Filippi 4:3 - Tedim Bible Revision 2017

³ Hih numei nihte in Klement le a nungta mite a kikhumna Pasianʼ laibu sungah a kikhum, ka nasep pih dangte khempeuh tawh, lungdamna thu a kizelh nadingin nakpi takin kei tawh na hong sem khawm uh ahih manin, citakin kei tawh na a sem khawm note in zong amau tegel na huh nadingun kong thum hi.

Tedim Bible

³ Lawm naseppih taktak aw, tua numeite huh dingin ka hong thuum hi. Bang hang hiam na cih uh leh, amaute in kei leh Klement-a kipan nuntakna laibu sungah min kikhum adang ka naseppihte tawh Lungdamna Thu ka hilh khawmna-ah hong huhin, a hahkat mi ahi uh hi.

Filippi 4:3 Referans Kwoze

Mangmuhna 13:8

Tua ahih manin a kigo Tuuno laibu sungah a nungta ding miteʼ min, leitung pianmapekin a kikhumna ah a kihel lo leitung mi khempeuh in tua ganhing bia ding uh hi.

Mangmuhna 3:5

A gualzo mite in tua bangin puan pak silh ding uh a, a nungta mite a kikhumna laibu sung panin amauteʼ min ka phiat kei ding hi. Ka Pa le ama vantung mite kiangah zong keima mite ahihna uh ka pulak ding hi.

Luka 10:20

Ahi zongin dawite in na thu uh hong manna hangin lungdam kei unla, vantungah na min uh a kigelh manin lungdam zaw un,” a ci hi.

Filippi 1:27

Note tawh a om khawm dingin ka hong pai thei a, ka hong pai thei kei zongin note in lungdamna thu tawh kipawl upna thu ah ngimna kikhatin kip takin na om nading uh le deihna kikhatin na do khawmna thu uh ka zak theih nadingin Khris hanga lungdamna thu tawh a kilawm a kituakin na nuntak ding uh a thupi pen ahi hi.

Mangmuhna 21:27

Ahi zongin a siang lo, a hoih loin a gamta mi, zuau a gen mite kuamah lut thei lo ding uh a, a nungta mite a kigelhna Tuuno laibu sungah a min a omte bek tua khuapi sungah lut thei ding uh hi.

Mangmuhna 17:8

Tua na muh ganhing nidangin a om hangin tu-in om nawn lo hi. Ahi zongin tu-in kuahawm thukpi panin hong pusuakin sihna a thuak dingin paikhia ding hi. Tua ganhing nidangin omngei a, tu-in om nawn lo napi-in khatvei hong kilangkik ding ahih manin, a nungta miteʼ min a kikhumna laibu sungah leitung pian ma-in a kigelh nai lo, tu laitakin leitungah a om mite in tua ganhing a et uh ciangin lamdang sa ding uh hi.

Filippi 4:2

Euodia le Sintikhe, Topaʼ hangin a kilemkik ding uh ka thum nuam hi.

ROM (Romans) 16:12

Topaʼ na a sem Trifana le Trifosa le Topa adingin na tampi tak a sem ka lawm it Persis zong na hopihsak un.

ROM (Romans) 16:9

Khris nasepna sungah na ka sep khop pih uh ahi Urbanas le ka lawm Stakhus zong na hopihsak un.

ROM (Romans) 12:1

Tua ahih ciangin sanggamte aw, Pasian in eite tam veipi tak hong hehpih ahih manin ama lungkim nading le ama nasep nadingin nomau mahmah a hingtangin Pasian tungah na kipiak nadingun kong thum hi. Tua banga kipiakna pen Pasian biakna man taktak ahi hi.

Late 69:28

A nungtateʼ laibu sung panin amaute kiphiatsak inla, miphate lakah a min uh kikhumsak kei in.

Paikhiatna 32:32

Ahih hangin nangmah in tu-in amauʼ khialhna maisak in. Na maisak kei ding leh, hong thum ing, nangma gelh sa laibu panin keimah hong phiat mai in,” a ci hi.

Mangmuhna 20:12

A lian a neu misite tua tokhom mai ah dingin laibute a kilem ka mu hi. Tua ciangin a nungta mite a kigelhna laibu a dang khat zong a kilem ka mu hi. Amauteʼ gamtatna tua laibute sungah a kigelhna tawh kizui-in misite tungah thu a kikhen hi.

Kolose 1:7

Hih thu pen, Khris nasepna sungah koteʼ tangin citakin na a sem, koteʼ nasep pih Epafras tung panin na zak uh ahi hi.

Daniel 12:1

Tua ciangin saihadial puan a silh vantungmi in, “Na mite a cing, a lian vantungmi Mikhael hong kilang ding hi. Tua ciangin leitungah mihing a pian zawh a kipan a nasia penpen gimna hun hong tung ding hi. Tua hun a hong tun ciangin Pasianʼ laibu sungah a min a kigelh na mite khempeuh kihon khia ding hi.

Mangmuhna 20:15

A nungta mite a kigelhna laibu sungah a min a om lo peuhmah meiphual pi sungah kilawn hi.

Ezekiel 13:9

Zuau thu tawh maang mu kineihin, mite a khialh theih nadingin zuau thu a gen khol no kamsangte gim a hong pia ding ka hi ta hi. Ka mite a kikhop uh ciangin tuate lakah na kihel kei ding uh a, Israel miteʼ min a kigelhna lakah noteʼ min kigelh lo ding hi. Na gam uh ah na ciahkik ngei nawn kei ding uh hi. Tua ciangin Topa Pasian ka hihna thu na hong thei ding uh hi.

Isaiah 4:3

Topa in thukhenna le meihalna tawh Zion miteʼ mawhna teng siangsakin, Jerusalem khua sung panin mi thahna teng a beisak ciangin Zion ah a om lai mi, Jerusalem ah khang tawntungin a om dingin a kiciamteh sa mite khempeuh, a siangtho kici ding hi.

Filippi 1:7

Lungdamna thu hangin ka thongkiatna le lungdamna thu man hi, ci-in pangin ka kipsak nading hun ka ngahna ah kei tawh a hong pangkhawm na hih manun ka lungsim sungah note na om tawntung uh a, hih zahta-in note ka hong phawk ding a kilawm thu mah ahi hi.

Filippi 1:12

Sanggamte aw, kei tungah a piang thu in lungdamna thu mai a nawtsak zaw ahihna thu na theih ding uh ka deih hi.

Filippi 1:16

Hih bang mite in, Pasianʼ hong sawlna tawh lungdamna thu ka hutna hangin thong kia ka hihna thu thei-in, itna lungsim tawh Pasianʼ thu a hilh uh hi.