Taytus 3:2 - Udél Dwata: Gna Kesfasad ne Lomi Kesfasad

² Bê le abay sentulón yó kem dumu tau. Bê le abay mit sgés. Yake hfulung le mit swè bè kem dumu le, ne hfulung le hemganag nawa le bè kdéen tau.

Taytus 3:2 Referans Kwoze

Ifisus 4:31

Gotu kó ye yóm ksidek knawa ye bè kem dumu ye, ne yóm sidek knóyô lówó, ne yóm ksukeg nawa. Hol bê ye abay bud gel sefetê ne semdekà. Kó ye lem hendem ye yóm kessutó nawa.

Ifisus 4:2

Hol dnalang ye dé yóm keheglaan ne yóm kganag nawa ne yóm khanay nawa. Hol hegfan ye yóm kesbong ye nawa bè yóm gel kessadat ye.

1 Timuti 3:3

là hlengelen, là kosut nawan, okóm tau ganag nawahen ne menek nawahen, là són bè kgutahen filak gónón nô nawahen.

1 Pitér 3:10

Hol lómón yóm monen bè Sulat Dwata, yóm monen, “Yóm tau ke nóyóen yóm kehyu klowilen ne yóm kwen kligalen, yake nafasen ksumóngen, ne béen abay tmulón kéng.

1 Pitér 3:8

Duhen ni, hol sensotu ye nawa ye ne hol ye skodu, ne hol ye sbong nawa ne hen-ganag ye nawa ye. Hol heglaan ye knô ye bè kem dumu ye.

Sulat Jim 4:11

Ó kem dumuhu setwoli, bê ye abay gel sentulón kem dumu ye. Ke gel sentulón ye kem dumu ye hemtahu, duhen ke tódô gel hendeng ye kul kmò, hol lómón ke senlón ye ne hen-gnok ye yóm hlau Dwata. Ke ni se nmò ye, sélét mom tô lolò ye ne yóm hlau Dwata. Kéng tô yu mom baling geta senta Dwata.

Glasya 5:22

Okóm ke tendo tekuy halak bè Tulus Dwata, wen bunguhen. Yó bunguhen, duhen yóm kesbong nawa, ne yóm kligal, ne yóm kenek nawa, ne yóm kanay nawa, ne yóm kganag nawa, ne yóm kehyu kmò, ne yóm kteneb nawa,

Matyu 11:29

Tles nbô ye dé yóm dou nbô, ne hol ye dmalang béléu, abay se ganag nawahu, ne là kóe hegeta knô. Ke yó se kuy nmò, là kô ye na e bud miteg.

1 Pitér 2:1

Ke deng ye baling kun ngà Dwata, duhen yó hol kó ye yó kem sidek gel nmò ye. Bê ye tmulón kéng. Bê ye nmò yóm tulón wen lafinen. Bê ye gel sélés nawa. Bê ye abay henwog kem dumu ye.

Sulat Jim 3:17

Okóm yóm tau ke lemwót bè Dwata yóm ketngónen, laen kô dù belenen. Gel nmoen yóm gónón menek bè kem dumuhen, lelen ganag nawahen ne wen khulungen mit swè. Tey gel knoduhen kem dumuhen ne lelen hyu kmoen ebélê le. Là kô ton tekuy du béléen yóm nawa kmihu ne laen se kô lafinen yóm nawahen.

Glasya 6:10

Yó gónóm mon, ke wen lan tekuy tmóbóng kem dumu tekuy, hol tnóbóng tekuy lu, sélétem mon bè yóm hol dumu tekuy hemtahu.

2 Samwél 22:36

Yóm deng kehewaem do, lómón ke yó se klungu, ne yóm któbóngem do gónóhu alì gboluy.

Glasya 6:1

Ó kem dumuhu setwoli, ke wen ton ye sotu bè yó kem kuy dumu hemtahu wen gónón btang bè kloloen ke Dwata, hol hen-ganag ye nawa ye tmóbóng du, yu kem tau gulit kloloen du yóm Tulus Dwata, anì mulék hyu se kun. Okóm eles ten-gama ye, kô wen gónó ye gsindil se kuy.

1 Timuti 3:11

Kólen bè yó kem yehen le, hol sneb kul snéen ke libun hyu kmò le, ne ke là gel sentulón le kem dumu le, ne ke là hlengel le, ne ke laen dù kéng nmò le.

