Amos 2:4 - Tedim Bible Revision 2017

⁴ Topa in hih bangin ci hi: Judah mite thum vei a khialh khit, a li veina hangin pel loin amaute gim ka pia ding hi. Bang hang hiam cih leh amaute in ka thukhamte nialin ka thuhilhnate zui lo uh hi. A pu a pate un a na biak sa pasian man lote mah in amaute lam pialsak uh hi.

Tedim Bible

⁴ Topa in hih bangin ci hi: Judah mite a khialh kikkik nilohna hangun, pel loin amaute daan ka tat ding hi. Bang hang hiam cih leh amaute in, ka thukhamte nialin ka thuhilhnate zui lo uh hi. A pu a pate un a na biaksa pasian man lote mah in amaute lam pialsak hi.

Amos 2:4 Referans Kwoze

Ezekiel 20:24

Hih bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka Sabbath-te siasak uh hi. Tua banah a pu a pate un a biak milimte mah a biakna hang uh ahi hi.

Ezekiel 20:16

Tua bangin kiciamna ka bawlna pen, amaute in ka thupiaknate nialin, ka thukhamte zui lo uh a, ka Sabbath-te siasak uh hi. Amaute in kei hong biak ding uh sangin milim biak ding ut zaw uh ahihna hang ahi hi.

Ezekiel 20:13

Ahi zongin Israel mite in gamlak nangawn ah kei hong dem uh a, a zui peuhpeuh in nuntakna a ngah nading uh ahi keima thukhamte le ka thupiaknate a nial uh hi. Ka Sabbath-te zong nakpi takin siasak uh hi. Tua ahih manin amaute a maiman nadingin ka hehna teng gamlak ah a thuaksak gawp dingin ka kithawi hi.

Habakkuk 2:18

Milim, banga kimang ahi hiam? Mihingteʼ bawl tawm na khat hi lel a, thuman hong gen thei lo hi. Tua bangin a pau thei beek lo pasian a bawlpa in muanin a neih bang phatuam ahi hiam?

Hosea 12:2

Topa in Israel mite a mawhsak nading a thu om hi. Jakob a gamtatna tawh kizui-in gim pia dinga, ama gamtatna bangin thukkik ding hi.

Isaiah 28:15

“Eite in sihna tawh thuciamna khat i bawl khin a, Leinuai tawh thukimna khat i nei zo hi. A tuumcip ding tuiciin hong tun ciangin eite hong ban lo ding hi; bang hang hiam cih leh zuau thu i bel a, zuauna ah i bu hi,” na ci uh hi.

ROM (Romans) 1:25

Amaute in a man ahi Pasianʼ thu um nuam lo uh a, a tawntungin phat dingin a kilawm a Piangsak pa bia loin, Pasianʼ bawl sa nate bia-in a zui uh hi. Tu-a bangin hi takpi uh hi.

Amos 3:2

Leitung minam khempeuh lakah note bek hong thei-in, note bek ka hong don hi. Tua ahih manin na khialhna khempeuh uh hangin note gim kong pia ding hi.

Ezekiel 20:18

A tate uh kiangah, ‘Na pu na pate un a bawl thukhamte zui kei unla, amauteʼ tat ngeinate zui kei un. A milim biakte uh tawh zong kininsak kei un.

Jeremiah 9:14

amauʼ lungsim deihna zui tentanin a pu a pate uh hilhna bangin Baal nung a zuih man uh ahi hi.

Jeremiah 8:9

Na mipilte uh maizum ding uh a, lungmangin a cih nading a thei kei ding uh hi. En un, amaute in Topaʼ thu nial uh hi. Bang pilna nei nawn ahi uh hiam?

Nehemiah 1:7

Nangma tungah kong khial khin uh a, na nasem pa Moses tungah na piak ahi thupiaknate, thukhamte le ngeina kipte ka zui kei uh hi.

2 KUMPI NIHNATE 17:19

Judah mite in zong Topa a Pasian uh thupiaknate zui loin Israel mite in a phuahtawm ngeinate zuih pih uh hi.

1 PETER MASA 1:18

Na pu na pate uh nuntak zia, bangmahin a kimang lo nuntakna panin a hong suahtaksak nadingin Pasian in noteʼ man dingin a piak pen a man a kiam thei ngun le khamte bang hi lo a,

1 THESALONIKA MASA 4:8

Tua ahih manin hih thute a thudon lo mi in mite a thudon lo hi loin, note tungah ama Kha Siangtho a hong pia Pasian a thusim lo ahi hi.

