Tekang Kbuten 18:23 - Udél Dwata: Gna Kesfasad ne Lomi Kesfasad

²³ Omin Abraham hloni ne snólóken Dwata, monen, “Bè yóm nmoem bè Sodom yó, homong hnatayem bè yó kem tau sidek nmò le kô yó kem tau tedeng nmò le?

Tekang Kbuten 18:23 Referans Kwoze

Lista 16:22

Okóm tódô le lemfen bè tonok le Musis ne Aron ne yó mon Musis mò ke Dwata, “Ó Dwata, uu se hlowil yóm kdéen mowil. Ke olohen tek sotu tau yóm mò sidek gotu homong lenbutem kô yóm kdéen tau?”

2 Samwél 24:17

Timbow ton Dabid yóm hógów Dwata mit hatay, yó monen mò ke Dwata, “Ou se yóm deng gemsalà béléem, ne bud ou se mò du yóm sidek. Okóm kul ni kem tau ni, hol lómón ke ubiha le, laen dù sidek nmò le. Ou ne tnafakem homongem yó kem fes lówóhu.”

Tekang Kbuten 20:4

Okóm là deng sentungô Abimélék ke Sara he. Yó gónón mon du mò ke Dwata, “Hnatayem kô yóm tau laen dù salaen?

Hibru 10:22

Yó gónóm mon, hol tekuy hloni ebè Dwata dé. Hol hewót tekuy lem but blutut tekuy yóm kehloni tekuy yó, mung du yóm hol kehtahu tekuy béléen. Yakà deng hólósen tekuy Jisas, yó gónón deng mkó ta tekuy ne yó kem salà tehe gel hemblat tekuy. Hol lómón ke deng denyohen tu lem yóm tey él tikaw.

Tekang Kbuten 18:25

Bè ktahuhen là kô na a yó du nmoem ke tô homong hnatayem lu yó kem tau tedeng bè yó kem tau sidek nmò le. Ke yó nmoem, deng le mom gomong megtafak yó kem tau tedeng bè yó kem tau sidek nmò le. Hol mou kun ne yóm fen kmukum yóm kdéen tau bè klamangen benwu ke tô là tedeng kkukumen.”

Jirimaya 30:21

Yóm tau malak kul lemwót bè kul kwen, là kô tólóng tau du. Tinoku yóm tau yó anì hloni ebéléu, mon Dwata. Ke là lemwóten bè yóm ktinoku du, laen kô dù tau mlos hloni ebéléu.

Kem Lingón 73:28

Okóm béléu, alì hyu gemnóm du yóm kehlonihu ebè Dwata anì naw e heklung béléen, yóm Dwata hol gónó mogot. Tey hyu gemnóm du snéen yóm gel keheglalagu du yóm kdê gel nmoen.

Sulat Jim 5:17

Lómón ke tehe Ilaydya ekni, sotu tau tonok lómón tekuy snéen, ngem yóm tehe knihen bè Dwata anì là kmulónen. Tahu se, botong tlu halay sóól kegenen là kmulón.

Sulat Jim 5:16

Yó gónóm mon, hol ye gel seflifót, ne hol ye gel stóbóng mni bè Dwata yóm kdê ye anì kó Dwata bélê ye ke wen tenduk ye. Yóm tau hyu kmoen, tey mtud yóm knihen bè Dwata.

Tekang Kbuten 18:24

Mò kmoen se ke wen limu folò tau tedeng nmò le menwu bè yó, genlaem kô klamang yóm syudad yó? Là knamaem du kô yóm syudad yó anì mowil yó kem limu folò tau tedeng nmò le nô lemen?