1 Tisalunika 2:7

Okóm ke nawa me se hadat bélê ye, là móngóhen, yakà mi du se yó kem nélék Krays mò hógówen. Okóm yóm kmò me kuy, heskél tekuy ebè yóm libun alì ganag nawan semgifà yó kem ngaen.

Flipay 4:5

Hol hen-ganag ye nawa ye bè yóm kdéen tau. Móyónen kól ne yóm gónó tekuy mogot.

1 Kurin 9:19

Nim ou, laen kô deng tau gónóhu klifen. Okóm tódô kem ou ne heklifen knóu bè kdéen tau anì hol temnù kwenen yóm tau nwitu ebè Krays.

Kem Lingón 140:11

Hol béem abay hdengen lu yó kem tau mò kéng bè nim benwu me. Hol wen he hlayam hgefetem bélê le yó kem tau alì lóbô.

2 Kurin 12:20

Wen tey tnafa nawahu bélê ye. Tnafa nawahu ke kóle dyó, déke wen tonu bélê ye yóm là nóyóu du. Ke tahu se yóm yó, déke angat wen se ton ye béléu yóm là nóyô ye du se kuy. Yó tnafa nawahu, kô tonu bélê ye yóm skuya mon, ne yóm sélés nawa, ne yóm sefebut, ne yóm seglom, ne yóm sefnê, ne yóm kenek ksumóng ye, ne yóm kehegmón ye, ne yóm kesbeweg ye.

2 Kurin 10:1

Ou se Pol yóm mudél ebélê ye ni. Deng gungolu wen se bélê ye mon du kun, “Tey yóm Pol, gel mudél hdana ke nô bè ni. Kulel kehwiten udél des ke nô bè benwu mayuk.” Okóm bè nim gna udél hwitu ebélê ye ni, là desen, mom hlanu bè yóm tey kganag nawa Krays.

Kul Nmò 23:5

Bnalà Pol se lu, monen, “Tey, kem dou dumu tau Israél, là kô tngónu du ke du yóm hol geta bè yó kem gel demsù ebè Dwata. Ke tngónu, là kô nmou du, abay se monen bè udél Dwata, ‘Béi mudél sidek ebè yóm tau gónó ye galak.’ ”

Kem Udél Hlalak Tehe Selumun 25:24

Mom hyu he ke nô bè gónón hnas yóm tau senta ke setnù le tuha libunen yóm tendo gel mit du sgés lem gónô.

Kem Udél Hlalak Tehe Selumun 6:19

Gnemen yóm tmifù kéng ne ghituhen yóm tau hesfatayen kem dumu tau.

Sulat Jud 1:10

Okóm kul yó kem tau sekban ktolok le yó, balù yóm là deng tngón le du, senged alì kehnê le du. Lómón tô le ógóf, ket ksuten bè nawa le yóm knóyô lówó le, ket kmò le du. Duhen yó se angat mit kul lem hatay laen sónen.

Sulat Jud 1:8

Senged snéen yó kem tau tmolok sekban ni. Yó gel mon le wen gel kna le kun, ne lemwót bè yóm gel kna le yó, tódô henlel le ne mò samuk. Bà udì ke wen kimón le ke Dwata. Ne yó kem hógów Dwata alì mfasang gel nô bè longit, sana tey kehnê le kul.

2 Pitér 2:10

Hol néen yó kem tau tódô lolò le yóm sidek knóyô lówó le, ne gel natù le Dwata. Ni kem tau tmolok sekban ni, laen kô dù nadat le, ne tey kehegmón le. Balù yó kem alì mfasang gel nô bè longit, sana kehnê le kul.

1 Pitér 4:4

Ne ni kmoen ni, tey ketnga yó kem tehe dumu ye gel mò sidek ekni, abay se là bud ye gel mung hbusaw bélê le. Yó se gónó le gel semdekà kuy.

1 Kurin 6:10

Ne yó kem tau mnagaw, là kô le gmung bè yó kem tau nogot Dwata, ne yó kem tau seglom, ne yó kem tau gel hlengel, ne yó kem tau gel sidek kbak le ebè kem dumu le, ne yó kem tau tódô gel temsob ma.

Isaya 40:11

Tey hyu yóm angat kesegyoken kul, lómón yóm tau hyu kesegyoken yó kem ubihahen. Gel sentifunen yó kem ngà ubihahen ne gel sniwihen lu. Ne hen-ganagen malak yó kem yê le.

Kem Udél Hlalak Tehe Selumun 19:19

Yóm tau sunget yake tódô du mayad salaen abay se ke fen bnayadem béléen tenmónen mò du.