Galati 2:4 - Tedim Bible Revision 2017

⁴ Ahi zongin mi pawl khat in atsak nuam sam uh hi. Khris Jesu tawh ka kipawlna hangun suahtakna ka ngahna thu uh a kansim dingin amaute thu um mi kineihkhemin kote lakah hong kihel uh hi. Amaute in kote pen sila hong suaksak nuam uh ahi hi.

Tedim Bible

⁴ Khazih Zeisu hangah i ngahsa suahtakna thu en simin eite sila hong suahsak nadingun kheemna tawh a hong tumsim ute naute banga kibawl mite’ thu hangin tua bang hong bawl uh hi.

Galati 2:4 Referans Kwoze

Juda 1:4

Bang hang hiam cih leh Pasianʼ thu a ngaihsun lo mi pawl khat, eite lakah kuama phawk lohin hong lut sim uh a, amauteʼ mawh gamtat ngamnate a seelna-un Pasianʼ hehpihna thupha a lehlamin hei-in, eite in khat bek i neih i Mangpa le i Topa ahi Jesu Khris a nial uh hi. Hih bang miteʼ gimthuak ding thu tanglai pekin Lai Siangtho in a gen sa thu ahi hi.

Galati 5:1

Khris in eite hong khahkhiat khitna hangin mi suaktate hi khinta ihih manin tua suahtakna thu ah kipin om unla, sila va suakkik nawn kei un.

Galati 4:3

Tua mah bangin eite zong kha thu ah i neu lai hun sungteng huihlak a uk vangneiteʼ khutnuai ah a om ihi hi.

2 KORIN NIHNA 11:26

Khual ka zinzinna lamin tuikhang lauhuaina, misuamte lauhuaina, ka mipihteʼ suk ding lauhuaina, Gentail miteʼ suk ding lauhuaina, khuapi sung le gamlak ah lauhuaina, tuipi tungah lauhuaina, lawm man loteʼ hih ding lauhuaina a tuamtuamte ka phu kha hi.

1 JOHAN MASA 4:1

Ka it lawmte aw, kha ka nei a ci mi khempeuhʼ thugen um kei unla, tua thute Pasian kiang pan mah ahi hiam, ci-in kantel un. Bang hang hiam cih leh leitungah kamsang a kineihkhem tampi hong om khinta hi.

2 PETER NIHNA 2:19

Amaute pen siatna a piangsak thei zongsatna lelin sila hinapi-un mite tungah suahtak nading thu a gen uh hi. Bang hang hiam cih leh mite pen, a hong zo peuhpeuhteʼ sila ihi hi.

2 TIMOTI NIHNA 3:6

Tua bang mite pawl khat, mite inn ah va hawh khiankhianin, deihna nam tuamtuam le mawhna lungsim tawh a kidim numeite na thu zawh uh hi.

Galati 5:10

Eite, Topa tawh a kipawl khawmte ihih manin kei tawh a kilamdangin note in bangmah ngaihsut tuam nei het lo ding, ci-in kong muang a, a kua a kua hitaleh note hong nawngkaisakte pen Pasian in gim pia ding hi, ci-in ka um hi.

2 KORIN NIHNA 11:20

Note, sila-in hong bawlin, note hong thangsiahin, na haina uh nuamtak sa-in hong hih thopthopin, note hong simmawh bawlin, na paang uh a hong bengbengte na sang uh hi.

2 KORIN NIHNA 11:13

Amaute pen sawltak taktak hi loin, sawltak a kineihkhemte hi uh a, a nasepna uh ah zong zuau-in, Khrisʼ sawltak taktak a bat theih nadingun a mel kiseel ahi uh hi.

2 KORIN NIHNA 3:17

Hih lai munah Topa a cih pen Kha Siangtho hi a, Topaʼ Kha Siangtho a omna mun peuhpeuh ah suahtakna om hi.

Sawltak 20:30

Note sung mahmah panin zong mi pawl khat in thu um mite khemin a zol khiat hun hong tung ding hi.

Sawltak 15:24

Kong sawl lohpi-in ko kiang panin mi pawl khat hong pai-in a thugenna uh tawh note hong buaisakin hong lung-amsak hi, ci-in ka za uh hi.

Sawltak 15:1

Judea gam panin Antiok khua ah mi pawl khat hong pai uh a, innkuan khat bangin a om thu um mite kiangah, “Moses Thukham sungah a kigen bangin na vun uh na at kei uh leh hotkhiatna na ngah kei ding uh hi,” ci-in thu hilh ding hong kipan uh hi.

Isaiah 51:23

Note kiangah, ‘Na tung uh ah kong pai theih nadingun kun suk un,’ a hong ci, no a hong bawlsiateʼ khut sungah tua haipi ka koih ding hi. Note in na nungzang uh leilak bangin bawlin, amauteʼ pai nadingin kongzing lampi bangin na bawl khin uh hi,” a ci hi.

1 PETER MASA 2:16

Sila ahi lo mi bangin gamta unla, ahi zongin gitloh gamtat nadingin na suahtakna uh zang loin Pasianʼ sila bangin na gamta zaw un.

Galati 4:25

Arabia gam a om Sinai Mual lim ahi Hagar pen tu laitakin a mite tawh salin a om Jerusalem khuapi a cihnopna ahi hi.

2 KORIN NIHNA 11:17

Tu-in kong gen ding thute pen Topaʼ hong sawl hi lo hi. Tu-a kisialhna kam ka hong pau ciangin mihai taktak mah bangin a pau ka hi hi.

ROM (Romans) 8:15

Note tungah Pasian in a hong piak a Kha Siangtho in note na lau nadingun sila-in a hong bawl hi lo a, Kha Siangtho in Pasianʼ tate a hong suaksak ahi zaw hi. Tua Kha Siangtho mah in Pasian pen, “Pa aw, Pa aw,” hong ci theisak hi.

Late 119:45

Nangma thuhilhnate zuih ding hanciam ka hih manin nuam takin ka nungta ding hi.

Late 51:12

Nong hotkhiatna hangin hong lungdamsakkik inla, utna lungsim tawh keimah hong huh ta in.

Galati 1:7

A taktakin ci lehang lungdamna thu a dang a om hi lo a, mi pawl khatte in noteʼ lungsim hong toknawi-in, Khris hanga lungdamna thu hei-in thudang tawh laih nuam uh ahih manin, tua amauʼ deih thu pen lungdamna thu a cihsak mawkmawk ka hi hi.

Jeim 1:25

Ahi zongin mite a suaktasak thei thukham cingtaak hoihtakin a et khit ciangin a thu ngai-in a mangngilh pah hi loin, hoihtakin ngaihsun tawntungin a zuite pen a sepna khempeuh uh ah Pasian in thupha a pia ding hi.

Luka 5:38

Tua ahih manin savun um thak sungah leenggahzu thak a kikoih ding ahi hi.