Isaiah 55:3 - Tedim Bible Revision 2017

³ Ka mite aw, ka thu ngai unla, kei kiangah hong pai un. Na nuntak theih nadingun a thu hong za un. David ka it mah bangin keima itna kip, tawntung thuciamna note tawh ka bawl ding hi.

Tedim Bible

³ Ka mite aw, ka thu ngai un la, kei kiangah hong pai un; nuntakna na ngah theih nadingun hong za un; David tungah ka kamciam mah bangin, keima itna kip ahi tawntung thuciamna note tawh ka bawl ding hi.

Isaiah 55:3 Referans Kwoze

Jeremiah 32:40

Amaute tungah a tawntungin hoihna ka bawl den nadingin amaute tawh tawntung thuciamna khat ka bawl ding hi. Kei kiang panin a kiheikhiat loh nadingun amaute sungah kei hong zahtak nading uh lungsim ka guan ding hi.

Mattiu 11:28

“Na semin van gik pua-in a gim mite khempeuh aw, ka kiangah hong pai ta un. Note tungah lungsim tawldamna kong pia ding hi.

Paunak 4:20

Ka ta aw, ka thugente don inla, ka kammalte ngai in.

Johan 10:27

Keima tuute in ka aw za-in thei uh ahih manin kei hong zui uh hi.

Sawltak 13:34

Muatna a thuakkik ngei nawn lo dingin sihna panin amah a hinkiksakna tawh kisai-in Pasian in a thugenna ah, ‘David tungah ka ciam sa mah bangin note tungah thupha siangtho kong pia takpi ding hi,’ ci hi.

Piancilna 17:7

“Nang le nangʼ khit cianga na suanlekhakte tungah Pasian hih nading tawntung thuciam nadingin kei le nangʼ khit cianga na suanlekhakteʼ tungah amauʼ khang tawntungin ka thuciamna ka kipsak ding hi.

Johan 6:37

Ka Pa in kei tungah a hong piak mi peuhmah ka kiangah hong pai dinga, ka kiangah a hong pai mi peuhmah ka hawl khia kei ding hi.

Isaiah 61:8

Bang hang hiam cih leh keimah Topa in thutang deihin, miʼ nate suhna le khialhna ka mudah hi. Amaute tungah amauʼ thaman thuman takin ka pia dinga, tawntung thuciamna amaute tawh ka bawl ding hi.

Late 78:1

Ka mite aw, keima hilhna ngai unla, ka kam tawh ka thugente na bil uh hong ngat un.

Isaiah 54:8

Hehluatna hangin tomno sung nang kiang panin ka maitang ka seel a, ahih hangin tawntung itna tawh nang kong hehpihkik ding hi, nangmah a hong hon khia Topa in ci hi.

Siampi Laibu 18:5

Tua ahih ciangin note in ka thukhamte le ka biakna ngeina kipte na zui ding uh hi. Tuate a zui mi peuhpeuh nungta ding hi. Kei pen Topa ka hi hi.

Hebru 13:20

Ama sihna hangin Tuucing Lianpa suakin, a sisan tawh tawntung thuciamna a kipsak i Topa Jesu pen sihna panin a thokiksak, eite tungah nopsakna a hong pia Pasian in,

Johan 8:47

Pasian kiang panin a paite in Pasianʼ thugen za thei hi. Ahi zongin note pen Pasian kiang pan hi lo na hih manun Pasianʼ thu na ngai nuam kei uh hi,” ci-in a dawng hi.

Mattiu 17:5

Tua bangin a pau laitakun meii ngo hong kaai vatin amaute hong khuh a, tua meii lak panin aw khat hong ging vatin, “Hih pa pen ka it, ka lung a kim mahmahna ka Tapa ahi hi. Ama thu na ngai un,” a hong ci hi.

Jeremiah 50:5

Zion khua lampi a dong ding uh a, tua khua lam maingatin, ‘Hong pai un. A kimangngilh ngei nawn lo ding tawntung thuciamna khat Topaʼ tungah ciam khawm dih ni,’ a ci ding uh hi.

Jeremiah 33:26

Jakob le ka nasem pa Davidʼ suante ka nial dinga, Abraham, Isaac le Jakobʼ suante a uk dingin amauteʼ lakah mi khat zong a teel lo ding mah ka hi hi. Ahi zongin tu-in tua bang hi loin amaute ka hausakkik dinga, ka hehpih ding hi,” a hong ci hi.

Jeremiah 30:9

Topa, amauʼ Pasianʼ na ahi a, amauteʼ kumpipa-in ka koih ding Davidʼ na ahi zongin a sem zaw ding uh hi.

Late 119:112

Nangma ngeina kipte ka sih mateng a zui tawntung dingin ka lungsim ka khensat hi.

Late 89:28

Amah ka itna ka kipsak tawntung dinga, ama tungah ka thuciamna ka kipsak tawntung ding hi.

