Isaiah 1:26 - Tedim Bible Revision 2017

²⁶ A masa-a bangin na thukhente, a kipat cil a bangin na upate ka koihkik ding hi. Tua khit ciangin nang pen thuman khuapi, thutak khuapi, hong kici ding hi,” a ci hi.

Tedim Bible

²⁶ A masa-a bangin na thukhente, a kipat cil-a bangin na upate ka koih kik ding hi. Tua khit ciangin nang pen, thuman khuapi, thutak khuapi, hong kici ding hi.”

Isaiah 1:26 Referans Kwoze

Zekhariah 8:3

Ka khuapi siangtho Jerusalem ah ciahkikin ka teeng ding hi. A citak khuapi, ci-in minthang dinga, Vanglian Topaʼ mual pen mual siangtho kici ding hi.

Jeremiah 33:7

Judah mite le Israel mite ka hausakkik dinga, a nidang a a omngei bangun ka omsakkik ding hi.

Mangmuhna 21:27

Ahi zongin a siang lo, a hoih loin a gamta mi, zuau a gen mite kuamah lut thei lo ding uh a, a nungta mite a kigelhna Tuuno laibu sungah a min a omte bek tua khuapi sungah lut thei ding uh hi.

Zekhariah 8:8

Jerusalem khua sungah ka tunpihkik ding hi. Amaute pen keima mi hi-in, kei zong amauʼ Pasian ka hi dinga, amau tawh ka thuciamnate limtakin ka zui ding hi.

Zefaniah 3:13

Israel mi a om lai sunte, midangte tungah gilo nawn lo ding uh a, zuau thu gen nawn loin, mi khem ding zong ngaihsun nawn lo ding uh hi. Amaute cithei-in lungmuangin om ding uh a, kuamah kihta nawn loin om ding uh hi,” a ci hi.

Ezekiel 45:8

Hih mun teng pen Israel gam sung panin Israel ulianteʼ neih hi ding hi. Tua ahih manin amaute in Israel mite bawlsia nawn lo ding uh a, mun a om lai teng khempeuh, a minam zui-in Israel minamte a tangsak ding uh hi.

Jeremiah 33:11

Ahih hangin lungdamna aw le kipahna awte, zi nei thakte le mothakteʼ awte kizakik ding hi. Topaʼ biakinn ah mite hong pai-in lungdam kohna-in: ‘Vanglian Topaʼ tungah lungdamna ko un. Bang hang hiam cih leh Topa hoih a, ama itna kip tawntung hi,’ ci-in a lasakna awte uh a kizakik ding hi. Bang hang hiam cih leh Topa in kong cih in ah, a masa-a mah bangin hih gam ka hausakkik ding hi.

Jeremiah 31:23

Vanglian Topa, Israel miteʼ Pasian in hong genin ah: “Keimah in amaute a gam uh ah ka omsakkik ciangin, Judah gam le a khuapite uh ah amaute in, ‘Thuman thutak a teenna mual siangtho aw, Topa in thupha hong pia tahen,’ ci-in a genkik leuleu ding uh hi.

Isaiah 60:21

Na mihingte khempeuh thuman ding uh hi. Keima min a than nadingin keima suan sa kung, ka khut tawh ka sep sa gam pen amaute in nei paisuak ding uh hi.

Isaiah 60:14

Nang hong nengniamteʼ tate na mai ah a kun sa-in hong pai ding uh a, nang hong simmawh mi khempeuh na khe mai ah hong bok ding uh hi. Amaute in nang pen Topa’ khuapi, Israel-teʼ Siangtho Paʼ Zion, hong ci ding uh hi.

Isaiah 33:5

A sangna munah teeng ahih manin Topa kipahtawi hi. Amah in thutang le thuman tawh Jerusalem dimsak ding hi.

Isaiah 1:21

A thutak, thutang tawh a kidim ngeisa khuapi, bangci-a a paktat numei tawh kibang ta ahi hiam? Ama sungah thumanna omngei napi-in tu-in mi thatte bek a om ta hi.

Gamlak-vakna 12:3

Moses a lungnem mahmah hi a, leitung a om mi khempeuh sangin a lungnem zaw ahi hi.

Zefaniah 3:9

“Tua ciangin minamteʼ lungsim ka hei dinga, amaute in keima tung bekah thu hong ngenin, lungsim kikhatin ka na hong sem ding uh hi.

Gamlak-vakna 16:15

Moses heh mahmah ahih manin Topaʼ kiangah, “Amauʼ biakna thupi ngaihsut kei in. Amaute tungah bangmah ka gamta khial kei a, a la uh khat beek nangawn ka laksak kei hi,” a ci hi.

Isaiah 54:14

Thuman le thutang in nang hong thahatsak ding hi. Nenniamna tawh na kigamla dinga, nang na lau kei ding hi. Kihtakna tawh na kigamla dinga, nangma nai ah tuate hong pai lo ding hi.

Micah 4:8

Pasian in a mite a etna Jerusalem khuapi aw, nidang a na vangliatna na ngahkik dinga, kumpi khuapi na suakkik ding hi.

Isaiah 2:3

mi tampite hong pai-in, “Hong pai un, amah in ama zialetongte hong hilh theih nading le ama lampite i zuih theih nadingin Jakobʼ Pasianʼ inn, Topa’ mualah pai to ni,” a ci ding uh hi. Bang hang hiam cih leh Topa in Zion panin thu hong gen dinga, Jerusalem khua panin Topa’ thuhilhna hong paikhia ding hi.