Efesa 1:4 - Tedim Bible Revision 2017

⁴ Ama mai ah eite pen paubaanna a nei lo, mi siangthote ahi ding le Khris hangin ama mite ahi dingin leitung a pian mapek nangawnin Pasian in a hong teel sa ihi hi.

Tedim Bible

⁴ Ama mai-ah eite pen paubaanna a nei lo, mi siangthote ahi ding le Khrih hangin ama mite ahi dingin leitung a pianma pek nangawnin Pasian in a hong teelsa ihi hi.

Efesa 1:4 Referans Kwoze

2 TIMOTI NIHNA 1:9

Eiteʼ sep zawhna hang hi loin ama ngimna sa bang leh a dikna hangin Pasian in eite hong hon khia-in ama mi dingin a hong sam hi. Pasian in leitung a pianmapekin Khris Jesu tungtawnin tua dikna a hong piak hi a,

Efesa 2:10

Eite a hong bawlpa pen Pasian hi a, Jesu Khris tawh i kipawl ciangin i nuntakna ah gamtat hoih a nei dingin a hong bawl ihi hi. Hih pen eiteʼ om zia dingin a na ngaihsut kholh sa ahi hi.

Mattiu 25:34

Tua ciangin Kumpipa in a tak lamah a om mite kiangah, ‘Ka Pa in thupha a piak mite aw, hong pai ta un. Leitung piancil a kipanin note adingin a kibawl khol sa gam nuam hong luah un.

Jeim 2:5

Sanggamte aw, hoihtakin na ngai un. Pasian a it mite tungah piak dingin a ciam vantung gam a ngah ding le upna thu ah mihau a suak dingin Pasian in leitung mizawngte a teel hi napi-in,

1 PETER MASA 2:9

Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasianʼ mite na hi uh a, khuamial sung panin a lamdang mahmah ama khuavak sungah a hong sam khia paʼ nasepna a lamdangte a gen khia dingin Pasian in a hong teel mite na hi uh hi.

Mangmuhna 13:8

Tua ahih manin a kigo Tuuno laibu sungah a nungta ding miteʼ min, leitung pianmapekin a kikhumna ah a kihel lo leitung mi khempeuh in tua ganhing bia ding uh hi.

Johan 15:16

Note in kei na hong teel kei uh a, ahi zongin keimah in note ka hong teel a, note va pai-in a kimang tawntung ding gah a gah dingin ka hong seh hi. Tua ahih manin keima min suangin Pa kiangah na nget peuhpeuh uh hong pia ding hi.

1 PETER MASA 1:2

Pa Pasian in ama ngimna sa bangin note hong teel a, note in Jesu Khrisʼ thu mangin, ama sisan tawh sianthona a ngah dingin a Kha Siangtho tawh note mi siangtho-in a hong bawl hi. Note tungah hehpihna le nopsakna thupha hong tam tun semsem tahen.

1 PETER MASA 1:20

Pasian in hih bang dingin leitung pianmapekin Khris a teel sa hi a, note a hong khualna-in tu hun nunung ciangin Pasian in note kiangah amah a hong lak khia pan ahi hi.

Kolose 3:12

Pasian in note hong itin, hong teelin, ama mi siangthote hi khin na hih manun note pen hehpihna nei-in, migi-in, kiniamkhiatin, dikin, na lungduai ding uh ahi hi.

Kolose 1:22

Ahi zongin, a Tapa a pumpi mahmah in a hong sihna hangin note, a cidam, a siangtho, paubaanna om het loin ama kiangah hong lak theih nadingin Pasian in note ama lawmin a hong bawl khinta ahi hi.

Mangmuhna 17:8

Tua na muh ganhing nidangin a om hangin tu-in om nawn lo hi. Ahi zongin tu-in kuahawm thukpi panin hong pusuakin sihna a thuak dingin paikhia ding hi. Tua ganhing nidangin omngei a, tu-in om nawn lo napi-in khatvei hong kilangkik ding ahih manin, a nungta miteʼ min a kikhumna laibu sungah leitung pian ma-in a kigelh nai lo, tu laitakin leitungah a om mite in tua ganhing a et uh ciangin lamdang sa ding uh hi.

Sawltak 13:48

Gentail mite in hih thu a zak uh ciangin lungdam mahmah uh a, Pasianʼ thu hoih mahmah hi, ci-in a phat uh hi. Nuntak tawntungna a ngah dingin Pasian in a teel sa mite in Pasianʼ thu hong um uh hi.

Isaiah 42:1

Keimah in ka huh, ka teel, ka lungkimna ka nasem pa en un. Ka kha tawh amah ka kidimsak a, amah in minam khempeuh tungah thuman tungsak ding hi.

Johan 17:24

Pa aw, leitung a pianmapekin kei na hong itna hangin na hong piak pianzia a mu dingin keimah na hong piak mite zong ka omna ah a hong pai theih nading ka deihsak hi.

1 THESALONIKA MASA 4:7

Eite a thanghuai gamtat dingin Pasian in a hong sam hi lo a, a siangtho-in a nungta dingin a hong sam ahi hi.

Filippi 2:15

Tua hileh a lungsim kawi, a hoih lo leitung mite lakah paubaanna a nei lo a siangtho, Pasianʼ tate na hi ding uh a, nuntakna thu na genna uh hangin leitung mite lakah khuavak bangin na hoihna uh a kilang mite na hi ding uh hi.

