Hosea 8:14 - Tedim Bible Revision 2017

¹⁴ Bang hang hiam cih leh Israel mite in amau a Piangsak pa mangngilh uh a, inn lianpipite a lam uh hi. Judah mite in zong kulh nei khuapi tampi a lam thuah uh hi. Keimah in tua khuapite mei tawh halin a inn lianpite uh ka kaang tumsak ding hi, ci hi.

Tedim Bible

¹⁴ Bang hang hiam cih leh Israel mite in amau a Piangsakpa mangngilh uh a, inn lianpipite lam uh hi. Judah mite in zong kulh nei khuapi tampi lam thuah uh hi. Keimah in tua khuapite mei tawh halin a inn lianpite uh ka kangtumsak ding hi, ci hi.

Hosea 8:14 Referans Kwoze

Thu-hilhkikna 32:18

Note a hong Hon khia pa na phawk kei uh a, note a hong suaksak Pasian na mangngilh uh hi.

Jeremiah 17:27

Ahih hangin ka thu nong ngaih kei uh a, Sabbath ni siangthosak loin, Jerusalem khua kongpite ah van pua-in nong lutpih uh leh, tua kongpite ka hal ding hi. A mei in Jerusalem khua kumpi innte lawhin kaang tum dinga, a mei a kiphelh zo kei ding hi,’ va ci in,” hong ci hi.

Amos 2:5

Tua ahih ciangin Judah gam sungteng ka kaang tumsak dinga, Jerusalem mun muanhuai teng a kaang tum ding hi.

Hosea 13:6

Ahi zongin gam hoihna mun tungin na gil uh a vah ciangin na lungsim uh kiphasakin kei nong mangngilh uh hi.

Isaiah 17:10

Nomau hong hon khia Pasian note in mangngilhin, nomauʼ belh Suangpi phawk lo na hih manun note in biakna huan bawlin kung hoihte suan a, kung namdangte tawh pehin,

Amos 1:10

Tua ahih ciangin Taia khuapi kulh ka kaang tumsak dinga, a mun muanhuai teng kaang tum mang ding hi.

Efesa 2:10

Eite a hong bawlpa pen Pasian hi a, Jesu Khris tawh i kipawl ciangin i nuntakna ah gamtat hoih a nei dingin a hong bawl ihi hi. Hih pen eiteʼ om zia dingin a na ngaihsut kholh sa ahi hi.

Amos 1:14

Tua ahih ciangin Rabbah khuapi kulh ka hal tum dinga, a mun muanhuai teng khempeuh kaang tum ding hi. Galdo a kikona aw ging dinga, tua kidona awging khuapi huihnung bang ding hi.

Amos 1:12

Tua ahih ciangin Teman gam sung khempeuh ka kaang tumsak dinga, Bozrah khuapi mun muanhuai teng kaang tum ding hi.

Amos 1:4

Tua ahih manin Hazael innkuante mei tawh ka hal dinga, a meikuang in Kumpi Benhadadʼ mun muanhuaite kaang tum ding hi.

Hosea 2:13

Kei hong mangngilh tanvei sung, Baal pasian tungah paknamtui a hal tanvei sung le a pasal it dangte tawh a kikhawl dingin a manpha kizepna a tuamtuamte tawh a kizep hun tanvei sungzah mah gim ka pia ding hi.

Jeremiah 23:27

A pute a pate un keiʼ min hong mangngilhin Baal a biak uh bangin a mangmat uh a gen kawikawina uh tawh ka mite in ka min hong mangngilh ding uh hi, ci-in a ngaihsun uh hi.

Jeremiah 3:21

Mual tung panin awging khat hong kiza a, Israel miteʼ kahna le tauna awging ahi hi. Lam a pialna hang uh le Topa a Pasian uh a mangngilhna hang uh ahi hi.

Jeremiah 2:32

Nungak khat in a kizepnate mangngilh thei ahi hiam? A kipi mothak in a mothak puante mangngilh thei ahi hiam? Ahih hangin ka mite in sim zawh loh ni tampi sung a hong mangngilh uh hi.

