2 KUMPI NIHNATE 1:3 - Tedim Bible Revision 2017

³ Ahih hangin Topaʼ vantungmi in Tishbe mi Elijah kiangah, “Ding in, Samaria kumpipaʼ kamtaite a dawn dingin pai to-in amaute kiangah, ‘Ekron pasian, Baal-zebub kiangah thu a dong dingin na pai nadingun Israel sungah Pasian om nawn lo ahi hiam?’ ci in.

Tedim Bible

³ Ahih hangin Topa’ vantungmi in Tishbe mi Elijah kiangah, “Ding in, Samaria kumpipa’ kamtaite dawn dingin paito in la, amaute kiangah, ‘Ekron pasian, Baalzebub kiangah thu dong dingin na pai nadingin Israel sungah Pasian om nawn lo ahi hiam?’ ci in.

2 KUMPI NIHNATE 1:3 Referans Kwoze

1 KUMPI MASATE 17:1

Tu-in Gilead gam sung Tishbe khua panin Tishbe mi Elijah in Ahab kiangah, “A mai ah ka dinna Israel Pasian, Topa a nungta ahih mah bangin keima thu tawh loin daitui ahi a, guah ahi zongin hong tung ding kumte sungah om lo ding hi,” a ci hi.

Jonah 2:8

Kimanna a nei lo milim a biate in nangmah hong taisan uh hi.

Late 76:1

Judah gam sungah Pasian kithei a, Israel gam sungah ama min lian hi.

Sawltak 8:26

Topaʼ vantungmi khat in Filip kiangah, “Kithawi inla, Jerusalem khua panin Gaza khua paina lampi zuan dingin leitaw lam manawhin pai in,” a ci hi. (Tua lampi tu-in kizang pha nawn lo hi.)

Marka 3:22

Jerusalem khua pan a hong pai Thukham hilh siate pawl khat in, “Hih pa sungah Beelzebul lut hi. Dawimangpa in ama tungah dawi hawlkhiat theih nading vangliatna pia hi,” a ci uh hi.

2 KUMPI NIHNATE 5:15

Tua ciangin Pasianʼ mipa kiangah amah le a pawlte khempeuh kilehkikin ama mai ah ding uh hi. Tua ciangin amah in, “En in, leitung mun dang khempeuh ah Pasian om loin, Israel sung bekah om hi, ci-in ka thei hi. Tua ahih ciangin tu-in na nasem pa tung panin letsong khat hong sang in,” a ci hi.

2 KUMPI NIHNATE 1:8

Amaute in amah dawngin, “Amah in samul puan khat silh a, a kawng ah savun kawnggak gak hi,” a ci uh hi. Tua ciangin amah in, “Amah pen Tishbe mi Elijah ahi hi,” a ci hi.

2 KUMPI NIHNATE 1:6

Tua ciangin amaute in ama kiangah, “Kote a dawn dingin mi khat hong pai-in kote kiangah, ‘Note hong sawl kumpipa kiangah paikik unla, Topa in hih bangin ci hi: Ekron pasian, Baal-zebub kiangah thu a dong dingin mi na sawl nadingin Israel sungah Pasian om nawn lo ahi hiam? Tua ahih ciangin tu-a na liamna panin na damkik zo nawn kei dinga, na si taktak ding hi,’ hong ci hi,” a ci uh hi.

2 KUMPI NIHNATE 1:2

Samaria-a a inn dei tungnung innliim panin Ahaziah kia-in a liam hi. Tua ahih ciangin amah in kamtaite sawlin amaute kiangah, “Pai un, hih natna panin ka damkik zo ding hiam cih thu Ekron pasian, Baal-zebub kiangah va dong un,” a ci hi.

1 KUMPI MASATE 21:17

Tua ciangin Tishbe khuami Elijah tungah Topaʼ thu hong tunga,

1 KUMPI MASATE 19:7

Tua ciangin Topaʼ vantungmi a nih veina hong paikikin amah lawng a, “Tho inla an ne in; tua hikeileh nang adingin khualzinna haksa lua ding hi,” a ci hi.

1 KUMPI MASATE 19:5

Tua ciangin poding kung khat nuai ah amah lum sukin a ihmu hi. Tua laitakin vantungmi khat in amah lawngin ama kiangah, “Tho inla an ne in,” a ci hi.

1 KUMPI MASATE 18:36

Biakpiak hun ciangin kamsang Elijah a nai ah hong pai-in, “Abraham, Isaac le Israel Pasian, Topa aw, nang pen Israel sungah Pasian na hihna le kei pen nangma nasem ka hihna le hih nate khempeuh nangma thu tawh ka hihna thu tu ni-in kitheisak in.

1 KUMPI MASATE 18:1

Ni tampi khit a kum thumna kumin Elijahʼ tungah Topaʼ thu hong tunga, “Pai in, Ahab kiangah nangmah kilak in. Tua ciangin keimah in leitungah guah ka zusak ding hi,” a ci hi.

1 SAMUEL MASA 17:46

Tu ni-in Topa in ka khut sungah nang hong pia dinga, keimah in nang hong sattukin na lu ka tan khia ding hi. Tua ciangin tu ni-in huihlak vasate le leitung ganhingte tungah Filistia mi a siteʼ luanghawmte ka pia ding hi. Israel sungah Pasian khat a om lam leitung mi khempeuh in a theih nading,

2 KUMPI NIHNATE 5:8

Ahih hangin Israel kumpipa in a puante a bal kekna thu Pasianʼ mipa Elisha in a zak ciangin amah in kumpipa kiangah mi sawlin, “Bang hangin na puante bal kek na hi hiam? Israel sungah kamsang khat a omna thu amah in a theih nadingin tu-in kei kiangah amah hong paisak in,” cisak hi.

1 KUMPI MASATE 11:33

Bang hang hiam cih leh amah in kei hong nusia a, Sidon miteʼ nusian Ashtoreth, Moab pasian Khemosh le Ammon miteʼ pasian Milkom bia-in, a pa David bangin keima muhna ah a manin gamta loin, ka thukhamte le ka ngeina kipte zui loin ka thu hong nial hi.

Isaiah 8:19

Amaute in note kiangah, “Phun suausuau-in a pau mualmual vankah theite le aisan theite kiangah thu dong un. Mite in amauʼ pasian-te thu dongin, mihingteʼ thu pen misite dot ding mah hi lo ahi hiam?” hong ci ding uh hi.