Hebru 1:10 - Tedim Bible Revision 2017

¹⁰ Tua banah, “Topa ahi nangmah in a kipat cil-in leitung na piangsak a, na khut tawh vantungte na bawl hi.

Tedim Bible

¹⁰ Khatvei: “Topa aw, nang in a kipat cilin Leitung bul na piangsak hi; Vantung zong na khut tawh Na bawl na ahi hi.

Hebru 1:10 Referans Kwoze

Piancilna 1:1

A kipat cil-in Pasian in vantung le leitung a piangsak hi.

Jeremiah 32:17

‘Topa Pasian! Nangma vangpi le na khut tawh vantung le leitung na bawl khinzo hi. Nang adingin a haksa lua khat beek om lo hi.

Isaiah 48:13

Ka khut in leitung bulpi koih a, ka khut taklam in vantungte zal hi. Amaute ka sap ciangin amaute om khawm pah uh hi.

Isaiah 42:5

Vantungte piangsakin a zal, leitung phahin, a tung panin a hong paikhia nate a piangsak, leitungah a om mite tungah husanna pia-in, leitungah a paite khempeuh husanna a guan Topa Pasian in hih bangin ci hi:

Zekhariah 12:1

Vanpi zalin leitung piangsak a, mihingte tungah nuntakna a pia Topa in Israel mite tawh kisai-in thu gen a,

Isaiah 64:8

Ahi zongin Topa aw, nang pen koteʼ Pa na hi hi. Kote pen tungman bang hi-in, nang pen beelseek pa bang na hi a, kote khempeuh nangma bawl mite ka hi uh hi.

Isaiah 51:13

Vantungte zalin, lei bulpite a koih, note a hong bawl Topa hong mangngilh khinta na hi uh hiam? Note susia dingin a kithawi, no a hong nengniamteʼ hehna, bang hangin kihta-in lau tawntung na hi uh hiam? Amauteʼ hehna in note hong susia zo het lo ding hi.

Paunak 8:29

tuipi tuite in ama cihna ban a khengin a luan loh nading thu a piak laitak ka om a, leitung bulpi a phuh laitak kei ka om hi.

Mangmuhna 3:14

“Laodisia khua pawlpi vantungmi kiangah lai gelh inla, thuman le citakin teci a pang, Pasianʼ piansakte khempeuh a kipatna ahi Amenʼ thugen in:

Late 19:1

Vantung in Pasianʼ minthanna gen a, vanpi in ama nasepna taangko hi.

Thu-hilhkikna 4:19

Note in na mit uh tawh vantung lam en to-in, ni le kha le aksite, vantung na khempeuh na muh uh ciangin, mun khempeuh a miteʼ tungah Topa na Pasian un a piak nateʼ lamah kihei-in tuate bia-in a na na sep khak loh nading uh kidawm un.

Isaiah 40:12

Kua in ama khutkuak sungah tuite tehin, ama khap tawh vantung teh a, leitung leivui khempeuh lawh khat sungah guangin, pongkhaina tawh mual liante khai a, tawitehna tawh mual neute teh ahi hiam?

Isaiah 51:6

Dak to-in vantungte en unla, leitung zong en suk un. Bang hang hiam cih leh meikhu bangin vantungte mangthang hi. Puan bangin leitung paat khia dinga, ama tunga teengte pen thokang bangin si ding uh hi. Ahih hangin keima hotkhiatna kip tawntung dinga, keima khah khiatna bei ngei lo ding hi.

Hebru 12:27

“Khat vei liingsakkik lai ding,” a cih ciangin a kipiangsak nate kiliingsakin kipaai khia dinga, a kiliingsak lo nate kip lai ding ahihna thu hong kilangsak hi.