2 KHANG TANGTHU NIHNATE 4:16 - Tedim Bible Revision 2017

¹⁶ Topaʼ biakinn dingin Kumpi Solomon adingin siapa Huram in a kihal sumngo tawh a bawl beelte, kawbiate, sikkeukate le hihte adingin nazat khempeuh ahi hi.

Tedim Bible

¹⁶ Topa’ inn dingin Kumpi Solomon’ adingin siapa Huram in a kihal sumngo tawh beelte, kawbiate, sikkeukate, leh hihte’ adingin nazat khempeuh a bawl hi.

2 KHANG TANGTHU NIHNATE 4:16 Referans Kwoze

2 KHANG TANGTHU NIHNATE 2:13

Tu-in Dan minam numei khatʼ tapa, thutelna tawh a kidim, siamna a nei, siapa Huram kong puak hi. Ama pa pen Taia khuami ahi hi. Amah in kham, ngun, sumngo, sik le sing le a ausan, a dum le a dupsan puante le saihadial puan le zepna nam khempeuh a sem ding le ka topa ahi na pa Davidʼ mi khutsiamte tawh a sem khawm dingin ama tungah a kipia nasep khat peuhpeuh a sem dingin siamna a nei sa ahi hi.

2 KHANG TANGTHU NIHNATE 4:11

Huram in beelte, kawbiate le kuangte zong bawl hi. Tua ahih ciangin Huram in Kumpi Solomon adingin Pasianʼ biakinn a bawl nasep a zawhte:

1 KHANG TANGTHU MASATE 28:17

le sikkeute, kuangte le haite adingin kham citak a gihna; kham haipite le a gihna ciat, ngun haipite le a gihna ciat;

1 KUMPI MASATE 7:45

Tu-in beelte, kawbiate le kuangte, Huram in Kumpi Solomon adingin a bawl, Topaʼ biakinn sungah a om nazatte khempeuh a tee sumngo tawh a kibawl ahi hi.

Paikhiatna 38:3

Biakna tau nazat khempeuh, beelte, kawbiate, kuangte, sikkate le vutluahna peekte a bawl hi. A nazat khempeuh sumngo tawh a bawl hi.

Paikhiatna 27:3

Ama adingin vut koih nading beelte le kawbiate, kuangte, sikkate le vutluahna peekte na bawl dinga, a nazat khempeuh sumngo tawh na bawl ding hi.

2 KUMPI NIHNATE 25:14

Tua ciangin amaute in beelte, kawbiate, taitehte, paknamtui adingin pakante le biakinn sung nasepna a kizang sumngo nazatte khempeuh,

2 KHANG TANGTHU NIHNATE 4:15

tuikuangpi khat le tua nuai-a a om bawngtal sawm le nihte,

2 KHANG TANGTHU NIHNATE 4:17

Jordan zanglei sung Sukkoth le Zeredah kikal beel lei ah kumpipa in hihte sungsak hi.

1 KHANG TANGTHU MASATE 18:8

Tua ciangin Hadadezerʼ khuapite Tibhath le Kun panin David in sumngo tampi tak la hi. Solomon in tuate tawh sumngo tuikuangpi le khuampite le sumngo umlebeelte a bawl hi.