

Tua ahih ciangin mi thahna hangin gimna pen Joabʼ lu tung le ama suanlekhakteʼ lu tungah a tawntungin hong tungkik ding hi. Ahih hangin Davidʼ tung, ama suanlekhakteʼ tung, ama innkuan tung le ama kumpi tokhom tungah Topaʼ kiang panin a tawntung nopna om ding hi,” a ci hi.

1 KUMPI MASATE 2:45

Ahih hangin Kumpi Solomon thupha kipia-in, a tawntungin Topaʼ mai ah a tokhom kikipsak ding hi,” zong a ci lai hi.

1 KUMPI MASATE 10:9

Nang tungah lungdamin Israel kumpi tokhom tungah nang a hong koih Topa na Pasian in thupha ngah tahen! Topa in Israel it tawntung ahih manin nangmah in thutang le thuman na sepkhiat theih nadingin amah in kumpi-in nang hong bawl hi,” a ci hi.

Late 45:7

thuman deihin gitlohna na mudah hi. Tua ahih ciangin Pasian ahi, nangma Pasian in na khangualte tungah a kikhai to-in lungdamna sathau nang hong nilh zo a,

Late 89:5

Topa aw, na nasepna a lamdangte, vantungte phatsak inla, mi siangthoteʼ kikhopna sungah na thumanna phatsak in.

Isaiah 11:5

Amah in thuman le thutak tawh ama mite uk ding hi.

Isaiah 32:1

En un, ni khat ni ciangin thuman takin kumpi khat in hong uk dinga, uliante in thutang tawh hong uk ding uh hi.

Isaiah 37:32

Bang hang hiam cih leh a omlaite, Jerusalem pan ahi zongin a suakta teng, Zion Mual panin ahi zongin paikhia ding uh hi. Vanglian Topa’ deih luatna in hih thu hong tungsak ding hi.

Daniel 7:14

Amah in vangliatna, minthanna le kumpi za ngah ahih manin minamkimte, minam tuamtuamte, pau nam tuamtuamte khempeuh in ama na a sem ding uh ahi hi. Amah in a tawntungin uk dinga, a kumpi gam a bei ngei kei ding hi.