Isaiah 34:10 - Tedim Bible Revision 2017

¹⁰ Sun le zanin mit lo dinga, vantung lamah a khu kah to ngitnget ding hi. Khang khat pan khang khat, a hawmguakin om dinga, kuamah in nawk ngei nawn het lo ding hi.

Tedim Bible

¹⁰ Sun leh zanin mit lo ding a, vanah a khu kahto ngitnget ding hi. Khang khat pan khang khat, a hawm guakin om ding hi; kuamah in nawk ngei nawn het lo ding hi.

Isaiah 34:10 Referans Kwoze

Mangmuhna 19:3

Tua ciangin khatvei kikokik leuleu uh a, “Pasian phat un! Tua khuapi a katna khu tatsat loin van lamah khu to tawntung hi,” a ci uh hi.

Isaiah 66:24

Amaute a ciah uh ciangin kei hong lehdo miteʼ luanghawmte en ding uh hi. Bang hang hiam cih leh amau a ne thante si ngei loin, amau a kihalna mei mit ngei lo dinga, amaute pen mi khempeuhʼ kih hi ding hi, a ci hi.

Isaiah 13:20

Khang tawntungin tua lai ah kuamah teeng lo dinga, tua lai ah kuamah omngei nawn lo ding hi. Arabia mite kuamah in tua lai ah a puanbuk lam lo dinga, tuucingte kuamah in tua lai ah a tuute lumsak lo ding hi.

Mangmuhna 18:18

a khuapi katna khu a muh uh ciangin, “Hih zahin a lian khuapi koi lai ah om ahi hiam?” ci-in a kiko uh hi.

Ezekiel 29:11

Na gam sungteng, mihing in ahi a, ganhing in ahi zongin sik nawn lo ding hi. Kum sawm li sung bangmah om lo ding hi.

Isaiah 1:31

A thahat mipa pen patlom tawh kibang dinga, ama nasepna pen mei-ek suak ding hi. Kuamah in phelh zo loin amau tegel kaang tum khawm ding uh hi.

Jeremiah 7:20

Tua ahih manin Topa in kong cih in ah: En in, ka hehna le ka thangpaihna hih munah ka bua dinga, mihingteʼ tung le ganhingteʼ tung, lo lai-a singkungte le leilak a singgahte tungah ka sung ding hi. Ka hehna mei bangin kuang dinga, kisumit lo ding hi.

Isaiah 24:1

En un, Topa in leitung hawmsuak sakin gamkhing suaksak dinga, amah in lei maitang huiheek gawpin, a tunga a teeng mite thehthang gawp ding hi.

Isaiah 34:17

Amah in amaute adingin leitang hawmsak dinga, amauʼ tanh ding ciat a pia ding hi. Amaute in tua gam nei tawntung ding uh a, khang khat pan khang khat dongin teeng paisuak ding uh hi.

Nahum 2:10

Nineveh khuapi kisusia a, kinusiacipin gamkhing suak hi. Launa lungsim tawh kidimin khukte liing kelkel a, mi khempeuh lunggimin a mai ah sisan teeng lo hi.

Jeremiah 49:18

Topa in kong cih in ah, Sodom khua, Gomorrah khua le a kiim a khuate a kisiat gawp bangin, tua lai munah kuamah teeng lo dinga, kuamah a peem kei ding hi.