Daniel 5:19 - Tedim Bible Revision 2017

¹⁹ Amah lian lua mahmah ahih manin gam khempeuh, nam khempeuh, pau khempeuhte in kihta-in a liing uh hi. Mi khatpeuh a thah nop leh that a, a nuntaksak nop leh a nungtasak hi. A ut leh mi khatpeuh pahtawi-in, a ut leh a daisak thei hi.

Tedim Bible

¹⁹ Amah lian lua mahmah ahih manin gam khempeuh, nam khempeuh, pau khempeuhte in kihta in a liing uh hi. Mi khatpeuh a thah nop leh that a, a nuntak sak nop leh a nungta sak hi. A ut leh mi khatpeuh pahtawi-in, a ut leh a daisak thei hi.

Daniel 5:19 Referans Kwoze

Daniel 3:6

A kun lo, a bia lo peuhmah thakhat thu-in mei phualpi sungah kikhul pah ding hi,” a ci hi.

Daniel 3:4

Tua ciangin nakpi takin taangkona khat kibawl a, “Minam tuamtuamte le pau nam tuamtuamte khempeuh aw!

ROM (Romans) 13:1

A kuamah peuh in hong ukteʼ thu na mang ciat un. Bang hang hiam cih leh Pasianʼ thukimpih lohin kuamah in ukna thu nei lo hi; ukna thu nei i cih mite pen Pasianʼ koih mite ahi hi.

Johan 19:11

Jesu in, “Pasian in nang tungah hong pia lo hileh kei tungah thu na nei het kei ding hi. Tua ahih manin nangma khut sungah kei hong apteʼ mawhna lian zaw hi,” ci-in a dawng hi.

Habakkuk 2:5

Hauhna pen zuaupi hi a, a huaiham mite kiphasakin omkhong thei lo uh a, hankhuk mah bangin, pha zo, cih omsak thei lo uh a, lungkim hun cih nei thei lo uh hi. Tua ahih manin minam dangte a banbanin simin a uk uh hi.

Daniel 4:22

Kumpipa aw, nang pen tua singkung na hi hi. Nang na lian a, na thahat hi. Nakpi takin khangin lian mahmah na hih manin vantung dong na ban to a, leitung khempeuh ah na vangliatna kizel hi.

Daniel 3:29

“Tu-in minamkimte, minam tuamtuamte, pau nam tuamtuamte, mi khat peuhpeuh in Shadrak, Meshak le Abednego-teʼ Pasian gensiatna kampau a om leh kibalnen gawp dinga, a inn uh kisuksiatsak ding hi, ci-in thukham ka bawl hi. Bang hang hiam cih leh hih bangin a hon thei pasian dang om peuhmah lo hi,” a ci hi.

Paunak 16:14

Kumpipa heh leh mi khatpeuh in sih lawh thei a, mipil khat in kumpipa lungdamsak thei hi.

Mangmuhna 5:9

Amaute in la thak khat sa uh a, “Nang Tuuno, tua laizial a la khia ding le a ciaptehnate a la khia dingin na kilawm hi. Nang hong kigo khin ahih manin mi namkim le pau namkim a pau mite sung panin na sisan tawh Pasian adingin mite na lei khin a,

2 KUMPI NIHNATE 25:28

Amah in migitna kam tawh amah hopih a, Babylon sunga amah tawh a om kumpi a mat dangte khempeuh sangin a sang zaw-in amah a pahtawi hi.

Ezekiel 31:11

Tua ahih manin tua singkung ka deih nawn kei hi. Gamdang kumpi khatʼ khut sungah ka pia dinga, ama thuak dingin a kilawm bangin tua kumpipa in a bawl ding hi.

Daniel 4:17

Hih pen a vil, a patau vantungmiʼ thukhenna ahi hi. Tua ahih ciangin mun khempeuh ah a om mi khempeuhte in, a Lian Pasian in miteʼ kumpi gamah vai a hawm hi, cih a thei ding uh hi. Amah in a teel peuhpeuh a neu pente nangawn kumpi a suaksak thei ding hi,’ a ci hi.

Daniel 11:3

Tua ciangin a minthang kumpi khat a hong kilang ding hi. Amah in gam zaipi tak uk dinga, ama thuthu-in a gamta ding hi.

Daniel 11:16

Galdo zo ding om nawn lo uh ahih manin a galte uh a ututin a gamta ding uh hi. Thuciam Gamah zong lutin a khut sungah tua gam a om ding hi.

Daniel 11:36

“Syria kumpipa a ut bangbangin a gamta ding hi. Amah in, pasian-te sangin ka lian zaw a, a Lianpen Pasian sangin zong ka thupi zaw lai hi, ci-in a kisathei ding hi. Pasian in amah gim a piak mateng tua bangin a om ding hi.

Thuhilh-sia 8:3

Kumpipa in a ut peuhpeuh hih thei ahih manin ama kiang panin paikhia in; ama lungkim lohna hih teitei kei in.

Daniel 4:19

Tua ciangin Belteshazzar zong a kici Daniel lungmang lua ahih manin tawmvei sung bangmah gen thei loin a om hi. Kumpipa in, Belteshazzar aw, mang le a khiatna huhau-in na lung mangsak zenzen kei in, a ci hi. Belteshazzar in, Kumpipa aw, nang mangmat le a khiatna pen na galte tungah tung zaw hen, a ci hi.

Daniel 11:12

A galhatna hang le galkap tampi a thahna hangin kisathei mahmah dinga, ahih hangin a gualzo tawntung kei ding hi.