2 SAMUEL NIHNA 23:5

Hi hi, ka innkuan zong Pasian tawh tua bangmah hi lo ahi hiam? Bang hang hiam cih leh amah in tawntung thuciamna kei tawh hong bawl a, na khempeuh a hoih a kipin hih hi. Bang hang hiam cih leh keimah hong huhin, ka deihna khempeuh tangtungsak ding hi lo ahi hiam?

Mattiu 13:16

Ahi zongin noteʼ mit in mu-in na bil un za ahih manin a hampha mahmah na hi uh hi.

ROM (Romans) 10:5

Moses in a laigelhna sungah, “Thukham deihna bangin a gamta zo mi khempeuh a nungta ding hi,” ci-in Thukham zuihna hangin Pasian tawh kipawl theih nading thu a na gen hi.

Johan 7:37

Pawi bei ni ding pen a thupi pen ni hi a, tua ni-in mihon lakah Jesu dingin nakpi takin kiko a, “A dangtak na om uh leh ka kiangah hong pai unla tui hong dawn un.

2 KHANG TANGTHU NIHNATE 6:42

Topa Pasian aw, na sathau nilh pa nial kei in. Na nasem pa David na itnasa hong phawk in,” a ci hi.

Late 119:175

Nang kong phat theih nadingin kei hong nungtasak inla, nangmah biakna ngeina kipte kei hong huhsak in.

Isaiah 51:4

“Ka mite aw, ka thugen hong ngai un. Minamte tungah thu ka hilh a, keima thukham in amaute tungah khuavak tun ding hi.

Isaiah 54:10

Bang hang hiam cih leh mual liante kihemin, mual neute a kikhiin zongin nang kiang panin ka itna kip paikhia ngei lo dinga, na nopsak nading ka thuciamna kin lo ding hi, nang a hong hehpih Topa in ci hi.

Jeremiah 38:20

Kei zong, “Amauteʼ kiangah nang hong kipia lo ding hi. Tu-a kong gen bangin Topaʼ thu mang in. Tua hileh nang adingin hoih dinga, na nuntakna hong kimap ding hi.

Ezekiel 16:60

Ahi zongin na neu lai-a nang tawh i thuciamna len kipin, a kimang tawntung ding thuciamna nang tawh ka bawl ding hi.

Ezekiel 34:24

Topa ahi keimah, amauteʼ Pasian ka hi dinga, ka nasem pa David, amaute a ukpa hi ding hi. Topa ahi keimah in hih thu ka gen khin hi.

Ezekiel 37:26

Amaute lungmuangin a om tawntungna ding uh thuciamna khat ka bawl dinga, amaute thupha pia-in a mi ka pungsak ding hi. Amauteʼ lakah a om tawntung dingin ka biakinnpi ka phut ding hi.

Amos 5:4

Tua ahih manin Topa in Israel mite tungah hih bangin ci hi: Kei hong zong un; tua hileh na nungta ding uh hi.

Amos 5:6

Topa zong un; tua hileh na nungta ding uh hi. Amah na zon kei uh leh Josef mite tungah meikuang bangin amah hong kuang dinga, tua mei in Bethel a om mite kangtumin, tua mei a phelh ding kuamah om lo ding hi.

Piancilna 49:10

Judah in kumpi ciangkhut len tawntung dinga, a suan a khakte in zong ukna aana nei tawntung ding hi. Minam dangte in ama tungah siah puak dinga, zahtakna tawh ama mai ah kun ding uh hi.

Paikhiatna 15:26

“Note in Topa na Pasian uh thu limtakin na ngaih uh a, ama mai ah a man nate hihin, ama thupiakte don a, ama ngeina kipte khempeuh na zuih uh leh, Egypt miteʼ tungah ka tunsak natnate khat beek noteʼ tungah kong tungsak kei ding hi. Bang hang hiam cih leh kei pen Topa, note hong damsak pa ka hi hi,” a ci hi.

2 SAMUEL NIHNA 7:29

Tua ahih ciangin tu-in nangma mai ah a om tawntung theih nadingin na nasem paʼ suanlekhakte thupha piak ding hong lungkim in. Bang hang hiam cih leh Topa Pasian aw, nangmah in na gen khin a, nangma thupha tawh na nasem paʼ suanlekhakte thupha kipia tawntung ding hi,” a ci hi.

Late 89:29

Ama suanlekhakte kumpi ka hisak ngitnget dinga, a ukna za, vantung bangin ka kipsak ding hi.

Paunak 7:2

Kong gen bangin gamta lecin na nungta ding hi. Kong thuhilhte, na mitnauta bangin hoihtakin kem in.

Ezekiel 34:25

Amaute lungmuang takin a om theih nadingun amaute tawh thuciamna khat ka bawl ding hi. Gam sung panin a lauhuai gamsa khempeuh ka beisak dinga, gamlak ah nuam takin gamta-in a lum thei ding uh hi.