Hosea 9:1 - Tedim Bible Revision 2017

¹ Israel mite aw, midangte bangin lungdamin kipak kei un. Na Pasian uh na nusia uh a, ama tungah na citak kei uh hi. Numei paktatte bangin mun citeng ah Baal tungah na kizuak uh a, a hong leina ante hangin na lungdam uh hi.

Tedim Bible

¹ Israel mite aw, mi dangte bangin lungdamin kipak kei un. Na Pasian uh na nusia uh a, ama tungah na citak kei uh hi. Numei paktatte bangin mun citeng ah Baal tungah na kizuak uh a, a hong leina ante hangin na lungdam uh hi.

Hosea 9:1 Referans Kwoze

Hosea 10:5

Bethaven khua-a bawng no milim a taanna uh hangin Samaria khuapi sunga a teeng mite lau-in liing ding uh a, amaute le tua milim na a sem siampite a thum ding uh hi. A etlawmna teng a maiman ciangin a tau ding uh hi.

Hosea 4:12

Ka mite in aisanin singthem peuh thudotin nei uh a, amauʼ thu theihnopte, ciangkang peuh in gen tazen hi. Amaute in kei hong taisan uh a, a paktat numei bangin pasian dangte a zuan uh hi.

Jeremiah 44:17

Ahih hangin ka ciam sa uh bangin kote, ka pute ka pate, ka kumpite uh le kumpi uliante in Judah gam khuapite le Jerusalem khua kongzing lakah ka hih ngei uh bangin vantung kumpinu kiangah paknamtui halin tui dawn biakna ka hih zaw ding uh hi. Bang hang hiam cih leh ka tua cih uh ciangin an tampi ka nei uh a, hau-in gimna zong ka thuak kei uh hi.

Jeim 5:1

A haute aw, tu-in ka thugen hong ngai dih un. Note tungah a hong tung ding lungkhamna hangin kapin thum un.

Jeim 4:16

Ahi zongin note kihisakin na kisial uh hi. Tua bangte hoih het lo hi.

Amos 6:13

Lodebar khua bang lel na lak zawhna uh ah na lungdam uh a, “Eima thahatna tawh Karnaim khua i la zo hi,” na ci uh hi.

Amos 3:2

Leitung minam khempeuh lakah note bek hong thei-in, note bek ka hong don hi. Tua ahih manin na khialhna khempeuh uh hangin note gim kong pia ding hi.

Hosea 5:7

Topaʼ tungah amaute citak lo uh a, midangte tawh zawlta nei uh hi. Tu-in amaute le a neihsa khempeuh uh kisusia ding hi.

Hosea 5:4

Amauteʼ gamtatna in a Pasian kiang uh zuansak thei lo hi. Amaute in nakpi takin milim biaknopna lungsim nei uh ahih manin Topa phawk kha lo uh hi.

Hosea 2:12

Ka pasal it dangte in thamanin hong piak hi, ci-in a gen a leengguite le a theikungte ka susia dinga, gamsate in tuate suksiatsakin gamlakpi a suak ding hi.

Ezekiel 21:10

Mi thah nadingin kitat hiam sitset a, khuaphia bangin a tee zialzial dingin a kipuah hi. Note in thuhilhna ngai nuam lo na hih manun, kuamah in tua namsau kho thei lo hi.

Ezekiel 20:32

Note in na lungsim ngaihsutna uh khensat khinin, gam dangah a teeng minam dangte mah bangin sing le suang na bia nuam uh hi. Ahi zongin noteʼ ut bang hi thei ngei lo ding hi.

Kah la 4:21

Edom le Uz mite aw, tu-in nuinui mai unla, ahih theih lai teng kipak un. Bang hang hiam cih leh siatna hun hong tung dinga, a hong tun ciangin na guaktangun omin, maizumin na om ding uh hi.

Isaiah 17:11

tuate na suan ni mahun thakhatin khang a, na tuh ni uh a zing ciang mahin a hong pak hangin note in a gah na lo kha kei ding uh hi. Gimna le lungkhamna hong tun ni-in tuate maimang ding hi.

Amos 8:10

Na lungdam pawite uh dahna ka suaksak dinga, na lasaknate uh kahna awging ka suaksak ding hi. Dahna limin puanhampi na silh ding uh a, na sam uh zong na mettol ding uh hi. A tapa khat neihsun a sihsuah nupa na bang ding uh hi. Tua hun pen a tawp dongin nasia semsem ding hi.

Late 73:27

Bang hang hiam cih leh nang tawh a kigamlate kisia ding uh a, nangma tungah a hong khialte na beisak ding hi.

Amos 4:5

Lungdam kohna-in silngo sawh anlum va pia unla, utthu-a biakpiaknate va pia-in va kisial un. Hihte pawl pen noteʼ hih nop pawl ahi hi, Topa in ci hi.

Jeremiah 2:19

Na gitlohna mah in nangmah hong thuhilh dinga, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam het loin kha velval hi, cih thu thei inla mu in, Vanglian Topa Pasian in ka hong ci hi.

Jeremiah 2:20

“Sawt pek lai a kipanin ka hakkol kuaitanin ka ukna nong nial a, hong kihenna khau su tatin, ‘Na na ka sem kei ding hi,’ na hong ci hi. Numei paktatte na bang uh a, mual sang tung teng le sing liim nuai tengah milim na bia kawikawi uh hi.

Ezekiel 16:15

“Ahi zongin na melhoihna le na minthanna a sia lamin zangin, na tuah peuhpeuh luppih ding zolna in na zang hi.

Ezekiel 16:30

“Topa Pasian in hih bangin ci hi: A bangci lawmlawm na hi hiam? Zumna mel thei loin hih bangin na paktat hi.