Isaiah 7:4 - Tedim Bible Revision 2017

⁴ ama tungah, ‘Kidawm inla, om khinkhian in. Lau kei in. Syria kumpipa Rezin le Remaliahʼ tapaʼ hehna pen, sing tum bang nih a khute tawh kibang lel ahih manin na lung gimsak kei in.

Tedim Bible

⁴ ama tungah, ‘Kidawm in la, om khinkhian in; lau kei in, Siria gam kumpipa Rezin leh Remaliah’ tapa’ hehna pen, sing tumbang nih a khute tawh kibang lel ahih manin kilunggim sak kei in.

Isaiah 7:4 Referans Kwoze

Isaiah 35:4

Lungsim patau-in, a lauthawng mite kiangah, “Thakhauh un, lau kei un! En un, na galte uh tungah phu hong laksak dingin Pasian hong pai dinga, amah in note hong hon khia ding hi,” ci un.

Kah la 3:26

Tua ahih ciangin thuak zawhna tawh ngak kenkan zo lehang a hoih pen ahi hi. A hong hotkhiat ding amah ngak ni.

Isaiah 30:15

Bang hang hiam cih leh Israel-teʼ Siangtho Pa, Topa Pasian in, “Kiheikikna le khawlna bek tawh note in suahtakna na ngah ding uh hi. Daitakin omna le muanna pen nomauʼ thahatna hi ding hi,” a ci hi. Ahih hangin note na tua ci kei uh a,

Thu-hilhkikna 20:3

amaute kiangah, ‘Israel-te aw, za un. Tu ni-in na langte uh a do dingin na nai uh hi. Na lungsim uh lausak kei un. Lau kei un, liing kei un, amaute kihta kei un.

Mattiu 24:6

A nai, a gamla ah gal kidona thu na za ding uh hi. Hihte a piang mah ding hi a, ahi zongin a bei nading hi nai lo ahih manin patau kei un.

Zekhariah 3:2

Topaʼ vantungmi in Satan kiangah, “Satan aw, Topa in nang hong mawhsak hi. Jerusalem a it Topa in nang hong mawhsak hi. Hih Joshua pen meikhuk sung panin a kiteen khia singkhuah tawh kibang hi,” a ci hi.

2 KHANG TANGTHU NIHNATE 20:17

Note in hih kidona ah na do ding uh kisam lo hi. Judah gam mite le Jerusalem khua mite aw, na panmun uh la-in taang loin ding unla, noteʼ tangin Topaʼ gualzawhna mu un,’ ci hi. Kihta kei unla, lungkia kei un. Zing ciangin amaute a do-in pai un. Topa in note hong ompih ding hi,” a ci hi.

Amos 4:11

Sodom le Gomorrah khuapite ka suksiat bangin note pawl khat kong susia hi. Meikhuk panin a kiteen khia singkhuah khat tawh na kibang uh hi. Tua bang hi napi-in kei lamah nong kihei kei uh hi, Topa in ci hi.

Isaiah 30:7

Bang hang hiam cih leh Egyptʼ huhna bangmah man loin a hawmpi ahi hi. Tua ahih manin, “Taang loin a tu hithiat Egypt,” ci-in min ka phuah hi.

Isaiah 10:24

Tua ahih ciangin Topa, Vanglian Topa in thu gen a, “Zion ah a teeng ka mihingte aw, Egypt miteʼ hih bangin amaute in molhtum tawh hong satin a ciangkhut uh hong liik ciangin Assiria mite kihta kei un.

Isaiah 8:4

Bang hang hiam cih leh naungek in, ‘Nu aw, pa aw,’ a cih theih ma-in Damaskas khuaʼ hauhna le Samaria khua sunga a om a kisut vante, Assiria kumpipa in la-in masuan ding hi,” hong ci hi.

Isaiah 7:8

Bang hang hiam cih leh Syriaʼ lutang, Damaskas khuapi hi a, Damaskasʼ lutang, Rezin ahi hi. (Kum sawm guk le kum nga sungin minam ahi zo nawn lo zah dongin Efraim kitamzan gawp ding hi.)

1 SAMUEL MASA 17:32

Tua ciangin David in Saul kiangah, “Ama hangin kuamah lungkiasak kei in. Na nasem pa pai-in hih Filistia-pa tawh ka va kido ding hi,” a ci hi.

Mattiu 10:28

Pumpi a thah khit ciangin kha a that thei lote na kihta kei un. Hell khuk sungah pumpi le kha a nihin a susia thei pa na kihta zaw un.

Isaiah 41:14

Lungno bang ahi lel Jakob, no Israel mite aw, lau kei un! Note kong huh ding hi, Topa in ci hi. Note hong honpa pen Israel-teʼ Siangtho Pa ahi hi.

Isaiah 7:1

Uzziahʼ tapa Jotham, Jothamʼ tapa Ahaz ahi Judah kumpipaʼ hun laitakin, Syria kumpipa Rezin le Remaliahʼ tapa Pekah ahi Israel kumpipa, Jerusalem khuapi a sim dingin kuan to uh a, ahih hangin amaute in zo zo lo uh hi.

Isaiah 7:9

Efraimʼ lutang, Samaria hi a, Samariaʼ lutang, Remaliahʼ tapa ahi hi. Hih thu upna kho na neih kei leh, nang na kip kei ding hi,’ va ci in,” ci-in a gen hi.

Isaiah 37:6

Isaiah in amaute tungah, “Na topa uh kiangah, ‘Topa in hih bangin ci hi: Assiria kumpipaʼ nasemte in keimah a hong simmawhna na zak sa uh thute hangin lau kei un.

2 KUMPI NIHNATE 15:27

Judah kumpi Uzziahʼ kum sawm nga le nihna kumin Remaliahʼ tapa Pekah in Samaria panin Israel tungah uk ding kipan a, kum sawm nih sung uk hi.

Isaiah 8:6

“Hih mite in dam takin a luang didi Shiloah tuite nial uh a, Rezin le Remaliahʼ tapaʼ mai ah launa tawh liingliang uh hi.

Habakkuk 2:3

Hih thu a tun nading hun hi pah nai lo ahih manin lai-in ciamteh in. Ahi zongin hong tung baih ta dinga, kong lah khempeuh a manin hong tung ding hi. A tung hak tawh a kibang kha ahi zongin ngak keikai in. Ka seh hun a cin ciangin hong tung takpi dinga, zekai lua nawn lo ding hi.