Ezra 1:3 - Tedim Bible Revision 2017

³ Note lakah ama mi peuhmah a Pasian in ompih henla, Judah gam sung Jerusalem khua ah pai to henla, Israel Pasian, Topaʼ biakinn lamkik hen. Amah pen Jerusalem ah a om Pasian ahi hi.

Tedim Bible

³ Note’ lakah ama mi peuhmah a Pasian in ompih hen la, Judah gam sung Jerusalem khua-ah paito hen la, Israel Pasian, Topa’ inn lam kik hen— amah in Jerusalem ah a om Pasian ahi hi;

Ezra 1:3 Referans Kwoze

Daniel 6:26

Ka gam sunga om mi khempeuh in Danielʼ Pasian kihta-in a zahtak nadingun thu ka pia hi. “Bang hang hiam cih leh amah a nungta Pasian hi a, a tawntungin a uk ding hi. Ama gam kisia ngei lo dinga, a vangliatna a bei ngei kei ding hi.

Jeremiah 10:10

Ahih hangin Topa pen Pasian man hi a, amah pen a nungta Pasian le tawntung kumpipa ahi hi. A heh ciangin lei kiliing a, gamte in a hehna nang zo lo hi.

Sawltak 10:36

Mi khempeuhʼ Topa ahi Jesu Khris hangin a kingah Lungdamna Thu, Israel mite tungah Pasian in a puakna thu na thei uh hi.

Mattiu 28:20

Tua ciangin note tungah kong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi.

Isaiah 45:5

“Kei pen Topa ka hi hi. Kuamah dang om lo a, keimah sim loh Pasian dang om lo hi. Nisuahna lam pan hitaleh, nitumna lam pan hitaleh, kei sim loh a dang a om lohna thu mite in a theih nadingin, nong theih loh hangin a kisam thahatna nang ka hong guan hi. Kei pen Topa ka hi a, a dang kuamah om lo hi.

Joshua 1:9

Thu hong pia khin hi lo ka hi hiam? Thahat inla hang in. Lau kei inla lungkia kei in; bang hang hiam cih leh na paina peuhpeuh ah Topa na Pasian nang tawh hong om hi,” a ci hi.

Thu-hilhkikna 32:31

Bang hang hiam cih leh i galteʼ pasian eiteʼ Pasian bang hi lo a, i galteʼ thungetna a mawkna ahi hi.

Daniel 2:47

Kumpipa in, “Hih thuthukpi hong gen thei na hih manin na Pasian pen thuthuk a lak, pasian khempeuh sung pan a lian pen, kumpiteʼ tunga Topa ahi hi,” a ci hi.

Late 83:18

Topa a kici min nei nangmah bek leitung khempeuh ah a Sangpen pa na hihna amaute theisak in.

1 KHANG TANGTHU MASATE 28:20

Tua ciangin David in a tapa Solomon kiangah, “Thakhauhin hang inla sem in. Lau kei in; bang hang hiam cih leh Topa Pasian, keima Pasian nangawn nang tawh hong om hi. Topaʼ biakinn sung nasepna khempeuh a kizawh matengin amah in nang hong tamasak lo dinga, hong nusia lo ding hi.

1 KUMPI MASATE 8:23

Amah in, “Israel Pasian, Topa aw, tunga om vantung ahi a, nuai-a om leitungah ahi zongin, nangma mai ah a lungsim khempeuh uh tawh a gamta na nasemte tungah thuciamna lenin itna kip a lak, nang tawh a kibang pasian om lo hi.

1 KUMPI MASATE 18:39

Mi khempeuh in tua thu a muh uh ciangin a mai uh lei lam ngatin puk uh hi. Amaute in, “Topa pen Pasian ahi hi; Topa pen Pasian ahi hi,” a ci uh hi.

Ezra 1:4

Tua ciangin koi lai mun koi lai gam a om hitaleh Judah mi a om lai khempeuh, ama omna mun mite in Jerusalem-a om Pasianʼ biakinn adingin utthu-a a piakte uh banah, ngun le kham, nate le ganhingte tawh zong huh ciat uh hen,” a ci hi.

Ezra 5:3

Tua laitakin Eufratis Gun gal gam sungteng a uk sawn Tattenai, Shethar-bozenai le amauʼ lawmte hong pai pahin amaute kiangah, “Note in hih biakinn lamkikin a nate na bawlna ding uh kua in thu hong pia ahi hiam?” a ci uh hi.

Isaiah 37:16

“Vanglian Topa, Israel-teʼ Pasian, Kherub-te tunga a tupa aw, nangmah bek, leitung kumpi gam khempeuhteʼ Pasian na hi hi. Nangmah in vantung le leitung na bawl khin hi.

Ezra 4:3

Ahih hangin Zerubbabel le Israel sunga innkuan lutang a omlaite in amaute kiangah, “Koteʼ Pasian adingin ka lam uh biakinn pen noteʼ hong lunghihmawh pih ding hi lo hi. Persia kumpipa Sairas in kote hong thupiak sa bangin Israel Pasian, Topa adingin ko teng guak mah in ka lam ding uh hi,” a ci uh hi.

Ezra 5:13

Ahi zongin Babylon kumpipa Sairasʼ uk a kum khatna kumin hih Pasianʼ biakinn a kilamkikna ding amah in thu pia hi.

Ezra 6:7

Judah mi a ukpa le a upate in hih Pasianʼ biakinn a lamkik theih nadingun na tua ci omsak ding uh hi. Ama mun ngei mahah a biakinn lamsakkik un.

Late 132:13

Bang hang hiam cih leh Topa in Zion teel khinzo a, amah in tua mun pen ama ten nadingin a deih hi.

Isaiah 44:28

‘Sairas kumpipa pen ka tuucingpa hi a, ka deihna teng tungsak ding hi,’ a ci pa; ‘Jerusalem kilamkik dinga,’ biakinn pen, ‘Na bulpi kiphutkik ding hi,’ a ci Topa ka hi hi,” a ci hi.