Isaiah 42:25

Tua ahih ciangin amah in ama hehna so leh galkidonate eite tungah hong tungsak hi. Israel mi khempeuh lakah ama hehna mei bangin hong kuang a, ahih hangin eite in bangmah i thei kei hi. Tua bang i thuakna hangin eite in bangmah i phawk thei tuan kei hi.

Isaiah 42:13

Mi thahatpa bangin Topa kuan khia a, gal a do mipa bangin ama hehna sosak hi. Amah kiko-in nakpi takin awng khia a, ama hatna a galte tungah a lak hi.

Isaiah 29:23

Bang hang hiam cih leh keima khut tawh ka bawl sa amauʼ tate a muh uh ciangin amaute in keima min hong phat ding uh hi. Amaute in Jakobʼ Siangtho Pa, a siangtho ahihna phawk ding uh a, Israel Pasian zahtakin kihta ding uh hi.

Late 106:21

Amaute in Egypt gam sungah na lianpite a bawl, Hamʼ gam sungah nalamdangte le San Tuipi ah a kihtakhuai nate a bawl, amauʼ Honpa, Pasian mangngilh uh hi.

2 KHANG TANGTHU NIHNATE 27:4

Tua tham loin amah in Judah mual tung gamah khuapite le sing tamna mualte tungah mun muanhuaite le tausangte a lam hi.

2 KHANG TANGTHU NIHNATE 26:10

Tua ciangin amah in gamlak ah tausangte lam a, Shefelah le zanglei ah gan hon tampi nei ahih manin tuikhuk tampi to a, lei nasep uuk ahih manin mual tung le lei hoihna gamte ah lokhote le leenggui puahte a nei hi.

1 KUMPI MASATE 16:31

Nebatʼ tapa Jeroboamʼ khialhnate zuih ding ama adingin a thuzang tawh a kibat mah bangin, amah in Sidon miteʼ kumpi Ethbaalʼ tanu Jezebel zi-in la a, pai-in Baal na semin a bia hi.

1 KUMPI MASATE 12:31

Amah in mual dawnte ah zong biak nading inn lamin mite khempeuh lak panin Levi mi ahi lo mite siampi-in a seh hi.

2 KUMPI NIHNATE 18:13

Kumpi Hezekiahʼ kum sawm le kum lina kumin Assiria kumpi Sennakherib, Judah khuapi kulh a neite khempeuh a sim dingin hong kuan to-in tuate a la hi.

Late 95:6

Hong pai un, amah bia-in kun ni. Eite hong Bawl Topaʼ mai ah khukdin ni.

Isaiah 9:9

“Leiseekte kicim khin hi; ahih hangin suangseek tawh i lam ding hi. Theithek singte kisia khin hi; ahih hangin taamtak sing tawh i khek ding hi,” ci-a kiphasakin lungsim kihisak Efraim mite le Samaria gam sunga teeng mi khempeuh in thei ding uh hi.

Jeremiah 5:17

Amaute in lo-a na ante uh le na an huante uh hong gaihsak ding uh a, na tapate uh le na tanute uh hong thahsak ding uh hi. Na tuu hon, na bawnghonte uh hong gaihsak ding uh a, na leenggah, na theigahte uh hong nek mangsak ding uh hi. Na muan mahmah uh kulhpi tawh a ki-um na khuapite uh namsau tawh hong suksiatsak ding uh hi.

Ezekiel 23:35

“Tu-in Topa Pasian in hih bangin gen hi: Nangmah in kei hong mangngilhin hong nungngat na hih manin na hukna le na paktatna hangin na thuak ding hi,” a hong ci hi.

Hosea 4:6

Ka mite in kei hong phawk lo uh ahih manin ka susia ding hi. No siampite in kei hong phawk nuam loin, ka thuhilhnate nial na hih manun ka siampi dingin kong deih nawn kei a, na tate uh zong siampi-in ka zang kei ding hi.