Haggai 1:13 - Tedim Bible Revision 2017

¹³ Tua ciangin Topaʼ kamtai Haggai in mite tungah Topaʼ thugente gen sawn a, “Topa in note kong ompih hi,” ci hi, ci-in a gen hi.

Tedim Bible

¹³ Tua ciangin Topa’ kamtai Haggai in mite tungah Topa’ thugente gensawn a, “Topa in note kong ompih hi, ci hi,” ci-in gen hi.

Haggai 1:13 Referans Kwoze

Isaiah 43:2

Tuite na kantan ciangin nang kong ompih dinga, gunte na kantan ciangin tui in hong tuum lo ding hi. Mei kantanin na pai ciangin na kaang kei dinga, meikuangte in nang hong kaang tum lo ding hi.

Mattiu 28:20

Tua ciangin note tungah kong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi.

ROM (Romans) 8:31

Hih teng bang ahih khit ciangin bang gen ding om nawn ahi hiam? Pasian in eite hong kop pih peuh leh kua in eite hong zo zo ding ahi hiam?

Malakhi 3:1

Hih bangin na thugenna uh tawh kisai-in Vanglian Topa in hong dawng a, “Ka pai nading lampi a bawl khol dingin ka kamtai pa ka sawl ding hi. Tua ciangin na ngakngak uh Topa a biakinn sungah thakhat thu-in hong pai ding hi. Na muhnop uh kamtai pa hong pai-in ka thuciamna hong taangko ding hi,” ci hi.

Haggai 2:4

Tu-in note kuamah lungkia kei un. Note tawh hong om khawm ka hih manin nasep kipan un.

Isaiah 41:10

nang hong ompih ka hih manin lau kei in. Na Pasian ka hih manin lungkia kei in. Nang hong tha khauhsakin kong huh dinga, nang hong huhin ka hong hon khia ding hi.

Late 46:11

Vanglian Topa, eite tawh hong om khawm a, Jakobʼ Pasian, eima belh ahi hi.

2 TIMOTI NIHNA 4:17

Ahi zongin Topa in kei hong ompih a, Gentail mi khempeuh tungah Pasianʼ thu a kicingin ka gen theih nadingin thahatna a hong pia hi. Tua ahih manin sih nading thukhenna pan hong suaktasak hi.

Mattiu 18:20

Bang hang hiam cih leh keima minin mi nih le thum bek nangawn a kikhopna peuhpeuh ah kei ka om hi,” a ci hi.

Mattiu 1:23

“Nungak khat gai-in tapa khat nei dinga, ama min dingin Emmanuel kiphuak ding hi,” ci hi. Emmanuel a khiatna in, eite tawh Pasian hong om khawm hi, a cihna ahi hi.

Malakhi 2:7

Siampiteʼ nasep pen Pasian a manin theih nading a hilh ding uh ahi hi. Amaute pen, Vanglian Topaʼ kamtaite ahih manun, mite in keima deihna a theih nadingun amauteʼ tungah thu a dot ding uh ahi hi.

Jeremiah 30:11

Bang hang hiam cih leh Topa in kong cih in ah, a hong hon khia dingin note kong ompih hi. Note ka hong thehthangna gamte khempeuh ka susia dinga, ahih hangin note kong susia kei ding hi. A kilawm zahin kong thuhilh dinga, gim pia loin kong mawk nusiat kei ding hi.

Jeremiah 20:11

Ahih hangin Topa pen a kihtakhuai galhang pa bangin kei tawh hong om khawm gige hi. Tua ahih manin kei hong bawlsiate tuk ding uh a, kei hong zo lo ding uh hi. A tawntung a a mindaina uh kimangngilh ngei lo ding hi.

Jeremiah 15:20

Hih mite tungah sumngo a kibawl khua kulhpi kong bangsak dinga, amaute in a hong sim uh hangin a hong zo kei ding uh hi. Bang hang hiam cih leh a hong hon khia ding le a hong suaktasak dingin nang ka hong ompih hi, Topa in ka hong ci hi.

Late 46:7

Vanglian Topa eite tawh hong om khawm a, Jakob Pasian eima belh ahi hi.

2 KHANG TANGTHU NIHNATE 32:8

Amah in mihing thahatna nei a, ahih hangin eite hong huhin i gal hong dosak dingin Topa i Pasian in eite hong ompih hi,” a ci hi. Tua ahih ciangin mite in Judah kumpipa Hezekiahʼ kammalte a muang uh hi.

2 KHANG TANGTHU NIHNATE 20:17

Note in hih kidona ah na do ding uh kisam lo hi. Judah gam mite le Jerusalem khua mite aw, na panmun uh la-in taang loin ding unla, noteʼ tangin Topaʼ gualzawhna mu un,’ ci hi. Kihta kei unla, lungkia kei un. Zing ciangin amaute a do-in pai un. Topa in note hong ompih ding hi,” a ci hi.

Ezekiel 3:17

“Mihing ahi Ezekiel aw, Israel minamteʼ galvil pa dingin nang kong koih hi. Nangma tungah kong gen hilh kholhnate khempeuh amaute tungah na gen sawn ding hi.

Isaiah 44:26

a nasem paʼ thu kipsakin, a kamtaiteʼ thugente a sem pa, ‘Jerusalem khua ah mi teengin, Judah khuapite kilamkik dinga, a kisia khuate ka lamkik ding hi,’ a ci pa;

2 TIMOTI NIHNA 4:22

Topa in nangmah hong ompih tahen. Note khempeuh tungah Pasianʼ hehpihna thupha hong tung tahen.

2 KORIN NIHNA 5:20

Tua ahih ciangin kote pen Khris tangin nasem ka hi uh a, Pasian in kote zangin note tungah thu a hong gen ahi hi. Pasian tawh kilemin pawl khatin na om nadingun Khris tangin a hong thum ka hi uh hi.

Isaiah 42:19

Ka nasem pa bangin kua a mit taw a, keima sawl ka kamtai pa bangin kua a bilngong ahi hiam? Keima thuciampih pa bangin kua a mit taw a, Topa’ nasem pa bangin kua a mit taw ahi hiam?

2 KHANG TANGTHU NIHNATE 15:2

Tua ciangin Asa a dawntuah dingin amah pai-in ama kiangah, “Asa, le Judah mite le Benjamin mite aw, ka thu ngai un. Note amah tawh na om lai teng uh note tawh Topa hong om hi. Amah na zon uh leh amah na mu ding uh a, ahih hangin amah na nusiat uh leh amah in note hong nusia ding hi.

Thukhente 2:1

Tu-in Gilgal panin Bokhim ah Topaʼ vantungmi pai to hi. Amah in Israel mite kiangah, “Egypt panin note kong paipih to a, na pu na pate uh tungah piak dinga ka ciam leitang ah note kong paipih hi. Keimah in, ‘Note tawh ka thuciam ka siasak ngei kei dinga,

1 KHANG TANGTHU MASATE 28:20

Tua ciangin David in a tapa Solomon kiangah, “Thakhauhin hang inla sem in. Lau kei in; bang hang hiam cih leh Topa Pasian, keima Pasian nangawn nang tawh hong om hi. Topaʼ biakinn sung nasepna khempeuh a kizawh matengin amah in nang hong tamasak lo dinga, hong nusia lo ding hi.