Hosea 13:9 - Tedim Bible Revision 2017

⁹ No Israel-te kong su gawp ding hi. Kua in note hong huh zo ding ahi hiam?

Tedim Bible

⁹ No Israelte kong sugawp ding hi. Kua in note hong huh zo ding ahi hiam?

Hosea 13:9 Referans Kwoze

Jeremiah 2:17

Israel aw, Topa na Pasian in lampi ah hong makaih laitakin amah na nusiat manin nang tungah hih bang teng hong tung hi lo ahi hiam?

Jeremiah 2:19

Na gitlohna mah in nangmah hong thuhilh dinga, kei na hong up nawn lohna in nangmah hong mawhsak ding hi. Topa na Pasian nong nusia a, keimah nong kihtak nawn loh ciangin, nuam het loin kha velval hi, cih thu thei inla mu in, Vanglian Topa Pasian in ka hong ci hi.

Thu-hilhkikna 33:26

“Israel aw, nangmah huh dingin vantungah a tuang a liatna tawh vanpi ah a om, Pasian tawh a kibang kuamah dang om lo hi.

Hosea 14:1

Israel-te aw, noteʼ Topa Pasianʼ lamah kiheikik un. Na mawhna hangun note na puk khin uh hi.

Jeremiah 5:25

Na khialhnate un hih na hoihte khaktan a, na mawhnate uh hangin tuate na taanlawh uh hi.

Malakhi 1:9

Tua ahih ciangin no siampite aw, Pasian in eite hong hehpih theih nadingin ama kiangah thum un. Na hih ngeisa bangun na nget uh hangin na ngetnate uh hong pia lo ding hi; tua pen nomauʼ khialhna ahi hi.

Hosea 13:4

Kei pen Egypt gam panin note a hong paikhiatpih noteʼ Topa Pasian ka hi hi. Tua hun lai-in kei sim loh Pasian dang na thei kei uh a, note a hong hon khia pa kei bek ka hi hi.

Isaiah 3:11

Migilo in gimna ngah tahen! Midang tungah a gitloh gamtatna tawh kizui-in ama tungah kithukkik ding ahih manin ama tungah thu sia ding hi.

Isaiah 3:9

Amauʼ maipuak in amauʼ langah teci pang hi. Sodom bangin amaute a langtangin gamta uh a, amaute in im lo uh hi. Amaute in gimna ngah tahen! Bang hang hiam cih leh amaute in amauʼ tung mahah siatna kitun uh hi.

Paunak 8:36

Ahi zongin kei hong mu lo mi, a mahmah a kisusia hi a, kei hong mudah peuhmah, a si nuam ahi hi,” hong ci hi.

Paunak 6:32

Ahi zongin numei tawh a mawhte pen thu ngaihsun thei lo mi hi a, amau le amau a kisusia tawm ahi uh hi.

Late 146:5

Jakobʼ Pasian pen amah huhpa hi-in, ama Topa Pasian a muang mipa mi lungdam ahi hi.

Late 46:1

Pasian, i belh leh i thahatna hi a, haksat hunin a hong huh pahpah pa ahi hi.

Late 33:20

Topa i ngak hi; amah pen eite hong huhpa le i lum ahi hi.

Thu-hilhkikna 33:29

Na galte in hong mai-etin, na kiangah hong pai ding uh a, amaute na tuancil ding hi,” a ci hi.

Jeremiah 4:18

Na lungsim le na gamtatnateʼ hangin nangʼ tungah hih thu hong tung hi. Hih pen nangma gitlohna hang hi a, na lungtang pailetin hong sun hi,” a ci hi.

Malakhi 1:12

Ahi zongin note in keima biakna tau bangmah a man nei loin genin, tua biakna tau tunga na piak uh ante na thupi ngaihsut loh uh ciangin, keimah a hong simmawh na hi uh hi.

Malakhi 1:13

Note in, ‘Hihte cimtak khin hang,’ ci-in nong nap nitsan lel uh hi. Keimah biak nadingin a kigu ganhing khatpeuh ahi a, a liam a bai, ahih kei leh a cina peuh nong paipih uh hi. Tua bangte, a sang dingin hong ngaihsun na hi uh hiam?

2 KHANG TANGTHU NIHNATE 28:23

Bang hang hiam cih leh amah a zo Damaskas-teʼ pasian-te tungah biakna pia-in, “Syria kumpiteʼ pasian-te in amaute huh ahih manin amaute in kei hong huh theih nadingun amauʼ tungah biakna ka pia ding hi,” ci hi. Ahih hangin tua pasian-te pen amah le a mipihte khempeuhʼ siatna ahi hi.

Hosea 7:14

Amaute in lungsim takpi tawh kei tungah huhna hong ngen lo uh a, dawibia mite bang lelin a gamta uh hi. An le leenggahzu a nget uh ciangin zong lawkite bangin a ngen uh hi. Amaute in kei hong lehdo uh hi.

Hosea 7:15

Amaute khoi-in a thahat mite suaksak napi-in, amaute in kei hong leh sawm zawsop uh hi.