Hebru 10:29 - Tedim Bible Revision 2017

²⁹ Tua bang ahihleh Pasianʼ Tapa a simmawh, mawhna a hong maisak Pasianʼ thuciamna sisan a thudon lo, Pasianʼ hehpihna a hong puak Kha Siangtho a hehsakteʼ thuak ding bangzah takin lian zaw kan ding ahi hiam?

Tedim Bible

²⁹ Tua bang tham loin, Pasian’ Tapa, a khe tawh sik a, amah a siangthosak thuciamna si a siangtho lo ci-in ngaihsun a, thupha a pia Kha Siangtho a simmawh mi in bang zah a lianzaw daantatna a thuak ding na um uh hiam?

Hebru 10:29 Referans Kwoze

Hebru 6:6

amaute a tawpkik leh, amau utthu tawh singlamteh tungah Pasianʼ Tapa thatkikin a zumhuai dingin a pholak kikkik suak uh ahih manin a kisik theih nading uh lampi om nawn lo hi.

Efesa 4:30

Ni khat ni ciangin Pasian in note hong tatkhiat taktak nading thu a ciantakin hong lahna le Pasianʼ neihsa na hihna uh hong ciaptehna-in Kha Siangtho hong pia ahih manin, tua Pasianʼ Kha Siangtho na dahsak kei un.

Isaiah 63:10

Ahih hangin amaute in lehdo uh a, ama kha siangtho a dahsak uh hi. Tua ahih ciangin amah pen amauteʼ gal suak a, a mahmah in amaute a do hi.

1 KORIN MASA 11:27

Tua ahih manin a kilawm lopi-in Topaʼ anlum ne-in, a hai panin leenggahzu a dawn mi peuhmah pen Topaʼ pumpi le a sisan a mindaisak hi-in a mawh ahi uh hi.

Luka 12:10

Mihing Tapa a langpangte a mawhna uh kimaisak thei dinga, Kha Siangtho a langpangte a mawhna uh kimaisak lo ding hi.

Hebru 2:3

Tua ahih manin a thupi mahmah hih hotkhiatna thudon loin i om leh suahtakna om thei ngei lo ding hi. A masa-in Topa mahmah in hotkhiatna thu hong pulak a, tua thu a za mite in thuman ahihna thu eite tungah hong gen leuleu uh hi.

Sawltak 7:51

“Na lungsim uh khauh mahmah a, lawki lungsim paii-in, Pasianʼ thu ah bilngong na bang uh hi. I pu i pate mah bangin Kha Siangtho thu na mang nuam kei uh hi.

Hebru 12:25

Tua ahih manin note tungah thu a hong gen paʼ thugen na ngaih loh khak ding uh kidawm un. Hih leitungah thu a gen paʼ thu a ngai lote suakta lo ahih manin vantung panin thu a hong gen paʼ thugen ngai kei lehang i suakta kei zaw kan lai ding hi.

Hebru 9:13

Keel sisan, bawngtal sisan le bawngla kihal tum vute, biakna vai-in a siang lo mite tungah a kitheh ciangin biakna vai-in miteʼ pum tung siangthosak thei ahihleh,

1 KORIN MASA 11:29

Bang hang hiam cih leh Topaʼ pumpi a khiatna thei lopi-in anlum ne-in hai panin leenggahzu a dawn mi pen a mahmah mawhsak thukhenna a kipiatawm ahi hi.

Hebru 6:4

A tawpkik khin sate a kisikkik nadingin kibawl zo lo hi. Pasianʼ khuavak sungah amaute om khinin, vantung nopna ciam khinin, Kha Siangtho ngah khinin,

Hebru 2:11

Mawhna panin mite a siangthosak pa le sianthosakna a ngah mite in, Pa, a kibang a neikhawm uh hi. Tua hi a, Jesu in mite, “Sanggam,” a cih ding zum ngaihsut lo ahih manin,

Johan 17:19

Nangma tungah thuman takin amaute zong hong ki-ap theih nadingun amaute ka khualna-in nangma tungah kei ka hong ki-ap hi.

Mattiu 7:6

“Uite tungah a siangtho nate pia kei un. Pia le-uhcin hong pet zawsop ding hi. Vokte mai ah na suang manphate uh lot kei un. Lot le-uhcin sikcip lel ding uh hi.

Zekhariah 12:10

“Davidʼ suanlekhakte le Jerusalem khua miteʼ tungah hehpihna lungsim le thungetna lungsim ka guan ding hi. Amaute in a sut lup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpi takin kapin thum ding uh hi.

Hebru 13:20

Ama sihna hangin Tuucing Lianpa suakin, a sisan tawh tawntung thuciamna a kipsak i Topa Jesu pen sihna panin a thokiksak, eite tungah nopsakna a hong pia Pasian in,

Johan 10:36

Tua ahih manin kei pen Pa Pasian in hong teelin leitungah a hong sawl ka hih manin, ‘Pasianʼ Tapa ka hi hi,’ ka cih ciangin bang hangin Pasian simmawh bawl hong cithei na hi uh hiam?

Micah 7:10

Tua hun ciangin ka galte in hih thu hong mu ding uh a, “Na Topa Pasian, koi ah om ahi hiam?” ci-in a hong tawng ka galte a maizum ding uh hi. Amaute guallel ding uh a, kongzing buannawng bangin a kisik gawp mu-in, kei ka nuam ding hi.