Hosea 6:11

No Judah mite zong gim kong piak ding hun kiseh khinzo hi. Ka mihingte a ngei uh bangsakkik ning,

Ezekiel 22:28

Kulh nin kimlai leikang tui tawh a kizut kang bangin a kamsangte un hih bang mawhnate imcip uh hi. A man lopi maang mu uh a, a man lopi-in mailam thu gen uh hi. Topa ahi keimah in amaute tungah thu gen lo napi-in, Topa Pasian in hih bangin thu gen hi, ci-in zuau phuakin mite tungah thu gen uh hi.

Ezekiel 22:8

Mun siangthote zong zahtakna mel kinei loin, Sabbath-te zong kitang lo hi.

Ezekiel 20:30

Tua ahih ciangin Israel mite tungah Topa Pasian ahi keima thugen hih bangin gen in: Na pu na pate un a bawl mawhnate mah note in zong bawlin a milimte mah uh sulzuih ding na hi uh hiam?

Ezekiel 13:22

Keima gen hi lo napi-in na thuzuau gen teng uh tawh mihoihte na lunggimsak uh a, migilote a sih theih nadingun hong kihei loh nading lamah na leh hanthot zawsop uh hi.

Jeremiah 16:12

Note, na pu na pate sangun na siahuai zaw uh hi. Bang hang hiam cih leh en un, noteʼ utna bang ciat na zui tentan uh a, ka thu nong ngai nuam kei uh hi.

Jeremiah 8:2

Amaute in a it uh, a na a sepsak uh, a delh uh, a zon uh le a biak uh ahi ni le kha le van a om nate khempeuh mai ah a kipho khia ding hi. Tua guhte kikhawm nawn lo dinga, kiphum nawn lo ding hi. Leilak a ek kinusia bang ahi lel ding hi.

Jeremiah 6:19

Leitung aw, ngai in! En un, hih mite tungah a thuak ding mahun a kilawm siatna ka tungsak ding hi. Bang hang hiam cih leh ka thu hong ngai lo uh a, ka thukhamte a nial uh hi.

Isaiah 44:20

Amah pen vut a nete tawh kibang lel hi. A lungsim haina in amah lam pialpih khin a, amah le amah kihon khia thei loin, “Ka khut sungah ka tawi milim pen a zumhuai hi lo ahi hiam?” cih zong phawk thei lo hi.

Nehemiah 9:26

“‘Ahi zongin amaute in demnopna lungsim nei-in nang hong lehdo uh hi. Amaute in na thukham nungngat uh a, nangma lamah hong ciahkik nadingun amaute a hilh na kamsangte that uh a, amaute in gendai mawhna lianpi bawl uh hi.

2 KHANG TANGTHU NIHNATE 30:7

Note in na theih uh bangin, amauʼ pute pateʼ Topa Pasianʼ tungah a cihtak lohna uh hangin nakpi takin gim a piak na pute na pate uh le na sanggamte uh bang kei un.

Thukhente 10:6

Tua ciangin Topaʼ muhna ah Israel mite a sia gamtakik uh a, Syria miteʼ pasian-te, Sidon miteʼ pasian-te, Moab miteʼ pasian-te, Ammon miteʼ pasian-te, Filistia miteʼ pasian-te le Baal-te le Ashtaroth bia uh a, amaute in Topa nusia-in ama na sem lo uh hi.

Jeremiah 16:11

Tua ciangin nangmah in amaute kiangah, ‘Topa in, “Na pu na pate un kei hong taisan khin uh a, kei hong nusia-in ka thukham a zui kei uh hi.

Amos 1:3

Topa in hih bangin ci hi: Damaskas khua mite thum vei a khialh khit, a li veina hangin pel loin amaute gim ka pia ding hi. Bang hang hiam cih leh amaute in an gawina suang tawh gawizan bangin, Gilead gam mite gawi gawp uh hi.

Micah 6:12

Na mihaute uh mizawngte tungah tatsia mahmah in, na khua sung mi khempeuh uh zuaugen vive ahi uh a, a kam un khemna thu bekbek gen hi.

2 KHANG TANGTHU NIHNATE 25:14

Seir gamah Edom mite a thahna panin Amaziah hong ciah ciangin amah in Seir gam miteʼ pasian-te hong ciahpih a, ama pasian dingin tuate koih a, tuate bia-in tuateʼ tungah biakna a pia hi.

Jeremiah 17:27

Ahih hangin ka thu nong ngaih kei uh a, Sabbath ni siangthosak loin, Jerusalem khua kongpite ah van pua-in nong lutpih uh leh, tua kongpite ka hal ding hi. A mei in Jerusalem khua kumpi innte lawhin kaang tum dinga, a mei a kiphelh zo kei ding hi,’ va ci in,” hong ci hi.

Hosea 12:3

Jakob in a nu sung nangawn pek panin a sanggampa sawk pah a, a khangham ciangin zong Pasian tawh kilaii hi.