Taytus 2:8 - Udél Dwata: Gna Kesfasad ne Lomi Kesfasad

⁸ Yake hono tahu yóm gel tolokem kul anì laen dù gónó le gemsanil du yóm gel tulónem. Ke ni se nmoem, mulék le myak yó kem hmohon kut lemwót bè yóm klaen dù bang udél le eta te.

Taytus 2:8 Referans Kwoze

1 Pitér 2:12

Hol hninggel ye mò kmò ye lem blóng yó kem tau là hemtahuhen. Abay se ke són hyu yóm gel ton le bélê ye, laen kô sfuhen ke wen tô semtulón kuy. Ngem angat gbót dóyón le Dwata bè yóm kdaw kesfuléken edini.

1 Pitér 2:15

Yó kóyô Dwata ke lemwót bè yóm kehyu kmò ye gónón laen dù bud udél le eta ye yó kem tau là hulungen hedem, yó kem tau tódô gemsanil kuy hkawang.

1 Pitér 3:16

Okóm hol hen-ganag ye nawa ye malà kul mung du yóm kadat ye kul. Hol gel ten-gama ye anì laen dù sidek gmò ye. Baluen ke wen tau semdekà kuy bè yóm klolò ye ke Krays, ke laen dù sidek tonen bélê ye, bud mulék myak yóm tau semdekà yó.

1 Timuti 6:3

Ke wen tau tólóng toloken, ne là segtónen ebè yóm tahu udél yóm gónó tekuy mogot Jisas Krays, ne là se segtónen ebè yóm ktahuhen deng tolok me,

2 Tisalunika 3:14

Ke wen tau bè yó là mimón du yóm deng mon me lem nim sulat ni, hol tenngel ye ke tau du, ne bê ye bud slomong béléen anì dilóen là hyuhen yóm kun nmò.

1 Timuti 5:14

Yó gónóm mon, hyu nawahu bè yóm libun bolu ke hanà tukô nawahen ke tódô bud myehen anì wen ngaen, ne anì sen-gifaen yó kem fes lówóhen. Anì yó, laen dù bang gónó le dmelem kut yó kem hmohon kut.

Kun Snulat Luk 13:17

Bè yóm udél Jisas yó, gotu le mulék myak yó kem hmohon du. Okóm yó kem dumu tau bè yó, gotu le hligal du yó kem dê tennga ton gel nmoen.

Mark 12:34

Bè yóm kbalaen yó, gónón gdilô yóm khulungen hedem, yó gónó Jisas mon du mò du, “Là mayuken béléem ke hogotem ke Dwata klowilem.” Kogolen bè yó, laen kô dù tau bud mlos smólók ke Jisas.

Mark 12:32

Bud monen mò ke Jisas yóm tau tmolok hlau yó, “Tahu se yóm monem yó, Sér. Tek són Dwata se yóm gónó tekuy mogot ne laen dù dumu Dwata, són du.

Mark 12:28

Ne nô bè yó yóm sotu tau gel tmolok hlau, ne gungolen yóm sentulón le Jisas yó. Tódô dilóen hyu yóm balà Jisas kul yó kem Sadyusi. Ominen bud smólók ke Jisas se kun, monen, “O Sér, mahi du bè yó kem hlau tekuy yóm hol bong muhen bè kdéen?”

Mark 12:17

“Na,” mon Jisas, “ke Sisar se funen, tódô blay ye ke Sisar yóm kun. Ne blay ye ke Dwata se yóm kun.” Ya tey ketnga le du yóm kbalà Jisas kul yó.

Taytus 3:14

Yó kem dumu te deng hemtahu bè yó, yake hol le hfulung mò du yóm hyu anì duhe kóm wen lan le gel tmóbóng yó kem dumu tau laen bang genbek le. Là hyuhen ke là wen muhen yóm klowil le.