Hosea 5:6 - Tedim Bible Revision 2017

⁶ Topa tungah biakna-in piak dingin a tuute uh le a bawngte uh paipih ding uh a, ahi zongin a mawkna suak ding hi. Topa in amaute nusia khin ahih manin amah mu zo lo ding uh hi.

Tedim Bible

⁶ A tuute uh leh a bawngte uh tawh Topa tungah biakna pia dingin paipih ding uh a, ahi zongin a mawkna suak ding hi. Topa in amaute nusia khin ahih amanin amah mu zo lo ding uh hi.

Hosea 5:6 Referans Kwoze

Johan 7:34

Keima omna munah note hong pai thei lo ding na hih manun tua hun ciangin kei nong zon uh hangin nong mu kei ding uh hi,” a na ci hi.

Paunak 1:28

Tua bang hun ciangin kei nong sam ding uh a, ahi zongin kong dawng kei ding hi. Limtakin kei nong zong ding uh a, ahi zongin koi mahah nong mu kei ding uh hi.

Ezekiel 8:6

Tua ciangin amah in, “Mihing ahi Ezekiel aw, amauteʼ gamtatnate na mu hiam? Israel mite in a bawl uh a muhdahhuai gamtatnate, ka mun siangtho panin a gamla semsem ah kei hong nawh khiatnate en in. Hihte sangin a mindaihuai zaw nangawn na mu lai ding hi,” a hong ci hi.

Kah la 3:44

Na hehna, meiipi zahin sah mahmah ahih manin ka thungetna uh na kiang a hong tung zo kei hi.

Jeremiah 7:4

‘A muanhuai sungah i om hi. Hih pen Topaʼ biakinn ahi hi, Topaʼ biakinn ahi hi, Topaʼ biakinn ahi hi,’ a kicici zuauthute um kei un.

Paunak 15:8

Topa in migiloteʼ biakpiakna kihhuai sa a, thuman miteʼ thungetna ah lungdam hi.

Luka 5:16

Ahi zongin gamdaihna munah Jesu pai khia-in thu a ngen hi.

Jeremiah 11:11

Tua ahih ciangin Topa in kong cih in ah, en un, a pelh theih loh uh gimna amauʼ tungah ka tungsak dinga, kei kiangah a hong kap liang uh zongin ka dawng nawn kei ding hi.

Isaiah 66:3

Biakna-in bawngtal a go pa in mihing zong that hi. Biakpiakna-in tuuno a go pa in ui ngawng zong at hi. An tawh biakpiakna a bawlpa in vok si zong pia hi. Paknamtui tawh phawkna biakpiakna a bawlpa in milim zong bia-in thupha a pia hi. Hih mite amau ut bang ciatin gamta uh a, amauʼ kihhuai gamtatna uh ah nuam a sa uh hi.

Solomon la 5:6

Ka ngaihno a lutsak dingin kong ka hon a, amah na tai khia khinta hi. Amah a taikhiat manin ka dah lua a, amah ka zon hangin ka mu kei a, amah ka sap hangin hong dawng lo hi.

Paunak 21:27

Topa in migiloteʼ biakpiaknate deih lo a, ngimna hoih lo tawh a piakte uh deih lo zaw kan lai hi.

Paikhiatna 10:9

Moses in, “Ka khangnote uh le ka khanghamte uh tawh ka pai khawm ding uh hi. Ka tapate uh, ka tanute uh, ka tuuhonte uh le ka bawnghonte uh tawh ka pai ding uh hi. Bang hang hiam cih leh Topa adingin pawi khat ka kham ding uh hi,” a ci hi.

Micah 3:4

Topaʼ tungah huhna ngenin na kiko hun uh hong tung dinga, ahi zongin amah in note hong dawng lo ding hi. Note gamtat sia na hih manun, na ngetna uh hong ngai lo ding hi.

Ezekiel 8:18

Tua ahih manin amaute in ka heh mahmahna thuak ding uh a, amaute zah loin, zong ka khasiat kei ding hi. Amaute in a thaneih tawpun kei kiangah thu hong nget uh hangin amauteʼ thungetna ka ngai kei ding hi,” a hong ci hi.

Jeremiah 11:14

“Tua ahih manin Jeremiah aw, hih mite ading thu ngetsak kei inla, amauʼ tangin thumsak kei in. Bang hang hiam cih leh amaute in gim ngahin hong sap uh ciangin ka ngai kei ding hi.

Jeremiah 14:12

An a tan uh hangin amauʼ thumna ka ngai kei dinga, meihal biakna le an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisak zaw ding hi,” hong ci hi.

Hosea 8:13

Amaute in gan tawh biak ding utin, a biakna sate ne nuam uh hi. Ahi zongin Topa ahi keimah ka hih leh amaute tungah ka lungkim kei a, amauteʼ mawhnate phawkin tua mawhnate hangin amaute gim ka pia ding hi. Egypt ah amaute ka sawlkik ding hi.

Malakhi 1:10

Vanglian Topa in, “Ka biakna tau tungah, bangmah-a kimang lo mei na tawh mawkmawk theih loh nadingun, note khatpeuh in biakinn kongkhakte khak le-uhcin ka ut hi. Note tungah ka lungkim kei a, nong piak uh biakpiaknate kong sang kei ding hi.

Amos 8:12

Mihingte, leilu pan leitaw dong, Topaʼ thu kanin vak kawikawi ding uh a, ahi zongin mu zo lo ding uh hi.