2 TIMOTI NIHNA 2:19

Ahi zongin Pasian in a phuh sa sutpi kilok zo ngei lo ding hi. Tua sutpi tungah, “Topa in ama mi kua teng hiam cih thei hi,” cihna le, “Topa tawh kipawl ing, a ci peuhmah in mawhna su kha lo ding hi,” cihna kigelh hi.

Sawltak 18:10

Hih khua sungah keima mi tampi om a, nang hong ompih ka hih manin kuamah in nang bangmah hong cih lo ding hi,” a ci hi.

Late 135:4

Bang hang hiam cih leh Topa in ama adingin Jakob teel a, ama neihsa dingin Israel teel khinta hi.

2 TIMOTI NIHNA 2:10

Tua ahih manin Pasianʼ teel mite in zong Khris Jesu hangin hotkhiatna le tawntung minthanna a ngahkhawm theih nadingun amauteʼ hangin na khempeuh ka thuak hi.

Efesa 4:2

Kiniamkhiatin, thunemin, lungduai-in om tawntung un. Khatlekhat kihuhna tawh na ki-itna uh kilangsak un.

1 KORIN MASA 1:8

Ama hong kilatkik hun ciang dong, a tawp dongin mawhna le kisuanna nei loin na om nadingun i Topa Jesu Khris mah in note hong huh ding hi.

Mattiu 24:31

Nakpi takin peengkul hong ging dinga, leitung mun khempeuh ah a vantung mite hong paisakin, leimong khat pan mong khat dongin, a teel sa mite a kaikhawmsak ding hi.

Efesa 5:2

Khris in eite a hong it manin Pasian in eiteʼ mawhna hong maisak theih nadingin a namtui biakna-in Pasian kiangah a kipiak mah bangin note zong itna tawh na gamta un.

Johan 10:16

Hih tuukulh sungah a om lo tuu dang ka nei lai hi. Tuate zong tuukulh sungah ka khum dinga, amaute in keima thu ngai-in, keima khut sungah ka tuu om sate tawh hon khat suak khawm ding uh hi.

1 THESALONIKA MASA 3:12

Kote in note ka hong it zahun, note khatlekhat na ki-itna uh le mi khempeuh na itna uh, hong liansak semsem tahen.

Efesa 3:17

na upna hangun note lungsim sungah Khris hong teengin, itna thu ah zung thuk kha-in bulkip na neih nadingun thu ka ngen hi.

Galati 5:13

Sanggamte aw, note na hih uh leh a suakta mi ahi dingin Pasian in a hong sap ahi hi. Ahi zongin tua suahtakna pen na pumpi uh ut bangbangin gamtat theih nadingin paulam zonna-in nei kei unla, itna tawh khatlekhat kikhualna-in zang zaw un.

ROM (Romans) 8:33

Pasian in mawh lo hi, ci-in a gen khit sa ahih manin, Pasianʼ teel sa mite tungah kua in mawhna guan thei nawn ding ahi hiam?

Mattiu 24:24

Bang hang hiam cih leh Khris a kineihkhemte le kamsang a kineihkhemte hong piang dinga, ahih zawh leh a teel sa mite nangawn a khem nadingun lim le nalamdang lian pipi hong bawl ding uh hi.

Mattiu 24:22

Pasian in tua gimna hun a ni khiam lo hileh a suakta zo kuamah om lo ding hi. Ahi zongin ama teel mite a khualna-in a ni a khiam ding hi.

1 JOHAN MASA 4:16

Tua hi a, Pasian in eite a hong itna thu, eite mahmah in thei-in i um hi. Pasian pen ki-itna hi a, itna a nei mite pen Pasian tawh om khawm uh a, Pasian zong amaute tawh a om khawm hi.

2 PETER NIHNA 3:14

Tua ahih ciangin ka itte aw, hih Ni ding ngakin na om laitakun Pasianʼ muhna ah paubaanna om het loin amah tawh nuam takin na om khawm theih nadingun hanciam un.

Kolose 2:2

Note, lungsim hanna tawh kidimin, thu a man taktakin na theihna hangun lungkip takin omin, itna tawh pum khat na suah theih nading uh ka deihna ahi hi. Tua hileh Pasianʼ thusim ahi Khris mahmah na thei ding uh hi.

Galati 5:22

Ahi zongin Kha Siangthoʼ sawlna bangin gamtatnate pen: Itna, lungdamna, lungnopna, lungduaina, migitna, hoihna, cihtakna,

Galati 5:6

Bang hang hiam cih leh Jesu Khris tawh i kipawl ciangin vun atna le vun at lohna a thupi tuan om lo a, Khris i upna hangin midangte i itna a thupi hi bek hi.

Siampi Laibu 19:2

“Israel mihonte khempeuh kiangah hih bangin gen in: Note na siangtho ding uh hi; bang hang hiam cih leh Topa noteʼ Pasian keimah ka siangtho hi.

Siampi Laibu 20:7

Tua ahih ciangin note ki-ap unla siangtho un; bang hang hiam cih leh kei pen Topa na Pasian uh ka hi hi.

2 SAMUEL NIHNA 22:24

Ama mai ah kawk ka baang kei a, kisuanna dangte panin hoihtakin ka kikem hi.