Isaiah 14:19

Ahih hangin nang pen namsau tawh a kithat misi a uihte, Suanghawmpi sunga a pai sukte, khe tawh a kisikcip si luang hawmte bangin, na hankhuk pua lamah hong kilawn khia hi.

2 KUMPI NIHNATE 9:33

Jehu in, “Amah hong lawn suk un,” a ci hi. Tua ahih ciangin amaute in Jezebel lawn suk uh hi. A sisan pawl khat kulh tung le sakolte tungah kitheh a, tua ciangin amaute in amah tuancil uh hi.

Hebru 9:20

“Pasian in note tungah a hong piak thuciamna sisan ahi hi,” a ci hi.

1 KORIN MASA 15:25

Bang hang hiam cih leh Pasian in a galte khempeuh zo-in a khe nuai ah a koih khit hun dong mateng Khris in uk ding hi.

ROM (Romans) 16:20

Tua hileh eite tungah nopsakna a hong pia thei Pasian in Satan tuancilin noteʼ khenuai mi hong hisak baih ding hi. I Topa Jesu Khris hong hehpihna thupha, note tungah om tahen.

Mattiu 26:28

Mi tampiteʼ mawhna a mai nadingin a luang khia, Pasianʼ thuciamna a kipsak, ka sisan ahi hi.

Kah la 1:15

Topa in ka galkap a thahat pente nuihsan lel a, amah in kei a hong sim ding, ka tangvalte a susia dingin galkap honpi a hong kuansak hi. Amah in ka nungakte leenggah gawizan bangin a hong gawizansak hi.

Isaiah 28:3

Israel zukham makaite in a kiphatsakpih kumpi lukhu pen khe nuai ah kituancil ding hi.

Late 143:10

Keima Pasian na hih manin nangma deih bangin a gamta dingin kei hong hilh in. Kei hong hehpih inla, lam phei ah hong kha in.

1 KORIN MASA 15:27

Bang hang hiam cih leh Lai Siangtho in, “Pasian in na khempeuh ama khe nuai ah koih hi,” na ci hi. “Na khempeuh,” a cih ciangin Khrisʼ khutnuai ah na khempeuh a koih Pasian mahmah sim loh a vekpi-in a huam khin ahihna kitel hi.

Ezekiel 16:6

“Tua ciangin na kiangah kong pai kha a, sisan naisan lakah na kitomtom kong mu hi. Tua bangin na om laitakin na sih loh nadingin thu kong pia hi.

Jeremiah 1:5

“Gil sungah kong bawl ma-in nang kong thei khinzo hi. Na suah ma-in nang kong teel khia khinzo a, minam dangte tungah kamsang dingin kong koih khinzo hi,” hong ci hi.

Late 91:13

Nangmah in humpinelkai le gul gunei tung na tawn dinga, na khe nuai ah humpinelkai khanglai le gulpi na tuancil ding hi.

Paikhiatna 24:8

Tua ciangin Moses in sisan la-in miteʼ tungah theh a, “Hih thute khempeuh tawh kizui-in Topa in note tawh a bawl sa thuciamna sisan en un,” a ci hi.

Daniel 8:13

Vantungmi khat in a dang vantungmi khat kiangah thu a dot ka za a, “Hih maangmuhna bang tanvei sawt dinga, a muhdahhuai mawhna in nisim biakpiakna bang tanvei khaktan ding ahi hiam? Vantung galkapte le biakinnpi bang tanvei kituancil ding ahi hiam?” a ci hi.

Marka 7:2

A nungzuite pawl khat in khanglui ngeina zui loin, khut sil loin an a neklam uh a mu kha uh hi.

1 KORIN MASA 6:11

Note pawl khat, tua bangin na gamta uh hi. Ahi zongin note pen i Topa Jesu Khris le i Pasianʼ Kha Siangtho hangin mawhna panin a hong kisiangsak khin sa, Pasianʼ tungah a kipia sa, Pasian tawh a kipawl sa mite na hi uh hi.

Efesa 5:26

Pawlpi pen paubaanna a om het lo, a siangtho mahmah in Khris kiangah a kipiak theih nadingin Pasian thu tawh tui ah a silsiang khit ciangin Pasian kiangah a ap theih nadingin pawlpi adingin Khris a kipia ahi hi.

Hebru 4:14

Tua ahih manin eite in Pasianʼ omna vantung a va tung khin sa, Siampi Lianpen ahi Pasianʼ Tapa Jesu nei khin ihih manin i san sa upna thu kip takin len ni.

Hebru 10:10

Pasianʼ deihna bangin Jesu Khris gamta a, a tawntungin a kimang paisuak dingin ama pumpi biakna-in khatvei a kipiakna hangin eite khempeuh i mawhna panin a siang ihi hi.

Mangmuhna 1:5

thuman takin teci a pang, sihna panin a kithokiksak Tapa upa, leitung kumpite tungah ukna aana a nei Jesu Khris kiang panin note tungah hehpihna le nopsakna thupha hong tung tahen. Tua Jesu Khris in eite hong it a, ama sihna tawh i mawhna panin eite hong suaktasak a,