Hosea 5:9 - Tedim Bible Revision 2017

⁹ Gimthuak ni hun hong tun ciangin Israel mite in siatna thuak ding uh hi. A tung taktak ding thu, Israel mite lakah a gen ka hi hi.

Tedim Bible

⁹ Daan thuak ni hun hong tun’ ciangin Israel mite in siatna thuak ding uh hi. A tung taktak ding thu, Israel mite’ lakah a gen ka hi hi.

Hosea 5:9 Referans Kwoze

Zekhariah 1:6

Ahi zongin ka nasem ahi kamsangteʼ tungtawnin ka hilhkholhna le ka thupiaknate in note dongin hong su kha lo ding sa na hi uh hiam, ka ci hi. Tua ahih ciangin a tawpna ah amaute kisik uh a, hih dinga ka lungsimah ka geel sa bangin amauʼ gamtatna tawh kizui-in gim a pia ka hihna thu a phawk uh hi,’ ci in,” a ci hi.

Isaiah 46:10

A kipat cil-in a tawpna ding thu ka pulak a, tanglai pek panin a piang nai lo nate genin, ‘Ka thugen kip dinga, ka ngimna khempeuh ka tungsak ding hi,’ ka ci hi.

Johan 16:4

Hih bangin a hong gamtat hun uh hong tun ciangin kong gen thute na phawk theih nadingun a hong gen khol ka hi hi. “Note tawh hong om khawm ngawn ka hih manin a kipat tuung lamin hih thute kong gen kei hi.

Amos 7:17

Amaziah aw, tua bangin kampau na hih manin Topa in nang kiangah, ‘Na zi pen khua sungah numei paktat suak dinga, gal sungah na tate si ding uh hi. Na gam kiphelkhamin midang tungah kipia dinga, lawkiteʼ gam sungah nang na si ding hi. Israel mite, galmatin kipaipih ding hi,’ ci hi,” a ci hi.

Amos 7:9

Isaacʼ suanlekhakteʼ biakna munte kinusiacipin, Israel miteʼ siangtho munte kisusia dinga, Kumpi Jeroboamʼ innkuante a sim gawp dingin gal ka kuansak ding hi,” a hong ci hi.

Amos 3:7

Topa Pasian in ama nasem kamsangte tungah ama geelna theisak masa lopi-in bangmah hih het lo hi.

Hosea 8:8

Israel khempeuh kinawmvalhin kisusia dinga, tu nangawnin minam dangte in bangmahin ngaihsun nawn lo uh hi.

Hosea 5:14

Humpinelkaiʼ suk gawp bangin Israel le Judah ka su gawp ding hi. Keimah teekteek in amaute bal gawpin ka paisan ding hi. Amaute ka tal kaih gawp dinga, kuamah in hon zo lo ding hi, a ci hi.

Hosea 5:12

Tua ahih manin Israel ka beitumsak dinga, Judah ka beisak mang ding hi.

Isaiah 48:5

note in, “Ka milim un hihte bawl a, a kisui ka milim uh le a kisung ka milim un thu pia hi,” na cih theih loh nadingun tanglai a kipanin note tungah hih thute kong gen a, tuate hong pian ma-in note tungah kong zasak khol hi.

Isaiah 48:3

A masa lam a nate thu tanglai-in ka gen a, keima kam panin tuate ging khia-in ka kitheithangsak hi. Tua ciangin thakhat thu-in keimah in ka sem a, a hong piang hi.

Isaiah 37:3

Amaute in Isaiah kiangah, “Hezekiah in, ‘Tu ni pen lungkham ni, tai ngah ni, mindai ni ahi hi. Naungek a suah hun tung napi-in a hing khia zo lo nupi tawh i kibang hi.

JOB (Job) 12:14

Pasian in phelkek leh kuamah in lamkik zo lo a, Pasian in thong ah mi koih leh kuamah in suaktasak zo lo hi.

Isaiah 7:16

Bang hang hiam cih leh naupang in a hoih lote nialin a hoihte a teel theih hun ma-in na kihtak uh kumpi nihteʼ gam kinusiacip ding hi.

Hosea 7:12

Amaute a va pai laitakun ka ngen tawh amaute ka na siah dinga, vasa mat bangin ka ngen tawh amaute ka man ding hi. Amauʼ gamtat siatna hangin gim ka pia ding hi.

Hosea 9:7

Gim thuakna hun hong tung ta a, thukkikna hun hong tung ta hi. Tua hun ciangin Israel mite in na thei ding uh hi. Noteʼ mawhna hang le note in kei nong muhdah luat manun, “Hih kamsang pa mihai hi; hih thumu pa lungsim kicing lo hi,” nong ci uh hi.

Micah 6:13

Tua ahih ciangin na mawhna hangun note suksiat ding ka kipan ta hi.