Hosea 2:5 - Tedim Bible Revision 2017

⁵ A nu uh a paktat hi a, tua ahih manin amaute a paii numei, zumna mel thei loin a gamta ahi hi. Amah in, “Ka it pasal dangte kiangah ka pai ding hi. Amaute in anletui, samul puan le saihadial puan, oliv thau le zu hong pia uh hi,” a ci zaw lai hi.

Tedim Bible

⁵ A nu uh a paktat hi a, tua ahih manin amaute, tua a paai numei in zumna mel thei loin a gamta ahi hi. Amah in, “Ka it pasal dangte kiangah ka pai ding hi; amaute in an leh tui, samul puan leh saihadial puan, leh oliv thau leh zu hong pia uh hi,” a ci zaw lai hi.

Hosea 2:5 Referans Kwoze

Hosea 3:1

Topa in kei kiangah thu hong genkik a, “Lawm a ngai khin sa, pasal tawh a lum khawm sa numei khat tawh va kingai in. Israel mite, pasian dangte kiangah pai uh a, leenggahkeu tawh a va biak uh hangin, amaute ka it lai veve mah bangin tua numei va it in,” hong ci hi.

Hosea 2:8

Ama tungah an, leenggahzu le oliv thau ka piakna le Baal pasian biak nadingin a zat ngun le kham tampi tak a pia pa ka hih lam hong phawk kha lo hi.

Isaiah 1:21

A thutak, thutang tawh a kidim ngeisa khuapi, bangci-a a paktat numei tawh kibang ta ahi hiam? Ama sungah thumanna omngei napi-in tu-in mi thatte bek a om ta hi.

Hosea 9:10

Topa in hih bangin gen hi: Israel kong muh cil-in hoih mahmah a, sehnel gam sunga a gah a zun kiuhkeuh leenggah tawh kibang hi. Na pu na pate uh ka muh cil-in hoih mahmah a, a hun ciangin a min a zun sitset theigah muh tawh kibang hi. Ahi zongin Baalpeor a tun uh ciangin amaute in Baal milim bia pah uh ahih manin, amauʼ biak milimte ka muhdah zahin amaute nangawn ka mudah pah hi.

Hosea 8:9

A hon lak panin a tai khia, a thumang lo gam la bangin Assiria mite tung panin huhna a ngen dingin va tai uh hi. A huh ding uh a deihna-in midangte tungah amau pumpi a va zuak uh hi.

Hosea 4:5

A sun a zan cih om loin na nasepnate uh a kimanna mel om lo hi; kamsangte zong note bangmah hi lel hi. Na nu uh Israel ka susia ding hi.

Hosea 2:2

Tate aw, na nu uh zolbawl un. Amah ka zi hi nawn lo a, kei zong ama pasal ka hih nawn loh hangin a paktatna le midang tawh a mawhnate a khawl nadingin zol un.

Jeremiah 11:13

Bang hang hiam cih leh, Judah aw, na khua om zahzah uh pasian na nei uh a, Jerusalem khua kongzing om zahzah mah, meihal biakna tawh Baal biakna ding a zumhuai biakna taute na bawl tazen uh hi.

Jeremiah 2:20

“Sawt pek lai a kipanin ka hakkol kuaitanin ka ukna nong nial a, hong kihenna khau su tatin, ‘Na na ka sem kei ding hi,’ na hong ci hi. Numei paktatte na bang uh a, mual sang tung teng le sing liim nuai tengah milim na bia kawikawi uh hi.

Isaiah 50:1

Topa in, “Amah ka ciahsakna, na nu a kimakna lai koi ah om ahi hiam? Tua ahih kei leh nang kong zuakna ka leibatnate koi pan ahi hiam? Nomau mawhna hangin note hong kizuak a, nomau khialhna hangin na nu uh kipaikhiasak hi.

Thukhente 16:23

Tu-in Filistia uliante a pasian uh Dagon tungah biakna lianpi khat a pia ding le a gualnuam dingin kikhawm uh hi. Bang hang hiam cih leh amaute in, “I pasian in i khut sungah i galpa Samson hong pia zo hi,” a ci uh hi.

Hosea 1:2

Topa in Hosea tungtawnin Israel-te tungah thu a na gen cil lai-in, amah in Hosea kiangah, “Hih gam mite kei tungah citak loin pasian dangte bia uh ahih manin, nang zong hong tul pih lo ding numei paktat khat teenpih inla, tua nu tawh ta nei in,” a ci hi.

Jeremiah 6:8

Jerusalem khuapi aw, kidawm in. Na kidop kei leh nang kong taisan dinga, kuama ten lohna gam simtham na suak kha ding hi,” a ci hi.

Jeremiah 13:22

Bang hangin hih thute kei tungah hong tung ahi hiam, ci-in na ngaihsut leh na mawhna a liatluatna hang ahi hi. Tua thu hangin na nik hong kihawk gawp a, a hong kibuan gawp ahi hi.

Ezekiel 16:4

Nang na suah lai-in kuamah in hong don lo hi. Na lai hong kitansak lo a, hong kisil lo a, ci tawh zong hong kizut lo a, puan tawh zong hong kitun lo hi.

Ezekiel 16:35

“Tua ahih ciangin a paktat Jerusalem aw, Topaʼ thu ngai in.

Ezekiel 16:39

Na lunggulh miteʼ khut sungah kong pia dinga, na paktat gamtatna munte le na milim biakna munte, amaute in susia gawp ding uh hi. Na puante le a manpha na kizepnate hong lak khiatsakin, na guaktangin hong koih ding uh hi.

Amos 8:13

Tua ni ciangin nungakte le tangvalte dangtakin puk ding uh hi.